Dat opknappen van zo’n meulen as ‘De Fortuin’ ien Noordhörn, dat trekt aaltied n bult kiekers. Doarbij ok de beroepskiekers, zoas de lu van Radio en TV, en van e kraant, mor die bedoel ik niet, t gijt me nou om de belangstelnden die om wat veur reden dan ok heur woensdagvummedag veur n groot deel besteden aan t kieken noar vrachtwoagens, n grode kroan, n ladderwoagen, lu met helms op e kop, mulders van e meulen, old-mulders, nije dingen veur de meulen, touwen, koabels…. Kieken noar aal wat der gebeurt om en bie en op e meulen. Kiekers bekeken, doar goan we:
t Kieken wordt op gang brocht deur de hoofdrolspeulers zulf: op e hoek van e stroat, de mulders, de meulenmoakers, de kroanmasjinist, krekt as de vrachtwoagen deraan komt met de nije roeden en wieken...
Goed veurbeeld dut goed volgen: kiekers trekken nije kiekers aan, n schiere kiekstee doar bij de woonboerderij De Sicke Benninghestede
Zulfs de herder van d'overkaant holdt t gedoe bij de Fortuin ien e goaten...
Muldersdochter Clara met heur kleinzeun, ok bij de kiekers. Zij het of en toe pienleke herinners aan e meulen: kreeg as kiend de haand tussen de deur en de deurpost....
Kleine Klaas uut e Nijstroat (mulder ien e dop?) kiekt noar o.a. grode Klaas en aal die anern die zuk ienspannen om van de Fortuin weer n draaiende meulen te moaken...
En ja, sums wordt de aandacht ofleid deur n fotogroaf, kun je niet ies zien wat der gebeurt bij de meulen...
En loaten we eerliek wezen, elke kieker het zo zien eigen kiekstijl ( of is t kiekstiel?) Je hebt der wat ruumte veur neudeg, kun je de kop derbij holden...
Gezinnen met of zunder hond... Telt lekker aan, zo weer zes poar ogen die De Fortuinopknap kritisch volgen; nou ja, asmits moet de hond wel even aaid worden...
Verschillen bennen der ok tussen kiekers en kiekers. De iene kieker wil alles zien, d'aner kiekt of en toe en proat ientied met e buurvrouw, en dat kan hiel belangriek wezen!
Tja, de jongens op e meulen hebben tegen n uur of tien zin ien n bakje kovvie en n stoetje en dan willen paardij lu wel ies ongeduldeg worden. Mor dan is Grode Klaas ien e buurt om even deskundeg dit kiekgat op te vullen...
Zulks mooi weer was t nou! Je konnen zo mor op e stenen zitten goan, veurverwaarmd!
De loaterkomers worden even bijproat, zo heurt dat ien t dörp van De Fortuin. Hannen ien e buuts of over mekoar, d'ogen doen t kiekwaark...
Louwe Piepker is der ok, incognito, zunnebril op e kop, soamen met zien vrouw en kleindochter. Je zien Louwe denken: Lag ik doar nou ien 1990 met mien brandweerkammeroaden om de meulen vast te zetten? t Störmde, en de meulen was druk bezeg op hol te sloagen! t Is schier oflopen, al lagen der wel wat stukken van e wieken ien e tuun bij de woonboerderij... Gien brand, gelukkeg!
Kieken kun je vanof n ofstandje, tegen e muur aan, met n proatje tussendeur...
Mor kieken kun je ok met e neus derbovenop! Zol zo'n man met n greune helm t wel goed doen? Nou ja, de kleur greun kun je verschillend interpreteren...
Wat t mooiste is om noar te kieken, veur veul mensen? Kleinkiender! Doar kun je doch van smelten???!
©foto’s: jan blaauw, 15 04 2009
