Joa, t is mie wat, hebben z’op kloarlichte dag de wieken van e meulen ofhoald ien ons dörp! (Nou ja, kloarlichte dag…. t Was eerst aldernoaste duuster, doe ze met die maaldoenderij begonnen…) En onze meulen zag der doch al niet zo geweldeg meer uut, leste tied. Ston der bij as Piet Snöt die zien buusdoek verloren het. Allenneg soavends was t nog wel ies schier, met aal die lampkes, mor dat is vanzulf nou ok veurbij. Gien verlichte Kerst, ik zie t duuster ien de kommende weken. t Zal wel weer goed kommen, de wetholder was der ja zulf al vroeg bij, hiel twij ogen ien t zeil. En Radio Noord was der ok, Ellen Bourgonje. Mooi man, ben je nog niet ies goed wakker, zie je doar n bekende stem met n rooie jas aan en kopdoppen op: De Standploats! (Mor goed dat ze Jobke Nienhuus niet stuurd hebben, was wis en vast met die grode snor vast zitten bleven achter aal die koabels en wieken die per twij roeden hieten…)
Die knij op e ploatje, rechts, is van de verantwoordelke mulder, Klaas Hekker. Klaas is n tiedje leden emigreerd noar Hazzen, mor hij komt trouw opdroaven as ‘first miller’ ien Noordhörn. Dat kun je gerust aan m overloaten. Klaas is n doener, hij holdt ok alles ien e goaten”:
As der n eerste mulder is, is der vanzulf ok n twijde. Dat is Drewes Schouten, die is immigreerd en woont nou n poar huzen of van ‘De Fortuin’, praktisch regeld. Drewes is ok zo iene die je wel om n bosschop sturen kunnen, met zien bakfiets. En hij is niet te mizzelk om even n handje te helpen:
Nou, die Vriese meulenlu van Jellema uut Burdaard (dat is doar bij Bartlehiem ien e binnenlanden van Fryslân, woar ze de kunststofkezienen uutvonden hebben) haren hiel wat te stellen met die stiemske Fortuin, n dikke mörgen had werken, met ién kovviekwartiertje, nou dat is niet overdreven veul. t Was gedureg simsaldebim en dan zweefde der weer wat deur de lucht, n bovenas, of n fok (nee, ik haar mien fok ien e buuts…) of n roe… Doarboven schien t niet zo groot, mor dan kwam t beneden… Mensenkiender, wat n gevoartes! En der zat best n dikke scheur ien e roe, goed dat de meulen vastston!
t Is dat der zo veul kundege lu rondliepen, aans was ik thuus bleven. Mor ien Klaas Hekker heb ik n blind (nou ja, loaten we zeggen: slechtziend…) vertrouwen, die kan ok via Ellen Bourgonje aan t Radio-Noordvolk sekuur uutduden hoe de vörk ien e steel zit, en de wieken aan e meulen:
Nee, niet elk en ien zat bij de radio. Der waren ok lu, die t zulf zien wilden, die geleuven niet zo ien e radioproatjes, denken dat ze van alles wiesmoakt worden, mor dat is niet zo, dizze reis niet temennent. Lutje lu, grode lu, honden…
Alles kwam ien e bienen en ien e poten om te zien hoe Noordhörns trots vleugellam moakt wer. Nou, jonges, even tanden op mekoar, niet te laank angeln, t komt weer goed! En dan kan der moalen worden, en peld. Onze Fortuin gijt n schiere toekomst ien e moet!
©janblaauw, 26 11 2008
