Aardrijkskundeschrift uit klas 5/6 OLS Midwolda, 1956/1957
Ien Nuus binnen Okkie en Alex aan e proat op Radio Noord met lu die te moaken hebben met SWET5, mor k heb der nou wel even genoeg van…. Of en toe zitten z’op alternetieve poaden en ben ik ien elks geval de weg volsloagen kwiet, de radio mor even uut.
Vaalt me der n schrift in hannen oet mien legere schoultied, joaren viefteg, in Midwolle aan Hoofdweg. Heb k ja wel voaker over verteld… Wat zo’n ol schrift al nait doun kìn… k Zai miezulf weer zitten op baanke in zo’n laange riege, kop derbie. Broen kaft moakt om t oardriekskundeschrift tou en doar mog je dìn schiere letters opzetten en inkleuren. k Haar puntje van mien tonge nait oet mond hangen, mor t scheelde nait veul… As k t schrift opendou, kommen der nog veul meer herinnerns te veurschien. Aan Beno Doedens, noast hom heb k leuf ik zo’n beetje de haile schoultied in baanke zeten. Aan Jan Harm Gernaat, Tineke Kampstra, Ankie en Pia Botjes, en nuim ze mor op, Liena Fokkens, Liedeke Zijlker, Riekje Struif Bontkes… Aan ain kaande koartjes, aan aner kaant noamen van ploatsen, landen, streken… “Bodemgebruik“, staait der, en “Klimaat”, “België/Luxemburg“… Stokjes overtrekpepier, verbeterns mit potlood. Ook n bult kraandeknipsels: “Leuvense studenten veroorzaken relletjes…”, Monte Carlo, “President Coty groet het Nederlandse volk”, “Licht en Luister langs de Loire
Opatija (Kroatië), meer dan 50 jaar geleden...
