Jeebeetjes.nl

Joa, guster lag e op deurmatte, kevört mit nije ‘DIESEL’, nummer 71, “Vörjahr 2010″. (Bult nijs over DIESEL kin je lezen op www.diesel-online.de). In dizze nijste DIESEL (Stiekelbladd Platt) mit n schiere veurploat mit “Poggstohlen”, n foto van Mercedes Reibe van t Gymnasium in Emden, kin je “Breven van uns Lesers” lezen, der staait n Sülvenraadsel up Oostfreesk in en n verhoal over Theo Schuster, dij het de Wilhelmine-Siefkes-Pries 2010 kregen, van de Stadt Leer. JOa, der stoan vanzulf weer n bult gedichten en verhoalen in dizze DIESEL, zo as:
Vörjahrsahnen

Amselsang
hett mi vandaag
upwaakt
in de Wilgen
mauen sülvern
Kattjes
Toverspröken weven
dör de Lucht
Klörengedrüüs klingt
ik seh al
Karsenblössems neei
up de Twiegen
vergeten sünd
Iesjökels un
kolle Wind

USCHI GRESSMANN

En Johannes Diekhoff schrift over n Paaske-Slingerleerlapp int Weltrekordbook! (Zo’n ‘Dingerees woarmit lüttje David Goliath en Steen vör de kopp goit het’) . In t gruine dail, in t midden, staait NIJS van ‘Oostfreeske Taal’, “Vereen för oostfreeske Spraak un Kultur i.V.”
Op bladziede 25 vin je wat over “Törf”, van JOHANN JOACHIM JANSSEN. t Begunt zo:
“Ach Lü, wat löppt de Tied. Intüsken is Henk, de “Kopp” van TÖRF, al lang “Ridder van Oranje”, un he hett de een un anner Pries tosproken kregen, un he warkt heel seriöös in dat “Huus van de Groninger Cultuur”….
En dan op bladzied 31 ook nog wat over “Kinnerböken” as “Gifft dat egens Brummers, de na Worteln smecken doot?” un “De Oosterpoggen”.
Prachteg nummer, mooi dat Oostfreesk!

DIESEL 71 mit 'Poggstohlen' op t veurblad

Heb je m ok al? ‘MOI elkenain’! (Tiedschrift Dag van de Grunneger Toal). Der stijt zo’n nijmoods jong op, de hoaren recht omhoog, n vuust ien e lucht, n bril op die ze nog niet ies bij ‘Mamamini’ verkopen, n splinternije megafoon ien e haand, en mor brullen…….  Tegen welke doven het t eigelks? Die doarachter op e roamen, joa, dat kan, die bennen niet de jongsten meer….. Mor dan kan e doch beter d’aner kaant op bölken…. Die bruloap vragt vanzulf d’aandacht van de lu op e stroat veur t gebouw van d’Archieven, doar ien Stad, aan t Cascadeplein. Nou, zoveul lu lopen doar nou ok weer niet doagelks. Kan e beter op e Grode Maarkt stoan goan: DAG VAN DE GRUNNEGER TOAL, 20 meert, van elf tot vief uur, kom Grunnegers, op noar t Cascadeplein!!!!!!
Nou even weer de kop derbij, t is n schier blad worden, ‘MOI elkenain’. Der zit zölfs n luchtje aan, mooi pepier, prachtege ploatjes, knap doan! Deputeerde Hans Gerritsen is as eerste ien beeld en aan t woord, volgd deur Coby Vermeeren, ‘docente Grunnegs’, ja ja…. En dan t mooiste van t hiele blad: Engel Jan Struif as apostel van t Grunnegs! Struif preekt t liefst ien t Grunnegs, doar kan e meer humor ien kwiet as ien t ABN! Op bladziede 6 en 7 n kennismoaken met GRUNNEGER SCHRIEVERS: Annie van Dijken, Klaas Duursma, Fieke Gosselaar, Hanne Wilzing, Vera Sutman, Harry Niehof. Mooie ploatjes derbij! Vanzulf haren ze der ok bij zetten können dat ien as Hanne Wilzing ok ‘publiceert’ ien onze Kreuze, mor dat hebben ze woarschienlek vergeten. En dat Klaas Duursma doar eerst ok ien schreef, al is e dat zölf messchien ok al weer vergeten….. Woarom Vera Sutman ien e “SCHRIEVERSGALERIE” stijt? Dat wiet ik niet, mor ik vin t wél mooi! En dan nog n verhoal van Martin Hillenga over de Veurleescup, “VEURLEZEN MAANK ZEEHONDEN”! Schier zo wat, Lenie ‘t Hart het ze al laank les geven ien t Grunnegers, dat verstoan die dieren as de besten! JOa, en dan ok nog n gesprek met Gré Rijskamp: kapster/schilderes/dichteres. En ze het vroeger ok nog zongen! As Wotterman, ‘all over the world!’
Ien MOI ok n verhoal van Joop van de Bremen over Ede Stoal en zien waarme douche. JvB het n webstee: www.streektaalzang.nl. Kieken en luustern!
Achterop MOI stijt t program van 20 meert, van de Dag van de Grunneger Toal! n Drukte van belaang!
 Hoe je aan zo’n MOI kommen kunnen? Nou, ik heb der eerlieks woar niet veul veur doan…. En ik heb der nou al minstens 5 ien e bus kregen…. Dus as je niet meer bij n biebeltheek kommen, vroag mij mor even, ik heb der genoeg! (t Is niet aaltied eerlieks verdeeld op e wereld; bij onze KREUZE doen we alles met t leegste ‘budget’ wat der mor te bedenken is, de websteekosten hoalen w’uut onze eigen knipkes, en dan wor je wel ies wat vergreld as je zo mor ‘minstens 5 MOI’s ien e bus vienden, dan is der geld zat ien e Grunneger cultuur…)
MOI dus, tot 20 meert!

