Dat was mie wat, zoaterdagnommedag 16 maai! k Haar t al wat op zenen kregen, Paulusmoa ook mit zien gekwedel over regen dij wel of nait over ons hìn komt… Bie ons in t dörp wer al veur de vaaierde moal wielerronde organizaaierd, en das nait niks, leuf mie nou mor! Wie hebben doar in Noordhörn n superregeloarster veur, Digna Achterhof, dij wait wat fietsrieden is. Het ze zulf ook joarenlaank doan, de zenen haren heur ook wel ains te groazen! Heur man Hendrik Jan vindt t aal goud, as hai mor mit mag in sportauto van Piepker, dij ridt as hoas veurop. Vraauwlu derachteraan (vrouger was t aansom, mor ja, tieden veraandern…) Nou, ze haren nait de minsten van dij schiere maauwhemden aantrokken. Stoan ook aal wat op, letters en getallen, mor doar kon k nait zo gaauw wies oet worden, zulfs dij jonge wichter van 15 tot en mit 18 reden as gekken. ‘Nijen’ nuimen ze dat, nou, doar was t nije al laank of. Ho, nog nait van apmoal! Monique Buiter oet Zuudhörn ree heur eerste echte wedstried en doar neem ik mien houd daip veur of! Klasse, dij komt der wel! Ik docht ze hebben wel wat mitgevuil mit heur, mor nee e, most net bie dij jonge vraauwlu wezen! Gingen votdoadelk as haalfmalen op trappers stoan… Monique lag dou direct al n kwartboane achter, mor ze lait zok nait van de weg rieden, ze ging deur! (Zuudhörn mag best wat grootsk weden op zo aine!). Bie d’elite vraauwen (k heb nog nooit zoveul elite fiétsen zain… joa, der laipen ook wat B-vraauwen maank) mos k even zuiken noar ‘onze’ Bekkering-zuskes. Dij hebben tegenswoordeg anere maauwhemden aan en doar bin k nog nait hailemoal aan wend. Eyelien en Daniëlle wazzen der wel, en hoú! Daniëlle het sikkom aal heur konkurrenten zaand in d’ogen streud (ze zee dat heur rad lös zat, mor dij anern dochten dat ze slecht sloapen haar en dat ze nait mitkommen kon…) en kwam loater mit n explozie! Ree zo elkenain noar hoes, nou ja, der wazzen twije dij nog wat weerwaark boden, mor Dani ging as eerste over de meet! En wie mor klappen, wie haren mitmekoar ook n luddek beetje wonnen… Börgmeester was der ook! k Heb nou even keken of t wel vertraauwd was mit dat pistool, mor dat vol mie nait tegen! (Hai schoot ook gain kobbe tou locht oet…) Schiere dag was t! Hail schiere dag! Gezelleg ook en je huvven nait over de koppen te lopen, zo drok was t nou ook weer nait, schane aiglieks! Dij man mit zien microfoon, dij kon der ook wat van, kon net zo rap proaten as wichter fietsen! Ainmoal vlogen der n stok of wat over kop, nou, dat dee dij sprekert ook wel ains. En in oardriekskunde von k hom nait zo goud, haar e meer aan doun most, vrouger op schoul! Och, dat e Bergman voak n moal Bergsma nuimde, dat kin gain kwoad. (Krigt e sportwinkel wel n pot vaarf van schilder Bergsmoa…) Veur mie maggen ze der mit deurgoan, mit dat fietsrieden, ik vin t prachteg! Van begun tot ènne! En dat von börgmeester ook! Binnen we t doch ains, nait dìn?
Kiek, wichter rieden zok waarm, laagspieren doun t nog...
Dit is Monique Buiter oet Zuudhörn, ree heur eerste echte wedstried hailmoal oet! Wichtje komt der wel!
Leuf mor dat ze haard gingen! Nee, gain motortje stiekem achterop...
Publiek heurt der vanzulf ook bie! Pa wait wat fietsen is, jonges hebben der nog nait zoveul benul van...
mooi ploatje zo mit meulen op achtergrond. Meulen draaide ook, mor bleef wel op zulfde stee stoan...
Nee, dit is gain 2 minuten stilte, prekerij of zokswat. Radproater haar even n onderonske mit börgmeester... Duurde even...
Hannen aan t stuur, ogen op weg, brood in mond...
Dit wazzen koplopers, nou ja, kopfietsers...
Mout hond over lu hinkieken, aans zugt e der niks van, das gain waark!
Börgmeester het ook n schiere nommedag had, en Henk Priet ook, en Van der Werff van de RABO ook (dij doun ook in fietsen...)
©foto’s + tekst: jan blaauw, 16/17 maai 2009
