Even n aanvullen op de blog van guster over Otto Groote en zien Ensemble. Op dinsdag 6 juli is Otto as proatende en zingende gast bie Henk Scholte in t radioprogrammoa “Twij deuntjes veur ain cent” (18.00-19.00 uur, Radio Noord). Wis en vast muite weerd, goa mor luustern, dij WK-voetballerij is ja pas om haalf negen soavends…
Otto Groote bie Henk Scholte in ‘Twij deuntjes’ (Radio Noord - 18.00-19.00 uur, dinsdag 6 juli 2010)
18:31OTTO GROOTE ENSEMBLE - De anner Steerns an d’Heven
14:53Machteg mooie spaigelploat! Vattien nummers van t OTTO GROOTE ENSEMBLE mit mitwaarken van Linde Nijland, Bert Ridderbos, Armin Seelig en Uli Stieker! Eerlieks woar, je können zo’n ploat aalweg vannijs ofspeulen, en dat dou k veureerst din ook! ‘De anner Steerns sn d’Heven’ woar t mit begunt, mor benoam ook ‘Danz för de Drömers’ (mit Linde Nijland), ‘De olle Joe’, ‘De eensaam Fisker’, ‘Düüster Maan’, och, ik kin ze beter aalmoal opnuimen. Nait te vergeten ‘Dönen un Drömen’, ook weer mit Linde Nijland. Dizze kinnen we ook ja van “Törf”!
Bie spaigelploatje is ook n boukje mit de teksten, kin je t woord veur woord volgen! Elkenain dij wat mit dizze (folk)meziek het, en mit Platt-Duuts: KOPEN!
Veurploat van CD mit OTTO GROOTE ENSEMBLE
Meer over OTTO GROOTE kin je vinden op www.otto-groote.de.
Otto Groote Ensemble komt ook noar t NOORDFOLK FESTIVAL op zundag 8 augustus in Veenhuizen! Nijs doarover kin je vinden op www.noordfolk.nl.
KREUZE 25, zilver! (En nou op pad noar gold….)
16:43Nije Kreuze ligt der, nummer 25, n dikke! Lutje 30 bladzieden mit verhoalen, gedichten, verskes, herinnerns, beschaauwens, misdoadvervolgverhoal van Jan Huttinga: Van `poters’ noar `DE dood van Vera R.’, van ‘Sauzen’ noar ‘Herinners aan d’oorlog, dail 2′, van ‘Bezzenjenever’ tot ‘Sirkus van Holland’…. De RONDZENDBRAIF is kompjoeter oet, gainent kregen? Aanmelden bie jan@kreuzekeuze.nl! Je kinnen vanzulf ook op webstee kieken: www.kreuzekeuze.nl. Vin je ale nummers, goa der mor even veur zitten!
Schrievers? Jan de Jong, Jan Hoiting, Jan Huttinga, Jan Blaauw, Jan Sleumer, mor t binnen nait allenneg Jannen: Cor Uildriks, Hanne Wilzing, Henk de Weerd, Klaas van Zonneveld, Roel van t Knoal, Age van der Velde, Tiny Veldhuis, Carry Grit, Joyce Bodewes, Trijnko Pelgrim, Giny Hartman, Ineke Bouwman, Coby Poelman, Frouk Huisman, Siet Bootsman, Fennie Croeze, Beno Doedens, George Petzinger, Willy Westerdijk, Nane van der Molen, Anna de Vries, Free Westerhoff, Hillie Wildeveld…… En kin ook best nog gounent vergeten hebben…..
Veurplat van 25ste Kreuze, n zulvern oetgoave mit n golden raand!
Nije KRÖDDE, nummer 114, Grunneger Tiedschrift
17:38Der is n nije KRÖDDE oetkommen, nummer 114, zummer 2010. Bult aandacht veur Gerd Constapel, winnoar 2009 Freudenthalpries mit gedichtencyclus “Stoom”. Achterin n interview mit Gerd Constapel, en n foto derbie (baaident deur Jan Glas). PLATT in Krödde, Grunneger Tiedschrift, ik vin t meroakels mooi.