MOI elkenain, blad veur/van de DAG VAN DE GRUNNEGER TOAL

Moi lu,

Hai is der weer, KREUZE 23! (Ook op webstee www.kreuzekeuze.nl)! Dat blad mag ook wel oetkieken dat e votdoadelk nait veur obesitastax in aanmaarken komt…. Dikste Kreuze tot nou tou, ook mooiste! (Mor dat is de leste sikkom aaltied…) Vetraauwde noamen, mor ook n poar nijen as Joyce Bodewes en Trijnko Pelgrim! Prachteg! Gedichten, verhoalen, toalspul… En n primeur: t Eerste dail van van n ‘Krimi’, schreven deur Jan Huttinga: “De dood van Vera R.”!
Veul leesplezaaier touwìnst!

Kreuze 23, meert 2010, 28 bladzieden dik! Ook te vinden op www.kreuzekeuze.nl

O joa, ook nog even denken aan dizze onnerwaarpen:

1. Dag van de Grunneger Toal op zotterdag 20 meert in d’Archieven in Stad (Cascadeplein). Van 11.00-17.00 uur mit n haile bult aktiviteiten, kiek mor even op www.dagvandegrunnegertoal.nl! Wie van Kreuze binnen doar ook, kiek ons nait over d’kop maank aal dij grode lu van ‘Het Huis van de Groninger Cultuur”, “Mijn eigen bibliotheek’, filmclub Westerkwartier, Boukenkist, Kunstgaang Kaampke, Stichting Peerd, Mien Westerkwartier, Biblionet…….

2. Der is n gedichtenwedstried in Haarstee, Schaarmer en Woudbloem, woar lu dij geern Grunnegers schrieven aan mitdoun kìnnen, oet d’haile pervinzie (en wied doarboeten…) Aal wat je doarveur waiten mouten, staait (of komt) op webstee: www.dorpenfeest.nl, even deurklikken noar ‘culturele commissie’. Winnoar(s) wordt/worden op 1 juni bekend moakt. Wil je doarbie heuren? Schrieven! Sukses!
3. Nog n bericht dat we kregen via ‘Krödde’: Dick Ronner ([ Triona Pers / Uitgeverij Vliedorp ] Havenstraat 2 / 9973 PL  Houwerzijl/ 0595 577 247 / mail@zolderman.nl) wil groag n boukje oetgeven mit gedichten over Groningen. Schreven in t Grunnegers of in t ABN. Insturen kìn veur 30 april! Dick gaait zulf selekteren, wel even der goud veur zitten goan!
4. Dagblad Trouw het ook n mooi projekt aan loop, kiek mor op www.trouw.nl/dichtindebuurt. k Wait nait hou t der nou veur staait, k heb aibels veul aan kop, oppazen dat e mie nait omlopt. (“Kop, woar gaaist mit JB noar tou????”) 
5. Free Westerhoff wil geern olle Grunneger Kerstlaidjes (laifst mit meziek vanzulf). Wel kin hom doaraan helpen? Sturen noar wesgro@home.nl. Bedaankt!

Nou, dat is wel genog veur dizze raais, aan t lézen!
Moi,

Jan Blaauw (tekstred. Kreuze)