Bedreigde huizen Langestraat - dreiging opgeheven?
©janblaauw, maart2007
Nee, vlag heb ik niet uutstoken. Ik ben hartstikke verkoldens en dan zal ik me doar n longontsteken op e haals hoalen met die drijkleur. En woarveur? Omdat GS aal wat verstandeger lieken noa heur zoveulste acroboatische toer? Bij Baalk legde Henk Bleker (dat is de Deputeerde van verkeer, nee, niet van verkeerd…) uut dat t Kleezje van Pervinzie Grunnen tot de conclusie kommen was dat t stoefbij dat mooie dörp(ke) Noordhörn infrastructureel te gek wer en dat ze nou doch mor met n grode boog om t dörp hèn willen, ien goed overleg met boeren benoam, die kunnen stukken laand uutwizzeln. De nije 355 wordt dan niet verdiept mor verleegd aanlegd, vaalt e niet zo op. En der wordt perbeerd om d’olle dooie Riet tot leven te brengen, met rietkroagen en al. (Zeg nou nooit weer dat doar bij de pervinzie gien kreatieve geesten rondlopen…) Vanzulf bennen de lu van t Rietdal niet bliede en vanzulf bennen lu van Verenigd Noordhörn dat wel. “Jantje lacht, Jantje huilt…” Dat Bouwien Sebens stroalde, hielendal terecht. Zij kan doar wonen blieven, niks gien sloperij of verhuusderij. Net zo ol boer Heemstra, goeie medisien veur zien knibbels en huppen. Dat ze bij TV Noord nou weer begonnen te soezen over t verlies van n netuurgebied, dat zal wel n tekört aan journalistieke deskundegheid wezen, ducht me. “Goa dan ies kieken”, denk ik dan, “goa dan es goéd kieken en niet even ien e vlucht”.
Nee, eerlieks bliede ben ik niet, aal meer lewaai en licht is aan mij niet besteed, mor veur mij is dit van twij kwoaden wel de minst slechte. En nou deruut hoalen wat der ien zit. t Opknappen van de verbienden tussen Noord- en Zuudhörn heurt doar wis en vast bij, ok zunder dat tunnelgedoe.
Nou eerst mor aandacht bij de Sunterkloastoestanden en de Kerstmenumeneuvels. Op 10 jannewoarie kan der dan weer wieder bakkeleid worden. Zo, weer wat nadde buusdoeken ien e wasmand, ik snötter mor deur. (Nee, dat komt nou ies niét deur die rondwegsores ien schaar van Zuderzeelien)
.
foto: open weilandschap ten oosten van Noordhorn - ©janblaauw, 2007
