©janblaauw, september 2008
Archive for 14:01
Derde verdieping op gemeentekantoor Zuidhorn
21:46Geert Moatjes het zuk net ienstalleerd ien e kovviehoek van e grootgrutter, as Harm Proatjeboksem met n kop as n siekloon deel vaalt, noast Geert. De stoel krakt vervoarlek, mor holdt zuk kroaneg.
“Moatjes, kovvie! Kovvie! As de bliksem!”
Geert trekt even met e wimpers, mor gijt dan mor gauw even n bekertje ientappen. As Harm zo dut, zal t wel krisis wezen en het e niet veul krediet meer…. Harm nemt n grode slok, loat t brune spul even deur zien mond gobbeln, slikt t deur, hapt noar lucht en kan dan nog krekt uutbrengen:
“n Nije loag op t gemientehuus, hoe verzinnen ze t!”
“Joa mor Harm, dat was ja al n pooske bekend, dat wus jim doch ok wel, börgmeester wilde dat al toen e nog dochte dat e Maxima nog wel n moal over de vloer kriegen zol…”
“Joa mor Moatjes, tieden veraandern doch! Gruiend ienzicht, dat is doch n veurwoarde veur n knappe bobo! Trekken ze me doar 1, 2 miljoen uro’s uut veur die ekstroa loag… Man, man, man, of Fortis niét ien e problemen zit, of der gien banken ien t revijn valen, of Bos persoonlek wat biljetten bijdrukt ien t schuurtje achter t huus…”
Geert gloept even om zuk hèn. Harm roept altied zo haard dat t ien e Oostraand hoast verstoanboar is, boven t lewaai van de sementauto’s en de grondgriepers uut.
“Is doch naargenswoar goed veur? n Lege roadszoal overdag, n lege trouwzoal, nou ja, ruumte zat! En dan stijt doar potverdorie ok al tieden n leeg station!
Doar kinnen ze doch wel de ketine ienrichten? Hebben die amtenoaren ok n geregeld loopke, bietje bewegen is goed veur n mens en veur n amtenoar ien t biezunder… Wat nou versplintern??? En as ze dan nog niet genoeg armslag hebben, dan kunnen ze doar ien e Oostergast doch wel n poar nije huzen ienrichten as sublekoatsie? Dat doen ze doch ok veur t onnerwies? Mag dat dan wel versplinterd worden? Ik kan der met mien pet niet bij, met mien hoed niet, met mien buusdoek op e kop al hielendal niet… Wat n verknapbuzzerij!”
Harm stommelt ien t ènne en gijt zuk nog mor ies ienschenken. Hij bölkt vanuut zien knijen en loat zuk dan weer deel valen noast Geert. Dat wordt de stoel te machteg. Met n diepe siek en n licht gekroak klapt e dubbel. Harm leit op e kont, kovvie over hum hèn, mor t mieste komt op e boksem van Geert te lande. Die gijt votdoadelk ien t ènne, as deur n wepse stoken…
“Man, man, man, wat n boudel…” Dat kan Harm nog net uutbrengen. “t Wordt tied dat AH ok wat nijs krigt….”
foto’s: ©janblaauw, 09 09 2008
Kritische Noordhorner damhert…
12:15
©janblaauw, 25 09 2008
Boéken of Boúken????
20:53t Binnen de Grunneger Boukendoagen, of Boekendoagen, of Groninger Boekendagen…… Nou, je maggen zeggen en denken en doun wat je willen, mor t eerste klinkt wiedoet t beste. Bie n ‘boukenprezentje’ wait ik dat der Grunnegers in staait, as je t over’n ‘boekenkedootje’ hebben, dìn mout je dat mor ofwachten….
Ho ains even, Jan Blaauw, betaikent dat dastoe ‘Mien Westerkwartier’ ofvaalst??? Nee, vanzulf nait, mien Westerkwartier zit mie in t haart bakken, of bakt, k heb t doar ain van de schierste steeën geven (Stoefbie t Oldambt…). Mor de toal dut mie aal meer twieveln, benoam ast der op aankomt, dat allenneg ain soort Westerkwartiers Wésterkwartiers is, doar heb ik muite mit/met. Binnen Westerketierder boeken allent mor boeken, as je der boéken tegen zeggen (’nee, kounavvel, ik proat nait tegen bouken…’), of bestoan der ook Westerkwartierder ‘boúken’? Nee, ik bin doar nog nait over oetdócht.
Hou k doar zo bie kom? Nou, guster binnen de Grunneger Boukendoagen opend in t CC van Zuudhörn, nee, ik was doar nait bie, heb k oet t Dagblad en van webstee van “Mien Westerkwartier”. t Was ja n besloten soamenkomst van…. joa, van wél aigelks….? Doar is t eerste boukenprezentje oetlangd deur schriever Tonko Ufkes aan stichtingveurzitter Geert Zijlstra, van ‘Mien Westerkwartier’, en fotogroaf Omke Oudeman het ze op portret zet (mooi doan!). Drij Westerkwartierders op n bult, kiek es aan: siktoares Tonko Ufkes geft n kedootje aan veurzitter Geert Zijlstra en puutholder Omke Oudeman het der n ploatje van moakt veur kraant en webstee. Das gain aintwijtje, das n perfekte ain-twij-drijtje, woar Van Basten n vedde punt aan zoegen kìn! Nou, wat je ook zeggen willen van Stichting ‘Mien Westerkwartier’, lu hebben heur publieke reloatsies goud veurmekoar. (Vaaierde bestuurslid, Melle Hylkema, zel der ook wel bie west wezen om te zain dat t goud was….)
Nou even ale gekkeghaid op n stokje: je goan vanzulf dizze weke wel even noar de biebelthaik of noar de boukenwinkel om wat Grunneger bouken te lainen of te kopen??? Krieg je t kedootje der vergees bie, “Vergleden Tied” hait t (en gain “Vergelden Tied” zo as t op webstee van “Mien Westerkwartier” staait, foutje, bedankt, niks te danken).
ploatje boven: oet Dagblad van 23/09/2008, van Omke Oudeman
ploatje onder: nij Cultureel Centrum Zuidhorn, ©janblaauw, september 2008
Maismaaitied
13:39Tied om mais te maaien veur bio, bindmiddel
of popcorn. Vrouger zagst in Oost-Grunnen
(en ook nait in West-) nooit nait ain maisveld,
nou joagen ze vossen oet hoogopschoten gruin.
En as din doch dij grode mesienen mit veul lewaai
t laand oprieden, kinnen sloten ook votdoadelk
opschierd worden, kloar veur schaauw en overlast
van wotter, wie hebben t nog laank nait had…
©janblaauw, 20 september 2008