Jeebeetjes.nl

Roadsel: wat gaait wit joen mond in en komt der rood weeroet, noa een luddek haalf uurtje?
Twij goasjes dij koezenropper Kees Jan Berkhout op bloudende goaten vlijde, noadat e mien leste verstandskoeze (linksboven) en  baauwvalen van eer omkommen koezen linksonder kundeg deroetropt het.  Hai is zulfs nog mit scheer en droad inneweer west, nou, mién laifhebberij is t nait….. Gedou en dìn ook nog aal dat bloud opzoegen, tussentied. Mor eerlieks woar, Berkhout het n knap stokje waark leverd, petje derveur of!
Nou hoop ik nait dat mien verstaand in dij leste koeze zat, dìn wordt der nait beter op veur wereld om mie tou…. Of juust wèl??? Binnen hier ook weer veur- en tegenstanders, mor moak joe gain zörgen, ik loat gain roambiljetten drokken en stokken in kraande huif j’ook nait baange veur te weden. Enkeld hier op dizze moderne zaipkiste, k mout t ja even kwiet. Verdoven trekt der nou langzoamaan oet, k heb nog wel n dikke tonge en waange. Dut nait echt zeer, vaalt mie mit. Dat zee Berkhout ook al, k leuf nait dast er veul last van hebben zelst, dij man kìn in toukomst kieken!
t Is net of mien schaive mond (bèk mog k nooit zeggen van mien moeke, wie binnen goud grootbrocht) op slöt zit. Mien vraauw belde ook al votdoadelk dou k thoes was, beetje mitleven kin gain kwoad. Mor ja, ik kon sikkom gainains joa of nee zeggen…..
Of k der tegenaan zain heb? Joa, aaltied wel wat, al haar k gain bibberoatsies. Mor dat huif je nait aan elkenain te vertellen, gait gain mìns wat aan. t Is beurd, proaten we nait meer over.

Ploatje: Wikipedia

Diezeg boetendeure. k Bin allain mor even waarm worden deur swaartwidde kat van buren van onze buren achternoa te vlaigen, kreng zat weer ais achter “mien” muskes aan. t Baist vuilt aal as ik deraan kom. Kropt e op schut bie hege laangs, laagt e mie oet boven op hok.
Volgens Dagblad was ik traauwens doch al kwoad. Spinniedeg! Woarom? Om dat gebloas van dij omhoogvalen knuppel oet dat gruine aikenholt, dij minister Kamille E. Bloast zo even de Zuderzeeliene of, het e wéken, wat zeg ik, moánden op oefend! Fffffttttt! Votdermit! Weg snelle verbindens mit dij arregatse Randstad. Nou, dat binnen gain lozen dij doar veur bobo’s deurgoan. Waiten nog aaltied nait dat ook n snelle traain twij kaanten opridt. Nait allenneg óns belaang, ook in heúr belang! Joa, zegt Kamille, t kin nait oet, mout n bult eerdgasgeld bie. En dou kwam e as n mishottjede Sunterkloas mit n puut mit twij miljard uro’s teveurschien! Doar zol aiglieks 2,3 miljard in zitten mouten, wel het doar nou weer mit zien tengels aanzeten? Doar kin k vergreld van worden! 
En dìn hemmen ze t ook mor aal over herindailen van gemainten. Aal groder en groder, t is nou al nait meer te belopen of te befietsen. As ze nije inwoners gemainte zain loaten willen, huren ze n buzze. Nog even en ze hemmen nije superbus van dij roemtevoarder, kom, hou hait e, Wokko Ubbels,  vanneudens om supergemainte te “showen”.
En nou het NDC, Dagbladcombinoatsie, n radiozender kocht! Wotterstad FM in Snits! Bin je mooi kloar mit. Zollen ze nou bie Radio Noord n kraant oetgeven goan? Dagblad van Groot Wotterlaand? Van Snits tot Blaauwe Stad tou?
 Geert Teis is weer thoes op Knoal. Ston der mor n beetje veur Piet Snöt in Stadsschouwburg. (n Enkeld dij hom zag: “Verdultjeme, Geert Teis, wie is dat nou weer, nooit niet van geheurd…”) Nou kinnen Knoalsters hom veurbielopen as ze kultuur happen in heur theoater: “A, mien jong, bist weerom? Moi!”)
k Heb kraant ook nog even opensloagen. Vot weer toudoan! Keek mie doar dij weerman oet Termunten mie aan mit zien stroalende blik, in viefdaileg pak mit strikke….  k Wer der kold van. Of k nog kwoad bin? Op dij “randstedelijke arrogantie?” A nee jong! Wie zellen heur wel leren! Wie kaizen apmoal Ede Stoal in de Top2000 van Radio 2! Wel t leste laagt….

foto boven: swaartwidde kat noabers - ©janblaauw, 2007
foto onder: petret G.W.Spitzen/Geert Teis - nl.Wikipedia.org

