Jeebeetjes.nl

GEERT 30

“Rusteg, Riekje, rusteg!”
Geert sust zien noaberske schuun achter, Riekje Drewel (mor elkenien kent heur as Riekje Revel).
“Hoe rusteg? Wat rusteg? Ik mag doch wis en vast wel veur mien overtugen uutkommen? Moet ik dan aaltied mien kop holden? Mag ik dan nooit zeggen woar t op stijt? Wat denkt jim nou eigelks wel? De hiele wereld stijt te schudden op zien grondvesten en ik mag der niks van zeggen? Ien wat veur tied leven we dan wel?”
Geert stijt buten bij t dokterssentrum, hij het krekt n poar lege deuskes ien e emmer valen loaten, veurroad van dat inneem- en opsmeerspul moet weer aanvuld worden. Riekje liep hum hoast onnersteboven, zo agiteerd as dat menske is….
“Aal dat gedoe op de televizie ok! Apmoal BB, geroas en geknetter, Bos en Balkenende, wat n miserie, schele kopzeerte krieg k dervan! En mien man dut der dan nog n schepke bovenop. Joa, zegt e, n goie eerste minister het mor ien lettergreep van neuden, kiek mor noar t vleden: Beel, Drees, Cals, Kok, dat waren nog iens kerels! En nou? Balkenende… krekt of ze n hiel partijprogrammoa ien n noam stopt hemmen. O man, en dan wor ik doch zo duvels… Kom me niet aan JP, die het al genoeg miserie met zien voet had. Bos….Brrr….Kappen die handel!”
Riekje wil noar binnen, mor komt votdoadelk weerom.
“n Zooitje, die poletiek, hier ien e gemiente ok! Net zo goed, of nog minder! Zegt die Moes of Kroes van t Zonnehuus dat wat Balkenende wil, dat kan niet. Loat die man zuk mor bij zien pasjenten en de nijbouw holden, doar het e de handen ja vol aan. Ik zeg die, Geert Moatjes, wat Balkenende niet kan, is nog nooit gebeurd, doe doar mor denken om. En n bietje meer respekt geern, doar het vrouw Steursma uut Visvliet geliek aan, bietje meer respekt. Veur die is t nog aaltied menéér Balkenende en börgemeester Fennema, niks gien Kor, of super Sietse, nee, menéér De Vries! En zeg dat ok mor tegen Bé, ast hem zigst!”
Riekje ropt woest de deur open en botst kop-over-haals tegen n manskerel op, ze haar m glad niet zien. Ze stutert sikkom weerom ien e richten van Geert, die nog op t zelfde stee stijt.
“O gottegot, ok dat nog! Loop ik doar zo mor ien e aarms van Hinnerk Zuudhof, mor hoal die mor niks ien e kop, heur! Nou, goa ies wat opzied, k moet opschieten!”
Hinnerk doet stilzwiegend n stap aan e kant en gijt noast Geert stoan.
“Wat het dié?”
“Och”, zegt Geert, “de verkiezens waarken heur op e zenen, heur idool JP komt n bietje klem te zitten en doar kan ze niet best tegen. Schele kopzeerte krigt ze dervan.”
Hinnerk schudkopt.
“Balkenende? Bos? Rutte? En die widde Wilde? Man, plak ze achter t behang, doar kunnen ze niet veul kwoad. Riekje moet t niet te wied vot zuken. O, doar komt ze al weer aan, nog aal drij doagen maal weer…”
Riekje zwiept de deur open en störmt op heur fiets of.
“Ién ding zal k jullie nog zeggen, t is mor goed dat ze hier bij de PvandenA n Hannes Brinker hebben die zien vinger ien e diek stopt, wordt der gien goed geld noar kwoad geld smeten om zo’n akwadinges onner t kenoal te moaken. Die Jansmoa uut Zuudhörn kriegt nog wel ies n standbeeld op t Holtplein. Goed dat e tegenstemd het, k moet der niet aan denken, n weg onder t kenoal deur, je kunnen wel verzupen as rötten. En nou goa k noar huus!”
Riekje wurmt zuk langs n buske die asosjoal parkeerd stijt.
De mannen kieken heur noa. Hinnerk is t eerst weer bij zien positieven.
“Mooi menske, die Riekje. Het wel gevuul veur humor, al wiet ze t zelf woarschienlek niet. Hest de kranten n bietje bijholden? Stoan ok van die prachtege dingen ien.
“Boer vangt bot in strijd rond Aduard”
Hinnerk kniest. “t Zeewotter is wied opdrongen! Votdoadelk bennen ok de makrelen veur t griepen. Of dizze: “School in Nuis slokt geld Marum op”. Zigst al veur die zeker? Endelk n school die zukzelf wiet te redden. En op e Leek is t al hielemoal mis, doar serveert de börgmeester de kovvie, vrijwillegerswaark numen ze dat. Deurzichteger kan t niet, Balkenende bij t Rooie Kruus, Bos ien n tehuus, loat ze doar mor blieven. Kom, t is moandagmörgen, k moet nog even kloagen op t Zuudhörner gemientehuus. Moi!”
Geert het n dreuge keel kregen van t niks zeggen en woar is dat verd… fietssleudeltje nou weer? (30)

Bé
Het Westerkwartier 8/11/2006
Bewaarkt: oktober 2007