De veurkaant van d'Eisseshof, ok mooi! Mor die achterkaant... n ploatje!
Zundagnommedag waren ze der weer, de dichters! En zij niet allenneg! Ien e tuun van d’Eisseshof onner de klaank van de torenklok van Nijhoof. Prachteg weer vanzulf, dat haren de lu van t Regiotheater knap regeld! Wij waren veur de wizzegheid mor wat aan e vroege kaant kommen, de techniekers waren nog met t geluud bezeg, konden we alvast genieten van t ienzingen van Piet Buist en Boukje van der Heide, en van de viool van Esther Goedhart. n Bult teksten van Reinder Hiemstra, de spiegelploat is goed promoot! Der kwam aal meer publiek, mien benen begonnen wat te zwabbern. Vrumd, dat heb ik aans nooit…. Geert Zijlstra, ‘Mister Westerkwartier’, was dizze middag de aanmekoarproater, de verbiendende schoakel, dat kan e goed! Eerste dichter: Koos van der Goot, en dat waren der twee teglieks! Knap, veurlezen en dan ok meneuvels met n hoed… Coby Poelman-Duisterwinkel was doarnoa aan bod, n smoakmoaker, tot ien Almere! Ik heb ok perbeerd wat schriefsels veur te droagen en der is niemand votlopen! En noa mij kwam Willem Tjebbe Oostenbrink de winnoar van de Pervinzioale Schriefwedstried 2009, n groot talent! Loater hebben we nog n rondje gedichten geven, we waren doar ja toch, ien e prachtege tuun van d’Eisseshof! Wel der ok was? Melle Hylkema, aaltied n belevenis om noar hem te luustern! Eerst n verhoal, loater wat gedichten, n compleet theoaterstuk, hij zal nog wel spierpien hebben ducht me… En tussendeur prachtege verskes, zongen en speuld deur Piet Buist en zien wichter. Ik heb me gien seconde verveeld en t aner publiek von t ok n schitternde middag. Temennent, dat hebben ze zeid! (En dat leuf ik groag!)
Gedichten, meziek, wat drinkerij, t geluud van swaarte liesters, pieken, de torenklok… Wat het n Westerkwartierder op zo’n moment nog meer neudeg om zuk blied te vulen? Alle ‘Dichters-ien-e-tuun-metwaarkers’: Geweldeg bedaankt! (En vergeet niet om even te kieken op e webstee van ‘Mien Westerkwartier”!!! t Zigt der geweldeg uut! www.mienwesterkwartier.nl)
Schane, ik heb gien ploatjes… As ik veurlezen ‘moet’, kan ik wieder niks aan e kop hebben. Ik moet der nog mor es hèn om wat foto’s te moaken. Hier dan mor n gedicht, as ofscheid:
SPRUTTERS
De sprutter boven mien kop
op e hörn van e dakgeut, speult
met geluden. Wat beduden
aal die snoavelmeneuvels?
Kleppern, hoesten, proesten,
piepen? Woarom kan ik niet
begriepen wat op dierlek
nivo moakt wordt? Lees k
stoere boeken van Mulisch,
geniet van e Grunneger Biebel
en loat t jubellied van e liester
mij bilder achter met t gevuul
van pienlek menselk tekört?
