Jeebeetjes.nl

Tot en met vrijdag was t ekstroa laank licht ien Noordhörn. De stroomverkopers vreven zuk gnotternd ien e hannen, de theelichtjes wazzen uutverkocht ien e super en de tuunfakkels hebben t ok wel had. t Mooiste gebeuren van de hiele week von ik doch de wedstried met de zeepkisten, op vrijdagoavend ien e Langestroat. Ik heb mien ogen uutkeken en voaker as ién moal! De miest fantastische moaksels op lutje of grode wielen werden op e startwoagen tild. Prachteg!

Kevin bevöbbeld haar zukzulf hielemoal behongen met sigerettepakjes en die haar e ok ien e roader van zien raket doan en op t ding zulf. Onnuur! Schane genoeg verloor Kevin zien gewicht bij de start en toen wol de raket niet zo snel meer noar t ènne bij Pijpker. t Mooie van dizze wedstried was dat t der niet om ging anern uut te lagen, mor om de snelheid én de oorspronkelkheid. Wel t wonnen het? Dat wiet ik niet. Kiek loater mor ien e kraant of op www.dorpsbelangennoordhorn.nl.
Dizze greune zeepkist was volsloagen aans as die veurege, de stuurman kan host deur de takken de finish niet meer zien. Mor t werkstuk zigt der mooi uut en der zitten mooie wielen op, wat n knutselderij!  

Op dit ploatje stoan de winnoars van 2007 en 2006, poar topatleten! Marloes woont nou ien Olhoof en Lindsay is zulfs noar Duutsland verkast, mor ze waren der doch mor mooi bij, oflopen vrijdag! Noa de eerste ‘manche’ stonnen ze veuraan ien t klassement, mor k wiet niet hoe de twijde volbracht is. Veur dizze beident ien elk geval n eernse toestand! 

Kiek, t A-team was der ok bij! Geweldeg voertuug, mor niet de snelste van t spul, en das hiel niet zo’n punt. Pries veur de oorspronkelkheid? Nou, ik heb me best vermoakt en mien Canon ok! Mooi as je wat om hannen hebben, bij ideoal weer! Lu maggen wel ‘dankjewel’ zeggen tegen Dorpsbelangen Noordhörn, die klup haar t spul prima veurmekoar!

foto’s: ©janblaauw, 29 08 2008

Zo’n lichtweek ien t dörp, t brengt vanzulf wat ekstroas. En dan heb ik t dizze keer niet over dij roodbelichte uutgoanswereld ien e Langestroat.  Die kovviesjoppers en hoerekaffers hebben zulfs d’eerste pries kregen van die puntentelentoekenningskemizzie. Joa, je kunnen wel noagoan hoe dat west het, die juryleden bennen schienboarliek nooit wieder kommen as ien Langestroat-Midden, doar hangen bleven…. Die hebben gien smurf zien ien e Borgwiek, en gien filmploat ien e Esdoornstroat. De scheuvels hebben ze wis en vast ok mist aan e Noorderweg en as ze dan nog even deurreden of deurfietst of deurlopen haren, dan haren ze t wotter ien e mond kregen bij aal dat slik ien e tunen, t kerkhof over.

Zolte drop, as je der noar kiéken, vuul je de bloeddruk al omhoog goan. Prachteg! En n poar huzen wieder hebben ze me doar n uutstallen moakt van lollies, spekjes en tovvies, keureg ienpakt, doar moet hiel wat tied ienzitten.
 
En dan denk je dat je alles wel pruufd hebben, mor nee, der is nog meer, levensecht Engels drop! Geweldeg, toen ik dat zag kreeg k spontoan koeskillen (mor t is al weer weg, moak je mor niet ongerust…) En der stijt ok uutleg bij, en n deus met ècht Engelse drop, kun je jezulf trakteren!

k Ben der nog mor n moal laangs lopen, keek mien ogen uut, krekt as vroeger, as we bij d’eteloages langs liepen en je ok zo’n zin haren ien aal dat lekkers… 
   
Nou, as je t nog zien willen, allenneg vandoag nog, mörgen is t weer veurbij. Denk ik, al wiet ik dat niet zeker veur wat de Langestroat aanbelangt. Doar bennen de belangen wel slim groot worden en dat met die vergunnens, dat zal ok wel goed kommen…

foto’s: ©janblaauw, 28 08 2008

t Duurt even veurdat t duuster is, mor dan heb je doch n bak licht! Dat is me wat, zo’n lichtweek. Joa, n eerliekse week is t niet vanzulf, t komt smoandags wat swoar op gang en dan loopt t as n trein, ist weer oflopen, zoaterdags ist oprumen. Niet alle stroaten doen met, das mor goed ok! Veur die puntengevers ist ja al hoast niet te doen. Mor je kunnen wel opvallende zoaken woarnemen. As je vanuut t zuden t dörp ienkommen, ist net of der niks aan t handje is, das pure misleiding. Kiek mor ies bij d’olle smidse, niet zo wied vot van de meulen.