Jeebeetjes.nl

t Is weer lukt, nije K(r)euze is kloar, mit daank veur ale schrievers en opmoaker Henk de Weerd, dij t spul ook al op webstee stoan het: www.kreuzekeuze.nl. Wie binnen nou mit daarde joargang aan loop, wel haar dat docht dou we mit t Kreuze-oaventuur begonnen? En dat t blad ook nog jongd het: Lutje Kreuzes en Kreuskes, as dikkopkes swìmmen ze deur onze toalpervinzie hìn….
                  
Wat staait der in Kreuze 13? Kin je beter zulf mor noar kieken, mor k wil je wel even nijsgiereg moaken:
- Omtoalvroag oet t Engels, vroage van Jaap Mulder van t Nedersaksisch Vocaal Ensemble
- Verhoalen van Jan de Jong, Cor Uildriks, Jan Sleumer, Carry Grit, Klaas van Zonneveld, Boekou, Roel Sanders, Bé, George Petzinger, Beno Doedens, Giny Hartman, Giny Vonk en miezulf.
- Gedichten van Giny Hartman, Carry Grit, Hanne Wilzing, Jan de Jong
- Grunneger woorden van Gerrie Schaank
- Nuigen veur kerkdainst in Amsterdam.

k Zol m mor lezen goan, en deursturen noar aandre nijsgieregen, dij binnen der wis en vast!

Nije “Toal en Taiken” lag in buzze. Nummer 3 van 26e joargang: maai/juni 2008. Schier dat der zo veur grode vekaanzie n bult Grunneger teksten binnen. Nee, k heb nog niks zain van Deputeerde Gerritsen, dij is nog aal haard aan t waark, stokken vlaigen derof, mor promootsie veur t Nedersaksisch is der nog aal nait bie. Nou, wachten we doch nog even…. 

Wol je waiten wat der in staait? Hail wat historisch nijs van Piet Huzengoa en Haarm van der Veen. Mooi stok van Tonko Ufkes: ‘Ter Verpoozing’ en ook nije en nijste oetgoaven. Grunneger Puzzel van Jan Groenbroek, genootschopsnijs en verhoalen en gedichten van lu as Siet Bootsman, Aukje Tillema, Henk Puister en Reint Eppens.
Abenee bin je al veur €15,- in t joar, krieg je 6 Toal en Taikens toustuurd. Begunsteger bin je veur € 20,- Dìn krieg je ook ale Toal en Taikens, komt der elk joar n bouk bie en kin je ook vergees noar Dag van t Grunneger Bouk en nijjoarsveziede. Gain geld ja….
Telefoon: 0597 591135. Of n stroombraifke noar: toalentaiken@planet.nl.

Der is weer n bult te lezen, goud dat vekansie is, sikkom. (Goud dat t vekansie is, hest ja aal doage vekansie…..) Nije ‘Krödde’ plofde dinsdag in braivenbuzze, Tonko Ufkes haar mie moandagoavend al even woarschouwd. Hai zee, der staait ook weer wat van die in… (k Wos nait ains dat ze nog wat van mie in ‘portefulie’ haren…) Gaauw even achterin kieken. Joa, verd…, k stoa derbie, ik bestoa…… Wat der nog meer in staait? Veul oet t Westerketaaier, doar zellen ze bliede mit wezen in Pieterziel en omgeven. Begunt mit n laank verhoal van Melle Hijlkema “Vertraauwen”, over auto’s, doar heb k zulf nait zoveul mit, mor t leest wel lekker. Bult gedichten van Klaas Duursma, Reinder Hiemstra, Tonko Ufkes, mor ook van Ida Leutscher, Hanne Wilzing en Nina Werkman (en nog veul meer….) Staait ook n foto in, van Jan Glas. Nou ja, Jan het dat ploatje moakt, t is n kou en dat is Jan ja nait…..

t Gaait om Krödde, Grunneger Tiedschrift, nr.106, zummer 2008. Goa mor kieken in biebeltaik, of koop der aine in winkel, nog beter. Lözze nummers kosten 4 euro. k Zol mor abbenee worden as k joe was: €15,00 in t joar, krieg je hom toustuurd en aal. Kiek aans mor even op: www.krodde.nl  (gain stipkes op d’o….)

Kunstgaang Kaampke in Steem het nije ‘Zummer-Kopmeskes’  oetgeven. In dat lutje boukje mit grode noamen vin je biedroagen van Fré Schreiber, Eldert Ameling, Jan de Jong, Tjaaktje Carolus, Tiny Veldhuis en dìn heb k ze nog nait ains apmoal nuimd. Staait ook wat in over broaden heerns, en over dansles.
Kopmeskes kom ook 4 moal in t joar oet. Veur 5 euro bin je abbenee. Meer waiten? Goa mor even zuiken op www.kunstgaangkaampke.nl. Wil je n biedroage levern veur Kopmeskes 30? Geern insturen veur 1 augustes!