Jeebeetjes.nl

Girls from Scheemda, Mädchen aus Scheemda, Scheemter wichter….
Schier ploatje! Twij Scheemter wichter en n peerd, aan raand van Scheemde, zo’n viefteg joar leden. Peerd kìn k nait bie noam, wichter wél: Dineke Arbeider en Antje Wol! Dineke zat leuf k bie mien bruier Hemmo in klas op d’ULO, Antje bie mie, was wat jonger as Dineke. Ploatje is nait van mie, van Hemmo, dij zel m wel schoten hebben mit zien eerste camera, of mit mienent, ploatjes binnen vaaierkaant. Van Dineke wait ik nait zo veul, ik hoal dij femilies ‘Arbeider’ voak ook deurmekoar…. Antje was n dochter van boderieder Wol, woonde achter t postketoor aan Poststroat in Scheemde. (Boderieders Wol wazzen mit heur baaident, is ook zo! Anere Wol haar Tiny as dochter en Aelko as zeun…) Antje kon schier leren, haar n goud verstaand. Ain annekedote schut mie in t zin: Dou Rob Nanuru op schoule kwam, was e votdoadelk Popy Rob. Haar dou ook n beetje verkeren mit Antje, zaten wel ains noast mekoar in klazze. (Dat was mie wat in dij tied…) Gaf wat lewaai en dou zee leroar Van der Woude, lagend: “Beetje kalm aan, anders moeten we de bokken van de schapen scheiden…” Veul meer wait ik der nait van, ik was dou ook veuls te schieterg. Bruier Hemmo nait, twij joar older, beetje James-Dean-type in dij tied. Docht e…. Vraauwenversierder woar k van ofstaand noar keek. Laip ook wel ains nait goud of, dat zag je dìn ook… Mit dizze wichter het e nait wat eerns had (mor ik wait ook nait alles…) Woar dit is? Aan raand, mor woar sekuur? Vertel t mie mor…

Bruiloftsgasten op 28 augustus 1959, achter Niesoordlaan 59, Midwolda

Joa, ik wait t, dit ploatje heb k al n moal eer zain loaten… k Heb mien zuster Gepke der nog even noar vroagd. Viefteg joar leden, mit n dag of wat. Traauwde mien zuster mit ‘heur’ Fré de Vries, oet Scheemdermeer. Joarenlaank verkeren, mor Fré kreeg TBC en dat was n beste streep deur reken. Fré noar ‘Beatrixoord’ in Appelscha, mien zuster, in oplaaiden veur ‘zuster’, derachteraan. t Kwam aal goud, bruloft op 28 augustus 1959. Waarme zummer…. Manlu haren t in hoes ook wat aal te benaauwd kregen ducht mie. ‘Floris’ knipoogt. Hai is nog nait zo laank leden oet tied kommen, in Scheemde. Jongere bruier van Fré, Héndrik. Swoagers Andries Kingma en Henk Bultje zitten der ook wat oetblust bie. Wicht veuraan kin k nait thoes brengen. Ria, zus van Fré? Ducht mie nait. Moakt ook nait zo veul oet. Klapstoultjes kwammen bie Tjakko Brouwer vot, aan Hoofdweg in Midwolle, café Brouwer (loater Siemens). Mooi vin k dij olle regenbakke, woar we voak even op zitten deden. Of roupspelletjes deden, mit ‘echo’… (Joa, ook dije van Beethoven…) Mien pa wol der ook n moal jongkatten in verzoepen, mor dat het e oet kop loaten dou wie n keel opzetten deden…. (Zel e wel noar t Koudaip goan weden..)

Nou binnen we sikkom 50 joar wieder. Kommende vraidag is t viefteg joar leden dat mien zuster Gepke traauwde mit ‘heur’ Fré…  Der is n bult aans worden. Fré is schane genog nait veul meer, zit in tehoes, in Azzen. Hailemoal in toeze, ‘dement’ nuimen ze dat. Zien lief wil ook nait meer, hai slept bienoa aalweg. Van traauwerij het e aal laank gain wait meer. Mien zuster wél. Dij is nog goud bie, k bin wies mit heur, al kon k heur dat wel n moal voaker vertellen… Zai het al hail wat mitmoakt en wordt ook nait zunder pien older. Mor zai zet deur, het n nije laifhebberij: ‘koartjes moaken’.  En ze gaait nog aaltied steevast noar ‘heur Fré’, in t tehoes. Vraidag ook, mit n zulfmoakt koartje:  50 joar traauwd: Gepke Blaauw - Fré de Vries!

Pa als onze huisreparateur, alleskunner in de ogen van de kinderen

Mien pa in beeld, achter t hoes woar we nou nog wonen doun. Haalfweg joaren zeuventeg. In 1977 is e oet tied kommen, nog nait ains zo old: 72. Joaren waarkt op ‘De Toekomst’, strokartonfebriek bie Scheemtermeer, aan kaante van Midwolle. Knooid as hollander-mulder, in schiften. Dou t in joaren zesteg mishottjede mit dizze stroketonfebriek en boeren gain zin haren in aanpazens, ging bedrief op slöt. Pa hoalde in ‘69 zien pensjoen, hebben ollu nog n poar schiere joaren had. Of en tou zulfs n weke op vekaansie, noar Troelstra-oord of zokswat. En of en tou noar ain van de kinder, ook bie ons in Noordhörn. Pa was gain mìns om aalweg op stoule te zitten, hai mog geern wat doun. In toene bevöbbeld, hai kon goud mit rozen. Asmits fietsen noakieken, ook dij lutje dingen van onze beudels, zo as hiér. Geduldeg, gain gedram. Gain geransie veur n laank leven; in ‘77 lait t haart hom in de steek. k Was der net aan tou om méér mit hom te proaten. Kans verkeken…

Optaikend: 12/08/2009

Boelwijna Blaauw-de Groot voor het huis aan de Schortinghuislaan, plm. 1950

Mien moeke, mooi ploatje. Bie veurdeure van t hoes aan Schrtinghoesloane, nummer 11. Dij deure wer sikkom nait broekt, elkenain ging achterom deur schure hìn. In dit hoes bin ik op wereld kommen, in ‘45. Hemmo is van ‘43, dij is geboren in t hoeske aan Hoofdweg, bie Van Anken zien boerderij. Aan Schortinghoesloane (woningbaauwloane zeden wie aaltied, wie haren ja ook niks mit dij vrougere domie…) hebben mien ollu zo’n 10 joar woond, van ‘43 tot ‘53. Dou wer der weer inpakt, gingen we noar nijbaauw aan Nijssiesoordloane, nummer 59. Dit hoes in woningbaauw was n spannend hoes. Grode schure mit swienhok en zoiboi, en n zolder woar we nait kommen mochten…. In koamer lagen kokosmatten mit zaail aan kaanten. Kon je best op speulen mit autootjes en zokswat, en mit n bromtol en ander draaispul. Bromtol kon k wel aalweg mit bezeg blieven, luustern noar meziek dij deroet kwam, net filmmeziek. Oetrektoavel in t midden, kaggel bie schösstaine. As t min weer was, mit dunder en bliksem, zaten we om toavel hìn, blik mit pepieren op toavel, onner moekes haand mit widde knokkels. Op foto is ze vatteg, vievenvatteg joar. Ze het der wel stroalender oetzain, haar voak wat, is aan alles wat aan en in t lief zit opereerd. Zai is wel 96 worden, binnen schienboarlieks goie sniedokters west… In 2002 kwam ze oet tied, óf, oetleefd. En doch mis k heur.