Nou, ik moet votdoadelk toegeven, ik wer doch wat grootsk op onze gemeente Zuudhörn… Der ston ien e kraant dat Zuudhörn de aandelen van Essent holden wil, niet verkopen wil aan RWE. Poeh, docht ik, doar loat onze gemeente mooi even zien dat ze ruggegroat het, das ok wel ies aans west. Allenneg de VVD wil de Essentpepieren wel kwiet aan die Duutsers, alle aandre fraksies niét! Op veurstel van Greun Links hebben ze n motie aannomen: “Wij bennen tégen de overnoame van Essent deur RWE!” En of B. en W. die boodschap mor even over brengen willen…
Niet uut hannen geven, de energieveurziening is van veuls te groot strategisch belang en dan moet je zulf zeggenschop holden. En die RWE dat is dan wel n grode Duutse ondernemen, mor ze hebben doar wel smirrege hannen! Ze geven niks om n goed mieljeubeleid en nog minder om n klimoatvriendelk beleid, zegt de motie. Mor ja, Zuudhörn is mor n beudel op d’aandelenmarkt, het niet veul ien te brengen. Keroazie hebben ze wél! Mien kompelmenten! En nou mor hopen dat der meer van die beudels bennen, die “Nee” zeggen duren. Veul van die kleintjes moaken ja ién grode! Kom op lu, gebruuk je verstaand, d’Essentaandelen blieven ien ons eigen laand!
Groen en lommerrijk, de parkeerplaats bij het bestuurscentrum van Zuidhorn. Inspirerende plek voor een succesvolle Groen Linksmotie. Wie volgt?
©foto: jan blaauw, 2008
