Jeebeetjes.nl

t Laip mie vanvummedag even kold over rôgge, kreeg der houndervel van: Pagina 2, In Memoriam Jibbo Poppen…. Dat t nait best ging, dat wos ik. Op 19 maai wazzen hai en zien vraauw Alide bie ons west, konnen we boeten zitten, al was der n frizze wind. Dou kregen we nog es oetgebraid te heuren wat der loos was mit gezondhaid, en dat was nait niks. Kanker, mit oetzaaiens, nait meer te genezen…. Jibbo wol gain chemo, was nog wel in India west, in n kliniek veur wat alternatiefs. Vief weke leden klonk e nog aal positief, mor ook realistisch. Hij wos nait hou laank e nog n beetje ‘kwaliteit van leven’ tot zien beschikken haar. Kuggelde wat, doch mor even mit noar dokter… Wie zollen nog aal n moal noar Emmercompascuum woar e nou woonde mit Alide, zien twaide vraauw. (Jibbo het joaren in Westerlij woond mit zien eerste vraauw Grietje, dij is nog nait ains zoveul joaren leden oet tied kommen, kánker…). Pagina 2, mit t ‘In Memoriam’ van Dagbladhoofdredacteur, gaf mie n beste dreun. Loater, dou TNT-postbode overliedenskoart brochde, kon k der nog nait best mit oet de vouten. Dóód, ik krieg der gain sloek op….

Jibbo Poppen, zo ommenbie 1960, 1961, achter t hoes aan Grintweg in Winschoot)

Jibbo is n neef van mie. Olste zeun van mien taan Rika en oom Jan, baaident al laank leden oet tied kommen. Taan Rika was jongste zus van mien moeke, dochters van Hemmo de Groot en Gepke Hector oet Drijbörg, hoeske aan Ol Diek. Dou wie kinder wazzen, zagen we mekoar geregeld n moal. Zai kwammen op fietse van Sodom noar Midwolle, of wie op fietse van Midwolle noar Grintweg, bie ‘Hessenbril’ laangs. Asmits ook bie taan Zwoantje in Eexte, aan Laangeweg bie t spoor, woar we aaltied oren spitsen deden as der n ‘blaauwe engel’ aan kwam (ook al was e ‘rood’). Loater verwotterde dat contact, elk ging zien aigen gaang en dìn kom je mekoar voak allain mor tegen bie traauwen, begroaven of cremeren, en dat was dou nog nait zo voak. Jibbo kwam op drukkerij bie Van der Veen in Winschoot, zo kreeg e mit ‘Winschoter’ te moaken. Loater kreeg e deur dat schriéven wat veur hom was en, nog belangrieker, lu van drokkerij kregen t ook deur. Zo kwam e veul loater op (zien) stee bie ‘Dagblad” (wil je der meer van waiten, kiek mor op pagina 2 van kraande van vandoage, 26 juni). In zien boan as ‘lezersredacteur’ heb k nog wel n poar moal contact mit hom had. Deur foto’s dij k instuurd haar, mor ook n moal as ‘Lezer van de Week’.
Joaren kreëerden ofstand, benoam dou ollu aalmoal d’ogen sloten haren. Goie beduilens zat, mor ja… Tot w’in maai n ofsproak moaken deden en n poar gezellege uren mit mekoar haren. Joa, wie kommen gaauw…… En nou is t te loat, zo gaait dat en zo mout t aiglieks nait goan. Kin mie wel veur de kop haauwen, mor zölfs doar mout k mit oppazen, kin nait zo veul meer lieden….

Schiere foto, joa, ik stoa doar zulf op, zeuventien joar leden, 1993. k Wait nait ains meer wel dij foto nomen het. Mien bruier Hemmo? Of was der n aner mit zo’n toustel? Nee, denk k nou nait dat ik “notoire drinker” bin, dat is nait zo, ik kin mie nait meten mit de toppers en ook nait mit de middelmoat. Mit anere woorden: dij bierbraauwers worden van mie nait riek…. (Joa, mit dít weer, scheelt t wel n slok…)

Jan B. - Biertje?

