Jeebeetjes.nl

t Is al sikkom weer zo wied, tied van Nijmeegse Vaaierdoagse! En van feesterij doar in binnenstad! Dizze doagen denk ik der voak n moal aan, kommen aal dij herinnerns noar boven. In 1987 heb k veur d’eerste moal mitdoan, was k nog nait ains zo laank mit wandeln aan loop. Voétballen, dat was mien wereld! Mor ja, dij verropte rechterknije… Dokter in Stad zee dat k mit dij wiebelknijen van mie mor nait meer aan t voetballen mos. Goa mor fietsen of lopen, zee e. Das beter! Bin k begonnen mit haardlopen, op stroat en op sportveld. Kreeg k aalgedureg last van ‘blessures’, dat von k mor niks. Dou wazzen we n moal in Wijchen bie vrunden, keken we noar dat Vierdaagsecircus, dou docht k doar kin k beter aan mitdoun as hiet aan kaande stoan te kieken… Zo ist kommen.
In 1987 eerste moal, alles nij. Raaize doarhìn, sloapen bie vrunden in Wijchen, vaaier doagen lopen op routes dij je nait kìnnen… Gain wait van rustploatsen en zokswat. Nou, dat leerde gaauw. Elk joar mitdoun, eerst allenneg (maank doezenden anern…), dou n poar moal mit Marianne en Gerard oet Limburg, loater elk joar mit Jakob Klompien oet Bavvelt. In 2002 veur t eerst der nait bie, moeke was ja oet tied kommen, begun juli, en hikhakkerij mit gemainte en inspectie was ook ja aan loop. In 2003 wel weer lopen, mit Jakob; t gong goud, al was t stikhait! Dou kreeg k in augustus bericht van Jakob, t is nait goud, weer in zaikenhoes, kanker. Begun november kwam e oet tied, 50 joar, veuls te jong vanzulf. In 2004 bin k doch weer noar Nijmegen goan, al haar k mie slecht veurberaid. En dat heb k waiten! Eerste dag mit regen, dat ging nog goud. Twaide dag mit benaauwde zunne was t n stok  minder, daarde dag was n liedensweg. Piene! Dikke bloasontsteken, dou k in Wijchen weerom was, was k zo zaik as n hond. Dokter derbie, streep deur Vierdaagse… Schane! In 2005 zol k vannijs mitdoun, mor dou heb k zulf op t leste ogenblik ofzegd, t zat ‘organisatorisch’ nait hailmoal goud. Leste joaren wol t mit kop en lief nait zo goud meer, op dij laange ofstanden, mor k bin der nog nait vanof, van dij Nijmeegse Vaaierdoagse (en dij 4Doagse nog nait van mie…) k Leuf dat k mor weer ains eerns begun mit wandeln. Zo wat oetstellen tot n volgend leven, dat vin k aiglieks ook ja niks…

Eerste dag in de Vierdaagse van Nijmegen, 1995. Regen op de Dag van Elst, maar de stemming leed er niet onder! Links van mij Meilo Miedema uit Dokkum, rechts Jakob Klompien uit Baflo