Nog aans wat as Constapel? Joa, verhoalen en gedichten van schrievers as Jan de Jong, Hans van der Lijke, Henk Puister, Hanne Wilzing en Anneke Mensen. Muite weerd, wis en vast!
‘Krödde’ komt 4 moal in t joar oet, abonnementspries is €15,00 veur n joar. (Je kinnen ‘Krödde’ ook lezen in biebelthaik, asmits mout je dìn wel even op n aner wachten…)
Meer waiten? www.krodde.nl
Veurkaant van nije Krödde, nummer 114, zummer 2010
Jibbo Poppen (60) overleden
19:51t Laip mie vanvummedag even kold over rôgge, kreeg der houndervel van: Pagina 2, In Memoriam Jibbo Poppen…. Dat t nait best ging, dat wos ik. Op 19 maai wazzen hai en zien vraauw Alide bie ons west, konnen we boeten zitten, al was der n frizze wind. Dou kregen we nog es oetgebraid te heuren wat der loos was mit gezondhaid, en dat was nait niks. Kanker, mit oetzaaiens, nait meer te genezen…. Jibbo wol gain chemo, was nog wel in India west, in n kliniek veur wat alternatiefs. Vief weke leden klonk e nog aal positief, mor ook realistisch. Hij wos nait hou laank e nog n beetje ‘kwaliteit van leven’ tot zien beschikken haar. Kuggelde wat, doch mor even mit noar dokter… Wie zollen nog aal n moal noar Emmercompascuum woar e nou woonde mit Alide, zien twaide vraauw. (Jibbo het joaren in Westerlij woond mit zien eerste vraauw Grietje, dij is nog nait ains zoveul joaren leden oet tied kommen, kánker…). Pagina 2, mit t ‘In Memoriam’ van Dagbladhoofdredacteur, gaf mie n beste dreun. Loater, dou TNT-postbode overliedenskoart brochde, kon k der nog nait best mit oet de vouten. Dóód, ik krieg der gain sloek op….
Jibbo Poppen, zo ommenbie 1960, 1961, achter t hoes aan Grintweg in Winschoot)
Jibbo is n neef van mie. Olste zeun van mien taan Rika en oom Jan, baaident al laank leden oet tied kommen. Taan Rika was jongste zus van mien moeke, dochters van Hemmo de Groot en Gepke Hector oet Drijbörg, hoeske aan Ol Diek. Dou wie kinder wazzen, zagen we mekoar geregeld n moal. Zai kwammen op fietse van Sodom noar Midwolle, of wie op fietse van Midwolle noar Grintweg, bie ‘Hessenbril’ laangs. Asmits ook bie taan Zwoantje in Eexte, aan Laangeweg bie t spoor, woar we aaltied oren spitsen deden as der n ‘blaauwe engel’ aan kwam (ook al was e ‘rood’). Loater verwotterde dat contact, elk ging zien aigen gaang en dìn kom je mekoar voak allain mor tegen bie traauwen, begroaven of cremeren, en dat was dou nog nait zo voak. Jibbo kwam op drukkerij bie Van der Veen in Winschoot, zo kreeg e mit ‘Winschoter’ te moaken. Loater kreeg e deur dat schriéven wat veur hom was en, nog belangrieker, lu van drokkerij kregen t ook deur. Zo kwam e veul loater op (zien) stee bie ‘Dagblad” (wil je der meer van waiten, kiek mor op pagina 2 van kraande van vandoage, 26 juni). In zien boan as ‘lezersredacteur’ heb k nog wel n poar moal contact mit hom had. Deur foto’s dij k instuurd haar, mor ook n moal as ‘Lezer van de Week’.
Joaren kreëerden ofstand, benoam dou ollu aalmoal d’ogen sloten haren. Goie beduilens zat, mor ja… Tot w’in maai n ofsproak moaken deden en n poar gezellege uren mit mekoar haren. Joa, wie kommen gaauw…… En nou is t te loat, zo gaait dat en zo mout t aiglieks nait goan. Kin mie wel veur de kop haauwen, mor zölfs doar mout k mit oppazen, kin nait zo veul meer lieden….