Zeuventien joar leden… Haar k ook n poar minne joaren achter mie. Dóch mor weer maauwen opstreupen en dertegen aan… Tot d’ellènne van 2002, 2003, kin mie nog duvels moaken as k doaraan weerom denk. Dou knapde der wat en dat komt nait meer goud, of k nou nog meer pillen slik, dokters inschoakel, roadgevers beluuster, wandelschounen versliet…. Asmits denk k: Aha, JB is vannijs boven Jan en nou zel e heur……
Doar goan we weer, minder as n ezel….. Nou is t doan! Duurt nait zo laank meer, bin k n eerliekse AOW’er en dìn wil k verstandeger wezen as nou. Beter in mien vel, minder gesoes, meer ontspannen. Ofslanken de boudel en voaker “nee” zeggen en nait aaltied “Joa” (want t binnen ja apmoal vrundelke mìnsen dij t apmoal goud mainen…) k Heb t rooie pollood weer veur n dag hoald, lag nog aargens achter in n rommelloa….: As t even kin, gain recepties of zokswat, gain Krödde-Schrieversdag, gain veurleesderij in wat veur toene dìn ook, reünies sloagen ook wel zunder mie  en vergoadern mout ook zo veul meugelk oflopen wezen. Zo, dat lucht op, krieg al weer wat meer oasem… Vroagen bedenken veur theorieronde feestweek? Gaait deur, en “Kreuze” blift ook. Geschiedenis holden we der ook in en wieder: TIED VEUR MIEZULF! (Pardon, veur óns zulf…) Niks doun? Dìn dou k niks! Schriéven?? Dìn goa k schrieven!! Meziek lustern, bouken lezen, fietsen, n endje lopen, op veziede? Doun of nait doun, das de vroag, mor dij beantwoord ik zulf! En op vekaansie goan we dizze raais ook…..
Wat of der van terecht komt? Ofwachten…. (Mit n nije soort “flinkheid” wait je t nooit…)

Ploatje oet t ‘femiliebouk’…. Kwam k inainen tegen: Moeke mit kat op schoot, Jurrie, ons buurjonkje, dernoast. Drok in gesprek, gain oog veur de fotogroaf. Woar t over ging? Kat liekt t nait biezunder te interesseren…. Vrumd. k Wait nait hou dizze poes nuimd wer, k herinner miet t baist hailemoal nait. Gat in t onthold.

Proat tussen old en jong, buurvraauw en buurjong, kat luustert ....

Ook dizze foto zel van ommenbie 1960 weden, Niesoordloane 59, in koamer. Moeke zel wel net weer wat had hebben, gebeurde voaker. Bère in koamer, zaikte, dat mout zai west hebben… Kampioene opereerd worden, van kop tot tonen tou, bie heur hebben ze eerlieks overal in sneden… En asmits tot twij, drij moal tou, zoas dat gedou mit de schildklier. (En toch is ze 96 worden!)  Hier liekt ze al weer hail wat proats te hebben. Lutje Jurrie Diekhoes kwam voaker n moal kieken. Gezellege boudel. Mainsttied kwam zien zuster, Afiena, hom weer opholden; of zien moeke, Annie Diekhoes-Smit, raip even achter thoes vot: “Jurrie!!!” (Of: “Jurjen!!” Zo haide heur pa…) Gerdienen herinner k mie wel en dij plaant zel wel n ‘begeunia’ weden…. Mor dij swaarde kat, nee… Schane! (Wel n schiere foto, bult bliedschop in beeld!)

Krieg wel es van dij PPS’jes toustuurd. k Mout der eerlieks bie zeggen dat k ze nait apmoal bekiek, k smiet z’ook wel votdoadelk vot. Of en tou goa k wel even kieken wat ze mie in postbuzze stopt hebben. Lest ook: NOSTALGIE! k Haar der nog nait noar keken, kreeg k n berichtje van Ben Doedens oet Pekel, mien vrougere schoulkammeroad Beno oet Midwolle. Of k doch even kieken wol, zat n verrazzende foto maank…  Schiere ploatjes, meziekje derbie en joa e, doar kwam inains mien moeke in beeld:

Moeke inneweer mit de wringer, bie de wastobbe

Foto is moakt aan t ènne van de joaren viefteg, achter t hoes, Niesoordlaan 59, in Midwolle. Moeke, zo as ze was, asmits: kop derbie, aan t waark, schoet veur, waske doan moaken. Vringer zat vaaste op zo’n holten ‘bok’, poten kon je  in- en oetklappen. Kon j’aan ain kaande wastobbe derop zetten en aan aner kaant kwam n grode emmer of zokswat, veur dreugdraaide waske. Kon t spul zo aan liene bie toenpad laangs. Twij lienen, aan bovenste grodere stokken, aan onderste lutje spul zo as sokken, buusdouken, onnerboksems….. Lienen kon je aan ziekaande strakker draaien. Zo’n vringer was wel n oetkomst, aans dee moeke t aaltied gewoon mit heur hannen, binnen ze nait beter van worden.. As kind von k dat wel schier waark, dat draaien aan de slinger van de vringer, benoam as t om wat dikker braaien klaaier ging. Stróómde t wotter deroet en je konnen zain loaten dat j’al wat in aarms haren….  En wasgoud ophangen heb k ook wel doan, von k wel lolleg (tot der aine vervelende opmaarkens over moaken ging…) Hou ze aan dij foto van mien moeke kommen binnen veur zo’n PPS? Och, zellen ze wel pikt hebben van weblog of. k Lig der nait wakker van, en mien bruier Hemmo ook nait. Dij het ducht mie foto moakt, haar doch wat eerder n toustel as ik. (Is ook ja twij joar older…)