t Jonkje het t veurmekoar, t gijt allenneg op stap, veur t eerst, noa dik zesteg joar! t Zol tied worden… t Jonkje wiet nog niet zo goed wat e met zien rechterhaand doen moet, doar hiel e ja aaltied zien pabbes haand met vast. Hij kiekt noar de vief vingers, stekt de haand ien e lucht, swaait even, moakt n vuust… Dan stopt e rezeluut zien haand ien e buuts! Hij lopt laangs t poadje met kleurege bloemen, zigt ien e volgende stroat n golden regen. t Jonkje gijt onner de boom stoan en wacht, en wacht, en wacht…. Mor nee e, t regent niet, gien gold komt deel, de bloemkes swaaien even deur n zuchtje wiend, mor wieder… niks!
Gouden regen, Nieuwstraat, mei 2009
Even loater komt e bien n kruuspunt. Der stoan apmoal mensen aan e kaant, ze kieken noar de stroat. As e stoefbij is, zigt e ieniens n bult kleuren hiel snel dichterbij kommen. De kleuren vliegen de bocht om, op twee wielen, elkenien op twee wielen, zo dicht meugelk bij mekoar. Nou, denkt t jonkje, wat roar… Hebben ze de hiele stroat veur zuk allenneg en dan nog zitten ze hoast bij mekoar op e fiets, wat onneuzel!
t Jonkje viendt dat t veuls te vlug gijt, dat fietsen. Gien tied om wat te zien, wat n gejakker… Hij lopt de stroat ien woar schienboarliek wat te doen is; der kan gien auto laangs en ok gien motor, of trekker, of brommer. En gewone fietsen gijt nog, mor die holden ze aan e haand vast. Nou, hij holdt mooi zien haand ien e buuts, hij het ok ja gien fiets! Ze holden hier wel van kamperen, denkt e, wat n tenten! Mor goed dat t zuk schier weer is, en dat der gien haarde wiend stijt, aans was de ramp niet te overzien. Dat sloapen ien e tenten, dat kan e wel vergeten, der liggen ja apmoal spullen op e plaanken en der stoan mensen bij die net doen of zij doar niet de schuld van hebben willen, wat n onneuzele haalzen. Of en toe ruilen ze wat met mekoar, de ien kriegt wat ien n taske, d’aander stopt n stukje pepier ien n aner taske, veul kleiner. t Jonkje komt bij n rond ding met swaaiende bakjes woar je op zitten kunnen, mor dan moet je ok eerst weer n pepiertje hebben en dan moet e zien haand wis en vast ok uut e buuts hoalen, om zuk vast te holden…
Draaimolen Palunoplein 2009
Gien denken aan, komt niks van ien. Duzelg worden, dat kan e zulf wel doen. Hij draait vief, zes, zeuven moal hiel snel ien t rond en vaalt dan hoast onnersteboven. Lu kieken apmoal noar hum, hij heurt iemand zeggen dat der aal vroeger op e dag alcohol dronken wordt, de plietsie moet der beter op toezien. Net of de plietsie niks beters te doen het… t Jonkje gijt gauw wieder, nog meer versierde tenten veurbij. Hij ziet mensen ien prachtege kleren, mor ok lu met n buusdoek om e haals. Apmoal verkoldens? Kiender die stoan te huppeln bij n bezinepomp, en wat is dat doar? n Vrachtwoagen met manlu derien, ok al weer zo dicht bij mekoar… Wat n verstaand doch, hè! Zun die schient, krupen die manlu onner n vrachtwoagendak stoefbij mekoar en stoan ze doar te happen noar lucht, net n groep benauwde goldvizzen ien blauwe kleren… En dan hebben ze n verduveld mooi kleed achter ien e woagen hangen en dan goan ze doar apmoal veúr stoan, kun je van dat hiele kleed sikkom niks zien… O, ze moaken ok geluud en woarom stijt die iene vrouw doar aal te swaaien veur de auto??? Die manlu trekken zuk der ja niks van aan, goan gewoon deur met happen….
Shantykoor Allemanseindje, braderie 2009
t Jonkje het eerst genoeg zien, op eigen bienen, met e haand ien e buuts. Hij wil noar huus. Dan ziet e nog zo wat onbegriepelks. n Wegwiezer die ze uut t gras trokken hebben, op e grond smeten…
Vrije wil, stormschade of vandalisme?
Hier snapt e hielemoal niks van, krigt e ok hoast gien tied veur… Hij moet as de bliksem aan e kaant springen, wordt sikkom onnersteboven reden deur zo’n vierwieloverdriever. Noar huus wil e, noar huus, noar huus! Hij het niet iens deur dat e zien rechterhaand niet meer ien e buuts het. Zol e zuk dan doch handhoaven kunnen ien dizze vrumde mensenwereld, de kommende joaren zullen t leren…
©janblaauw, mei 2009
Wieleromloop Middag Humsterland 2009
