Ik wait uniek is t nait, mor schier stoan
ze derbie, onze aigen veurtoenekrookjes,
d’eersten van 2009. Koale boudel om
zok tou kin heur, liekt t, nait veul schelen.
De eerste krokussen in VO-33-tuin Noordhorn, 2009
Cotoneasterbloadjes zeggen hail bleu “Moi!”
Blaauwe droefkes geven t tou, joe hebbent
wonnen, poar dooie takken graauwen “Wat
dou je hier?” mor ik bin der wies as wat mit!
©jan blaauw, 26 02 2009
Hai is der al n poar moal west, olste jonkje van onze buren, Zeuven is e ducht mie, mit ploatjesbouk stief onner aarm… k Zag hom votdoadelk om hörn van t schuurtje kommen, eerns gezicht, dat heurt bie n eernse zoak: voetbalploatjes buten (=ruilen). Leste moal zien bruiertje achter hom aan, keek ook al wies oet ogen, haar nog nog gain bouk. Is ook ja n poar joar jonger, mor leert gaauw. Hai dut dat benoam deur veul te herhoalen. Hebben wie t over Luciano, dan zegt hai ook n poar moal: Luciano. Komt proat op ‘Ajax‘, heurst wis en vast ‘Ajax’ oet de mond van de klaainste van t gezelschop. Olste het veur mie ‘Jungschläger’ van de Superboeren van De Graafschap, leste dij ik nog hebben mout van dij blaauwidde zebra’s. Hai krigt van mie ‘Granqvist’ van onze FC. ‘Dat’s een goeie”, zeggen wie tegen mekoar. Jongste zegt t mor even noa. Eerst ‘Granqvist’ beetje drutjend, en dan smui doar achteraan: “Dat’s een goeie!” Olste en ik, wie kieken mekoar even aan met n blik van: ‘Loat m mor even, hai leert t mooi, mor aigelks kin e nog nait mit doun…’ As we oetbuut binnen (zoveul bosschoppen hebben we nou ook weer nait neudeg…), krigt olste aaltied twij ploatjes ekstroa. Hai mout der ook veur t hoes oet, deur nadde snij en zo. Veur wat, heurt wat. Jonges weer noar hoes, blied en eerns, zo as ze kommen binnen. Haand nog even omhoog, tot volgende keer! Ik bloader nog even t album deur, k vuil mie viefteg joar jonger. Vrumd dat k mor n handvol heb van FC Grunnen
FC Groningen, het schiet niet echt op.....
en AZ wil ook nait zo echt vlotten. Doch wat roar dat ze zowat doun in twaide helft van competitie… Zit zo’n Berry Powel al laank bie ADO, mout je hom inplakken bie Grunnen. Huntelaar? heb k drijdubbel, mor zit wel mooi op n zunnege baanke in Madrid. En mit dij trainers is t hailemoal n soepzooi. Atteveld? Vort! Stevens? Vort! Verbeek, Westerhof, Willem van Hanegem? Aalmoal van teneel of! Nou ja, wat moakt t oet? Radomski speult weer, bie NEC, heb k doch mor mooi n ploatje van! En bie Feyenoord is t net n zaikenzoal, helfte is zaik, aner helft blesseerd… Zol dij Landzaat nog waiten woar zien voetbalschounen liggen?
Mörgen doch mor even wat bosschoppen hoalen, je mouten doch wat te eten hebben en n fesounlek noodpakket is ook n goie zoak! En t is ja gaauwer 8 meert as dat je denken…
Een jonge JB speult mit Meccanospul
Onneuzele Homko
Vrouger is kloar versimpeld
tot schiere ploatjes in n album
bliere herinnerns in t onthold
staarke draank verdund mit
aalsteveul laaidenwotter
oftreksel van n werkelkhaaid
dij rapper as Evert Kroamer
veurbievlogt stangen schroefkes
oet Meccanodeuze omvörmt
tot kriet koartstok en kösterstem
verwondern toulet over tied
van nou as onneuzele Homko
Nijloodje, goud veur open mond en grode ogen...
