Jeebeetjes.nl

Joa, wie binnen noar de 10de dialectendag (28 meert 2009) west, veur t eerst! (Der wazzen ook lu dij wazzen der al bie veur de tiende moal, dat binnen d’échten!) Dij Dialectendag wer organiseerd deur de SND (= Stichting Nederlandse Dialecten). Nooit van heurd, tot Hinderk Scholte (van dat bekende Cultuurhoes in Stad) n berichtje derover stuurde: “Wat veur joe?”) Wie derop of! Henk de Weerd en ikzulf, mit traain! Drenthe, dat is veur ons ja nog wel te behappen, proaten ze sikkom net zo, allain denken ze doar dat de a veur de o komt (zo staait t ja in t alfabet…) Proaten wordt praoten….
Dou we doar in Hoogeveen oetstappen deden, regende t, das goud veur de sfeer, goud veur bezegheden onnerdak, dak van “De Tamboer”, t Hoogevènster Congrescentrum. Schiere boudel! Dou we doar onze jazen en puut mit nadde plu ophongen, en kevört mit bonnen kregen haren, haren we votdoadelk Siemon Reker in t vizier. “Ah, Kreuze en Kreuske, mooi dat je der binnen!”, Joa, hai kìnt ons! En dou hebben we ook nog even n proatje moakt mit Jan Groenbroek, van ‘Boukenkist’, hai was alweer drok mit bouken aan t vleien… Vergaten we beguntied en mozzen ons zulf in n hogere versnellen zetten om in zoal n stee te vinden, twaide riege, stoefbie lu dij nuigd wazzen, nou, dat wazzen wie ook ja… Ain van d’eerste dingen dij we verstonnen, was “Bliede daje der bent!” Dag kon nait meer stokkend…. t Ging over -moudertoal- en -herentoal- en over -Moi- en -(H)oi- en dat apmoal oet de mond van Munniksma, dij is Drents Deputeerde. Nou, k heb ze wel minder mitmoakt! Hai haar t ook nog even over d’Erkenning van t Nedersaksisch, van II noar III!” Aanvroag is deur oet, en BZK (dat binnen lu van Binnenlandse Zoaken, leuf k) is der glad veur! En in 2010 komt der n streektoalfestival: “REUR!” Munniksmoa óf, RUG-student op! Kwam e mit n digitoale verzie van t Drents Woordenbouk van Kocks (nee, gain Cox….) Dìn denk ik: Woarom komt zo’n Grunneger schietjong nait mit n digitoale verzie van t Grunneger Woordenbouk? Doch mor ains vroagen aan Siemon….
Vlodde boudel doar in zoal, n veurzitter (Veronique de Tier, onthol dij noam!) dij tempo en dudelkhaid haand in haand  goan lait, mag ik wel! Jan Stroop was de volgende ‘artiest’, hai huil n prachtverhoal over ‘papegaaisituoatsies’: “Doei-doei…”, over “Haai en hoi” en zee ook nog even dat “groeten” oorspronkelk ‘wenswoorden’ wazzen. En ‘adieu’, dat haide eerst: ‘à Dieu’, goddelke oorsprong. Stroop of, Munniksma weer óp! Hai kreeg t eerste exemploar van t “Dialectenboek 10″ en dat hait “Moi, adiëe en salut”…. Dou gaven ze nog wat dikke pakketten vot mit streektoalprodukten aan lu dij der al veur de 10e moal bie wazzen (mozzen ze nog haard veur lopen ook, der wazzen mor vieve, leste twij grepen dernoast…) Kwam der n bekende t teneel op, in t shirt van Helpman, blaauw-wit: Frank den Hollander! En dij huil mie doar n schier verhoal: ‘Een Zeeuw in Groningen’, staait ook in t bouk! Prachteg! “Deur is lös!” Schroevendraaier derbie…. En dou kwam Pé der ook nog even bie, Peter de Haan! Brochten ze in heur voetbalklaaier de Helpman-hit: “Heracliden oet!” Akoestisch! Geweldeg! Joa, doar wer t veur leste spreker nait makkelk van. Reinhilde Vandekerckhove, over ‘Chattoal’. (wb = welcome back en zokswat).
Laank genog zeten, wor je stief van, in t ènne! (Henk haar n stieve nekke van t omhoog kieken noar aal dij lu dij op- en ofgingen…) Lunchbon oet de buutse en op noar de stoetjes, soep, kroketten… Lekker eten! Allain appelsiene was binnenin verschimmeld, mor das ja ook gain streekproduct… Zaten we bie Jur Engels en bie n aandere grìnsbewoner, woar Henk vrouger nog ains n twaidehands autootje van kocht haar, van de GREMI! Hou kin t! En dij man kwam vrouger as vertegenwoordeger nog wel; ains bie ons in dörp, bie Sijtse de Vries zien fietswinkel. Kon e mooi over vertellen! (Hai was asmits wat aal te enthousiast, zee e n moal van ‘Bliksems’, kon e votdoadelk weer noar boeten… Dij toal wol De Vries nait heuren!)
Dou wer k mie doch sloaperg, kon d’ogen hoast nait open holden! Kwam dij man oet Gent van d’eerste waarkbieainkomst ook nog te loat, was e n file bie Staphorst aan t onderzuiken… Kwám e doch nog, vertellen over (hol joe vast!): “Digitalisering van de amateurlexicografie” (en dat op volle moage…) k Heb of en tou wat mit ogen knipperd, was t zo oflopen, haren we Marga Kool as oetsmieter. In t Drents over schrieven en oetgeven, in dialect en/of in t ABN. Baaident, ast even kìn. Zai huil Rilke der ook nog bie, nee, wie hebben ons der nait van of moakt!  k Haar al n bouk van heur kocht:  

Marga Kools boek: Een kleine wereld. Een aanrader!

“Een kleine wereld”…  Joa, docht ik, wat ist of en tou n klaaine wereld, van Lauwerszee tot Brussel tou!
Schiere dag, dizze 10e DIALECTENDAG! Bedaankt SND-lu en t Tamboer-team!
©janblaauw, 29032009

Of Grunnegers....

Groeten in Nederland en Vlaanderen