Verjoardag van mien pa, vandoage, 13 november. As t beleefd haar, was e 103 worden. Mor ja, hai kwam al in 1977 oet tied, in t zaikenhoes van Hoogeveen, 72 joar. Veur mie te vroug, wie kregen net wat beter kontakt mit ons baaident. As je jong bìnnen, heb je mainsttied genog aan joen aigen om mit bezeg te weden. k Denk nog voak n moal aan hom, bin bliede mit dij ploatjes in mien onthold. Pa op fietse noar “De Toekomst”, woar e joaren waarkt het. (k Heb voak zien flezze mit kolle thee en melk kloarmoakt). Zien verhoalen over de nait zo laange tied op dörsmesien, bie boeren laangs. Hail kört was e ook nog in Jipsingboertange, bie n waarklozenprojekt. Doar pruit e nait geern over, haar e minne herinnerns aan. (Stokloper bie ons in stroade mog e allain om dij reden al nait…) Pa op t laand, hai haar n beste lap huurd van Rigte Braauwer, boer in t Oostènne. Wie gongen wel ains mit, eerabbels poten. As bonen kloar wazzen, brocht pa ze mit koare noar hoes, wie aan t plokken, streupen, oetdoppen….. En snibbeln mit dat ding dat je op raand van keukentoavel vastzetten deden. As MOVV thoes voetbalde, was pa der sikkom aaltied, en ik ook. As ze oet speulden, wörden fietsen pakt, gongen we noar Termunten of noar ain van de polders. (k Vuil mien zere kont nog….. En baange veur t wotter woar je over mozzen,  veur  t onweer en veur dij kwoaie hond op Goldhoorn).
Pa het op t èn nait veul wil had van zien veule joaren op “Toekomst”. Dou boudel nekke omdraaid wur deur boeren/aigenoars dij gain geld over haren veur vernijen, lag mien pa in t zaikenhoes, holpen aan bloudvoaten in baaide bainen. Veur hom gain kevörtje mit n poar ekstroa senten, hai kreeg ja zaikengeld, mos e zok mor mit redden.
Nait veul loater binnen d’ollu noar Hoogeveen goan, woonde dou mien oldste bruier mit zien vraauw en dochters. Tiedelk in n flat, al gaauw in n mooi bejoardenhoeske aan de Draco. Hemmen ze nog n poar schiere joaren had. Ik was n moal mit mien pa bie n oefenwedstried van Ajax tegen Hoogeveen, dou e nait goud wör. Kop over haals noar t Bethesda-zaikenhoes. Eerst leek e nog weer op te knappen, kon noar hoes, poar joar kaalm aan, mor op den duur mishottjede t. Hai het t nog n moal perbaaierd leste moal in t zaikenhoes, t lopen, t wol nait meer, motortje stoekde te slim. Vattien september 1977, op n woensdag, kwam t tillefoontje. Wie der hìn in onze rooie Eend, was e al overleden. Zo kìn t goan, zo ging t, nou al weer daarteg joar leden.

foto boven: Pa in toene bie Hemmo in Winsum (joaren eind zesteg? Begun zeuventeg?)
foto midden: Pa en ikzulf op baanke bie Draco 60 in Hoogeveen, om en bie 1975, 1976
foto onder: Pa op iesboane van Eigen Kracht in Midwolle, joaren viefteg

“Wat dust mit aal dij ploatjes?”
As n gek bin ik aan t foto’s moaken: Raansoele in hege bie noabers, Harko mit woagentje
achter fiets:
Jente aan overkaant mit Pien, Heleens hond; kinder op nije speulspul bie hörn van Oosterweg, Ida mit heur moe in auto, sikkom joareg (nee, auto nait, nee, heur moe ook nait, Ida zulf!); grafstainen op kerkhof, gelukszuikers op voetbalveld bie Dörpsstee,  zokswat. En dìn heb ik Feike nog vergeten, aan auto poetsen, mit wotter aan t graimen.
“Joa. mor wat wilst mit aal dij ploatjes?”
Wat wilk dermit….. Veur mie ist nait veul aans as karakter van dit dörp op steert trappen, t wézen van Noordhörn in beeld kriegen, grode dingen, klaaine dingen. Was dat, Noordhörn? Dat is….. zo’n soort gevuil…..
“En, lukt die dat?”
Nee, mainsttied nait. Kom schier in de buurt, mor t is t voak net nait. Denkst: Ja!!!!! Kikst dernoar: Nou, nee, wéér nait……. Mor k geef nait op, k goa der mit deur, ook al liekt t op vrouger dou k as kind op zuik gong noar pot mit gold aan t ènne van regenboge. Ainmoal komt der n dag……..

fotocollectie Blaauw 

Minne doagen… Guster noar t UMCG (was aaltied AZG) in Stad west, Radiologie, nou, veul meziek zat der nait in. In mie ook nait. Net zo bemieterd as wat. Wie zollen mit traain, mor n goie vrundin het ons mor gaauw mit heur Polootje noar Stad reden, nee, k heb auto nait beslìnterd. Woar dat van kwam? Messchain wel van dat X-Praep-spul dat ik dag van te veuren opdrinken mos, of van nait eten, boudel binnenin mos ja opschoond worden. k Zel wel nait aal te blied keken hemmen, vraauw aan boalie keek mie al zo meeliedeg aan. “Wachtkoamer 3, ènne van gaang rechts”. Wie der hìn. Nou, nait mooiste stee van t UMCG, duustere boudel. k Was wel mooi vlot aan beurt: “Meneer Blaauw?” (Doar beduild’e mié mit…). Dou begon t feest, k zel joe de rest mor bespoaren. Haarde baanke, slaange in de poeperd (dee mie vrumd genog aan kindertied denken dou Bertje Renken kikkers aan t opbloazen was…), k heb der levend ofbrocht. Verdold, ze konnen nóg nait haile dikke daarm in beeld kriegen. Wat ik wel veur n rioleren heb….  Schiere weesees in t UMCG, mor goud ook. Slenternd binnen we weeromgoan noar staatsion, traain weer ais te loat. Bult volk, mor mien vraauw was der jenteg bie om n zitstee te verovern (nee, gain bloudneuzen of blaauwe plekken). Vrundin mit heur Polootje het ons brogge over brocht, thoés. Laankoet, biekommen. Minne doagen…. (En dìn heb k t nait ains over Rita, rondweg en Cordis in Roden had….)