Man, vrouw, kiender! Dat is me wat doar ien Zuudhörn, de rek is deruut, de finansjele rek. t Zal je mor gebeuren. Heb je t as grootske gemiente ien t Westerketier niet makkelk je boksem op te holden, is de rek deruut! Doar zakt je…. Dat wil k mor zeggen, rook je n male segoar. En as de rek ok nog uut e piepen is, ben je hielendal onkloar, is de ramp niet te overzien! Dan mag t met de sosjoale, en de ekonomische en de godsdienstege rek nog wel goed zitten, de finansjele rek is noar de barrebiesies en al die mooie plannen kun je zo ien e vriezer schuven.
Wèl dat zegt, dat de rek deruut is? Doar boor ik mien biezundere bronnen veur aan en bloader ik, om jim op t onmizze been te zetten, ok asmits ien t Dagblad van het Noorden. Dat blad wil nog wel ies de spieker op e kop sloagen, al batsen ze zuk ok voak n moal op e eigen duum. Wetholder Sietze de Vries het de veujoarsnota op n bredje aanboden aan e road met t miest beknepen gezicht dat e ien huus haar. Ze goan doar ien t gemientehuus de kommende joaren ekstroa streng letten op wat der uutgeven wordt. t Is oflopen met t gesunterkloas, de bomen gruien ok ien Zuudhörn al lang niet meer tot ien e hemel (kiek mor op t perkeerplein bij dat Daanding). 
Der komt wel n vierde verdiepen op t gemientehuus, mor dat is allenneg om de sluten van de knipkes te optimaliseren, niks gien balzoal veur danslustege burgemeesters. Pen van n amtenoar leeg? Niet zo mor n nije ophoalen! Joa, bij de Rabobank, zo’n rekloameding, en aans wordt der mor ies n dag niét schreven, doar zal ok ja niemand eerlieks van wakker liggen. Ze hebben t uutrekend dat centroale ienkoop tonnen scheelt. Nou zal der nog eerst even n stuurkemizzie kommen moeten, köst mor 10.000 euro, om noa te goan woar t beste ienkoopcentrum ligt…
En vanzulf, de iénwoners moeten apmoal n stukje rek ienlevern, de ozb gijt omhoog, Zuudhörn is al veuls te laank de goedkoopste gemiente ien de pervinzie en dat liekt nargenswoar noar. Burgers kunnen best wat smaller ien e heupen worden, as de gemiente mor op gewicht blift. Wetholder De Vries (zeg nooit meer “What’s in a name!”) wil nog wel dat der wat aan e wegen vertimmerd wordt, benoam de roetes die burgemeesters, wetholders en roadsleden rieden moeten, mor niet alles wordt gladstreken en uutstukt. Der moeten wat folkloristische goaten overblieven, aans hoal je de kraant niet meer met bevöbbeld de Top-10 van allerslechtste wegen…..
Och, ik heb der ja eigelks gien jota verstand van, makkelk proaten. Mor t aansprekendste veurstel is doch wel de opwoardering van de perrons bij de bushokjes! 
Ik haar t doar al voak n moal over had met mien vrouw. Gattegat, wat is me dat wat met die perrons bij de bushokjes… Wanneer goan ze doár nou ies wat aan doen…… t Is jandorie al zo wied dat der gien bus meer komt bij de haltes en as der aal ien van plan is langs te kommen, dan wordt der wel stoakt. Mor as die perrons op e betere hoogte brocht worden, dan gruit t gras der ok niet meer zo bovenuut en kun je temennent ok zién dat der doch gien bus aankomt.
Gién gezicht, de gemiente Zuudhörn met de ofzakte boksem op e hakken, dat verkoopt doch niet! Nou ja, as je doch n hoanetree op e stee moaken moeten….
Jan Bee
