GEERT 43
Geert het zien dag niet. Der komt hum niks uut e hannen en alles wat der wel uutkomt, haar der beter ien blieven kund. Soepkom, die over de schuddelbaank dendert, weer n schilver der of. Luzivèr die middendeur brekt as e net braandt, sukerpuut die niet om liek wil as e t spul ien e bus doen wil….
En t is niet ies vrijdag de dattiende…..
Zien vrouw is der op of kommen, ze schudkopt wat. t Ienege wat ze zeit: “Knovveljanus…”
Geert is mor op e fiets stapt, even n ommetje, wied vot van aal die gevoaren die je bedreigen ien huusholden en zukswat.
Om de Noord dan mor, t is mooi weer, zun derbij, n winter die gien winter hieten mag. Eigelks n winter van niks, mor ja, as e doar ok nog zien hannen noar uutstekt….
Geert komt ien Olhoof uut, gijt rechtsof, kan e noar Den Ham en zo weer langs e Hamsterbörg noar huus. Opìns veraltereert e, as der op e venster rovveld wordt. Man, t is krekt of Crescendo veurbij komt met dreuge kettens en ale ienstermenten stemmend. Geert knipt ien e remmen en zigt n verniend swaaiende aarm, die heurt bij Lammert Loos, beter bekend as Lammert Stiefkop. Geert kent Lammert, die uut Oost-Grunnen komt, al hiel wat joaren en het wel ies n knienenakkefietje met hum had. Doch n beste man, hij het ok al ies n baand lapt veur Geert. Hij stapt met e fiets aan e haand achterom, woar t klompgeklös vot komt.
“Moi Geert, kop kovvie?”
“Nou”, zeit Geert, die ien e refleks op zien allozie kikt, ‘doar zeg ik gien nee tegen, hest t kloar? k Moet ja ok nog weerom.”
Lammert schupt zien klompen weer uut en stommelt noar de koamer met Geert ien zien kielwotter. Kopkes stoan al op e swilk, Lammert slagt vol. Schuuft suker en melk ien e richten van Geert die ien e aarmstoel deel valen is.
“En Geert Moatjes, bist n beetje biebleven? Hest dat börgmeesterpromootsieverhoal ook lezen in dat zoveulste streekblad? 
t Is mie doch wat, zo’n eerste börger dij op Schiermonnikoog de tango daanst op e keukentoavel, wat ze doar al nait doun om toeristen te trekken… En doar binnen ze in Zuudhörn achter kommen en dou hemmen ze hom n balzoal beloofd en hup, Fennemoa noar dat Daanpronkjewail aan de Hooiweg. Waist nou wis en vast ook wel, woarom dat der nog n verdaipen op zet wordt, op dat gebaauw… Hest dat nije bouk “Stout” ook al wel even deurbloaderd zeker. Nou, Fennemoa zien stoutste dreum is dat e ooit nog ains de tango daansen kìn mit Maxima, en dat dou je nait op n keukentoavel… Loat Fennemoa mor schoeven, n bèste börgmeester. Welke gemainten stoan in de Top Vieve ast om d’opbrengsten van klektes en aner oploperij gait? Juust, Schier op kop en doar stoefbie Zuudhörn. Brengt Fennemoa allure mit of nait?”
Geert holdt wieselk zien mond, hij het krekt n haalve Merietje op e tong, krummels kommen ien e buurt van t verkeerde keelgat. Even koggeln, ok weer regeld.
“Joa man, n baarg zunneg nijs in onze gemainte. Índelk zetten ze nou de scholders onder t overdekte zwembad, wetholder Wiersmoa veurop. Nou liekt dat n beetje n hiepenkriet dij wel de sjarrelstoon daansen kìn op n theebred, mor hai het wel wat in de maauwen! En hai wil geern dat we t soámen doun, t zol tied worden. En t mooiste is dat verhoal over Didy en Jan Stainhoes! 
Baarg mìnsen vonnen Jan mor n bloaze doudestieds, op t voetbalveld, in zien swaart scheidsrechterspakje. Wus mit zien handen gain road en zien bek gain moat. Mor noú: superklasse! Knap waark doar in Oafrikoa, k neem mien pedde daip of! Net zo as bie dij mìnsen dij zo’n buzze vol Tsjernobylkinder noar Noordhörn hoalen. Prachteg!”
Geert nikt allent mor, heurt steertklok twaalm sloagen en komt ien t enne.
“Bedankt, kom ok ies onze kaant uut, Lammert!”
Op e fiets denkt e aal mor weer aan Oafrikoa en Tsjernobyl. En aan n beschoadegde soepkom, die de tango daanst op e schuddelbaank.
Bé
Het Westerkwartier – 21/2/2007
Bewaarkt: feberwoarie 2008
foto landschap ten noorden van de Jensemaweg tussen Noordhorn en Oldehove: Jan Blaauw, 2007
foto burgemeester Fennema: fragment van foto in Het Westerkwartier 10/01/2007 - Roelof Stroetinga
foto Didy en Jan Steenhuis: bewerking foto Dagblad v/h Noorden 1702/2007 - Omke Oudeman