©gedicht: jan blaauw, 15 02 2009
©bovenste foto: wait k nait meer, viefteger joaren
©onnerste ploatjes: jan blaauw 14 02 2009
King-Kong-kroane oet Oerterp, dreum oet vervolgen tied
Zoaterdag 14 meert wordt n biezundre dag, ien t Westerketier! Der bennen 3 organisoatsies die soamen wat moois uutbedacht hebben, ter ere van prachtege tachteger Ate Doornbosch. Snommedoags wordt der van 13.00 tot 17.00 uur n ofwizzelnd programma presenteerd ien e “Vrijborg” ien Nuus (Nieuweweg 80, Nuis). Eerst is der n welkomstwoord, dan komt Henk Scholte aan bod met n ienleiding. Vot doarnoa n stuk uut n documentaire van Pier Tania: ‘Het laatste lied’. As dat filmdeel veurbij is, klimt Aly de Vries op t podium en gijt proaten met de man van “Onder de groene linde“. Wat doarnoa de ‘verrassingsact‘ ienholdt, kan k vanzulf niet uut e doeken doen…. De muzikoale ofsluting is ien handen van de Vloamse volksmeziekgroep ‘t Kliekske! En dan kun je ok nog n zeupke nemen, of, as je nog fietsen moeten, n frisdrankje!
Wil je doar bij wezen, ien Nuus, op 14 meert????? Dan even aanmelden (veur 10 meert!) op info@huisvandegroningercultuur.nl of even bellen noar: 050 5992060!
(Wel die 3 klupkes bennen die de boel organiseren doen? Culturele Raad Gemeente Marum, Stichting tot Steun Dorpshuis De Vrijborg en het Huis van de Groninger Cultuur)
Ate Doornbosch het tussen 1957 en 1993 dik 1300 ofleveringen moakt van t radioprogramma “Onder de groene linde”, eerst bij de VARA, loater veur de NOS. Ate ging toen deur hiel Nederland en Vloandern olle verskes verzoameln, uut mondelinge overlevering. Hij het me doch n bult liedjes verzoameld! En dij verskes, doar binnen doe weer geschiedenislu, toalwetenschappers en folkgroepen met aan e wandel goan. Der is ok n verzoamelbox uutkommen, ien december 2008. Negen spiegelploatjes, n DVD en n boek van meer as 400 bladzieden, woarien 163 traditionele verskes opnomen bennen, ien soamenwaarken met t Meertens Instituut!
ploatjes van t levenswaark van Ate Doornbosch: Onder de groene linde!
ploatjes: www.meertens.knaw.nl
As de gedachten ien mien kop
zuk niet langer steuren aan regels
die ien e loop van joaren aanleerd
bennen, n beetje wildwestkarakter
kriegen, de Vliegende Hollander
volgen, zie k oarzelnd wat moois
op mien netvlies n stee verovern,
t nuzzelt nog wat, kiekt mij aan
met n gezicht van het jim ons nou
goed bekeken, t verbleekt, gijt
vot, de störm jagt met nog meer
kracht, nog meer geluud achter
mien verwachtingen aan, bloast
ze uut mekoar. De gewone dingen
wachten tot n nij gevuulsmoment
aanbroken is, zij vannijs ien beeld
kommen,
n schier
bestoan
bokjet.
Gewoon mooi, n schienboarliek dooie tak overdekt met greun leven, de vörm krigt iets van n dier
Gewoon wat bloaren, mooi om te zien, wintersgries, natuurlek rangschikt, bladstilte
Gewoon wat wotter op e zeil, gewoon mooi, zo mor, en zo mor veurbij lopen, sloerd
©janblaauw: foto’s 6 en 8 februari 2009, tekst 10/02/2009