As je dat zo metmoaken, zo’n feestweek ien Noordhörn, dan krieg je vanzulf bewondern en respect veur de lu die derveur zörgen dat alles goed komt! Dié mensen bennen heur gewicht ien gold weerd! Nee, echt op de veurgrond willen ze eiglieks niet, ze doen t ja veur t dörp en beleven der zulf ok prezier aan, gelukkeg. Om ze apmoal te eren n ploatje van twij van de grode groep: Anneke Hommes en Gré de Valk! t Eeerbetoon geldt veur elkenien, van hamburgerbakker tot muntjesverkoper, van kovvierondbrenger tot puutholder, van….
Twee Noordhörner doeners, gold weerd!
En zunder publiek is der vanzulf ok niet veul aan, as je n ZESKAMP organiseren! Der moet sfeer wezen: spanning, ontspanning, humor, ofwizzeln… En dat is der niet genoeg as der gien kiekers bennen. Doarom ok hulde aan de kiekers, de lu die de weg vienden konnen noar de nije Dörpsstee aan e Noorderweg!
Kiek, Ida en Rinnert kommen ok even kieken, op e fiets! Zie ze glundern!
Niet allenneg groten, ok jonge kiender keken zuk d'ogen uut! Der was ja veul te zien!
En as dan doch apmoal wat lang duren ging, dan kon je der aaltied nog bij zitten goan...
Dan heb je de bedenkers en de doeners, en de kiekers, mor der moet vanzulf wel iets te kieken wezen! Niet minder as zés butenonderdelen, de ien nog mooier om te zien as d’aander! En der moeten ok teams wezen, ploegen van stroaten en/of bedrieven (’Hummel Totaal’ is der aaltied bij, dat kan ok niet aans met zo’n noam…) . En die ploegen waren der!! Zeúven! (Volgend joar moet der nog temennent ién bij!) Sportieve jongern, sportieve piepjongern, sportieve oldern, jonges, wichter, deurmekoar! En kom mij nou niet aan met t verhoal ‘wichter kunnen niks…’, flauwekul! Superklasse! Hulde veur ale ZESKAMPsporters die metdoan hebben, jullie waren d’artiesten, de spierkunstenoars, de entertainers, de lu ien t golden liestje!!!
Wat n hindernisboan! Wat n sporters! Ik kreeg al spierpien van t kieken...
Jong, jonger, older.... soamen aan e trek! (Der moet wel even weer wat aan t gras doan worden...)
En kiek es, hier kun je goed zien dat t gien kienderachteg gedoe was doar bij de Dörpsstee! Topsport!
En wat veur onderdeel ok, de ploegen bleven heur best doen, as ploeg!
prachteg dat wotter gooien, de sputters vlogen je om d'oren!
En dat vangen van dat wotter, dat viel niet met! Ze haren doar doch echte toppers veur kontrakteerd, mor die stonnen of en toe ok met e mond vol tanden...
Tot slöt de wotterbak aan t eind van de dubbele hindernisboan, elk ging nat, gien lelk woord heurd... (Ik ben ok wat doof...)
O, sikkom vergeten… De scheidsrechters, de rechtsprekers, op n gemoedelke menier, niet met e mezzen op toavel of t pistool ien e holster. Goed waark leverd, der is, as je goed zuken, best kwaliteit te vienden aan e zuudkaant van t kenoal. Kundege lu, die wieten woar Noordhörn leit… (Hoofdscheidsrechter Michael is vanzulf n old-Noordhörner, die het n perfiedelke tik van e ‘Fortuin’ metkregen…)
Scheidsrechter op e knieën om t wotter te meten...
iek, de arbiters presenteren zuk! Kunnen ze ok even melden dat der begund wordt...
Mooi hè, zo’n ZESKAMP! As ofscheid n ploatje van Sven, n groot talent ien Noordhörn en ien die groag speult, al is t mouwhemd aan e grode kaant. Dat dut niks, doar gruit e wel ien, ien e komende joaren! Dat was de Zeskamp 2009!
Sven, ien van de jongste mannetjesputters, butengewoon talenteerd en aanpeerdjed!
©foto’s: jan blaauw, 20 06 2009
