Wie binnen noar Scheemde west, dunderdagoavend. Mit Riekus in auto, zién auto, wie hebben ja nait meer zo’n vervoerding. Mooi man! Mit woagen en chauffeur noar Scheemde! Wat we doar doan hebben? Nou, der was n oavend van de Historische Verainen in de gemainte Scheemde, in Esbörg. Daar bin k lid van, van dij Historische Verainen, en Riekus ook. Riekus Niewold, woont al joaren in Hoogkerk, mor komt van Scheemtermeer, Oosthoffloane, bie febriek “De Toekomst”. Zien pa waarkte doar, mien pa waarkte doar, kwammen mekoar wel ains tegen. En dat deden wie ook, Riekus en ik. Even old ja, van ‘45. Hai is van juni, ik van juli, hai is n klaain beetje older en n klain beetje wiezer en griezer…. Hai gong noar Scheemde noar schoule, ik in Midwolle. Op d’ULO laipen we mekoar veur de vouten, of aigelks was dat bie voetbalclub, bie “vv Scheemda“, geelswaart, en ook wel in jeugdherberg “Esbörg”, was veur ons n hangstee, kon je pingpongen, asmits mit klaai kliedern en wie huilen doar ook disco’s, allereerste disco’s in Scheemde, mit kovvergrammefoon en ploatjes, 45 toeren. Ploatjes van meziekhandel Kupers, of van Jan Groenbroek astom Cliff Richard ging. Riekus was de proater, ik koos meziek oet, bedainde de draaitoavel….
Das n zet leden….
Nou klommen we doar weer dij hoge Esbörgstoupe op, veur mie (en Gé) d’eerste moal in 24 joar. (Dou nam heur pa ofschaaid van pervinzie, waarkte zien leste aarbaidsjoaren bie ‘Zuvering’, doarveur was e joarenlaank koppelboas). En dij gaange in ‘Esbörg’, nog aaltied zulfde. Wat n allure! Kin nog joaren mit! Jaze oet, trappen of om n kapstok te vinden, en doar binnen ook de “Heren” en de “Doames”. En dou noar grode zoal, woar al n bult stoulen vergeven wazzen. k Duurde eerst nait om mie toukieken, je binnen en blieven wat schieterg in nije omstandegheden. (Ook aaltied wat baange dat je paardij lu nait meer herkennen doun en dat ze dat aanzain veur wiezeghaid…). Hé, kiek es, Gé het heur eerste bekende al bie d’aarm, van vrouger van Aarbaiders Sportbond! En doar zit Dina Arbeider, het bie mie in klazze zeten op ULO, en heur man is der ook, Heijo Drenth, sikkom dezulfde as joaren leden! Geweldeg! En doar zitten Eildert, neef van Gé, en Bertje van der Loan, en Jan Kloosterboer… Kinnen we mooi aanschoeven, zain we ook nog wat van dia’s loater… En wel staait doar achteraan te swoien? Das Daan Glazenborg, nog aaltied bezeg mit geschiedenis van Scheemde, hai het mie doar n verzoameln ploatjes opbaauwd! Even noar hom tou. Och heden, kiek es, Jan Groenbroek, dij is ja veurzitter van dizze Verainen, dut méér as Grunnegers…
n Waarm bad, weerom in Scheemde! En dìn hebben we nog nait ains wat mitkregen van dizze joarvergoadern…
Foto van het ‘bestuur’ van de VUS, Vereniging ULO Scheemda in wat toen de grote zaal van de Esbörg was… Tweede van rechts Dina Arbeider, toen nog zonder bril. En ja, schuin achter haar sta ik, eveneens nog niet voorzien van zo’n hulpmiddel om het gezichtsvermogen te verbeteren… En voor de twijfelaars, die golvende haren van mij waren écht… Wie er nog meer op de foto staan? Het echtpaar Van Gerven, toenmalige beheerders, Hemmo Kuiper, Harm Maathuis, Janneke Oosting, Tineke Alles (op wie ik lange tijd ‘n oogje had, waarschijnlijk wel twee…) Eind jaren vijftig, z’n vijftig jaar geleden….
