Jeebeetjes.nl

“Gién rondweg hier….”  ©janblaauw, 25 april 2008

“Hest der verstand van? Hest der nou eerlieks woar verstand van??!”
“Woárvan?”
“Van dat gejeremeneuzel over die nije weg, van dat driekwart rondje noord of haalf rondje zuud, mor dan wel onder de grond deur…”
“Wat is der dan onder de grond?”
“Wat, doe niet zo onneuzel! Leest jim wel ies n kraant? t Dagblad van t Noorden bevöbbeld?”
“Ja, doar zeit jim wat…. t Dagblad van t Noorden? Is der dan ok n Dagblad van t Zuden? Elke rondweg zien eigen dagblad?”
“Nee, kaalfmozes, vanzölf niet! Allewel…. Woensdag wer de rondweg noord ofstemd ien e Pervinzioale Stoaten, bliksemsnogantoe.. Dunderdag vroeg op, Dagblad hartstikke loat en wat stijt der ien over die allesbeslissende Stoatenbijienkomst? n Poar verdwoalde regeltjes op t veurblad en aans niks, nul komma nul! Gien wonder dat der mor enkele abbenees meer bennen ien Noordhörn. Schrieven ze de volgende dag dat die enkele abbenees verkeerde kraant kregen hebben, nou, as dat gien toeval is…”
“Tja, der bennen schienboarliek goeie kraanten en verkeerde kraanten, en die jonge helden mor runnen om aal dat bedrukte pepier ien e brievenbuzzen te proppen. Mor jim kon doch ok wel even kieken op tinternet?”
“Joa, man, heb k ja doan, heb k ja doan…. Eerst bij de webstee van de Pervinzie, die is nog niet wieder as Bleker zien rondwegveurstel. Mooie webstee, prachtege ploatjes van aal die lu die doar ien e Stoaten gewichteg doen, mor beetje aktueel? Vergeet t mor! Nou, ik vergreld vanzölf! Aal die pertijen en pertijtjes aanklikt.”
“Wat??! Aal die pertijen verklikt? Vaalt mij van jim tegen, haar ik niet achter jim zöcht..”
“Nee, man, áánklikt! Met de muus! Eerst de Pvda, die ston veuraan, dat schient zo te heuren ien Grunnen. Nou, die lu bennen hielemoal niet aktueel. Die veuraanloper, die Moorlag, die is met zien weblog nog mor ien april 2007…… Geleuf mij nou mor, ien 2009 komt e met t verhoal dat e zuk ien april 2008 misrekend het, mor ja, dan runnen de hoazen al laang de aandre kaant op. CDA? Doar hebben ze nog nooit van n rondweg heurd! SP???? Rondweg???? Eh, hiet die meschien “Acantus”? Nee? Nou, moakt niks uut, tégen! VVD? Notietsie over de rondweg? Niks van te zien. Aha, doar is d’eerste: Greun Links het n bericht van de dag, das teminnent wát. D66??? Die loopt nog meer achter as die Moorlagmasjinerie. Partij van het Noorden? Joa, die wol n rufferendem, dat is wel wat nijmoods, mor of je dat over t kenoal leggen kunnen, k geleuf der niks van. Die Partij veur de Dieren, dié haar n degelk begunaprilbericht, tégen de noorderrondweg mor mit reden. Nou, dat ist, al ist niet veul.”
“Gienent vergeten?”
“Nee. t Is mij wel wat, vandoag stijt ien t Dagblad dat der zulfs ién Noordhörner is die n aandere Noordhörner niet meer groét! Zo wied is t al kommen! Nee, hier moet nou ies steveg deurpakt worden. As t meugelk is om Noordhorn Zuud te verinneweren en n laange fluustertunnel onder de Langestroat deur te leggen, dan kan die ok onder t kenoal deur, vertel mij wat. En aans de brug mor ies n poar weken kroaken, is ok beter veur de Buurtsuper en Jikky’s goaren en band. Mor ja, dat zal dan ok wel weer ien e verkeerde kraant kommen….”

Bé

Provinciale Staten Groningen 2008
www.provinciegroningen.nl