Nije Kreuze, nummer 21! November 2009, n bult verhoalen, gedichten, verskes en aner toalspul! Mit biedroagen van lu as Jan de Jong, Jan Sleumer, Jan Hoiting, Hanne Wilzing, Ineke Bouwman, Klaas van Zonneveld, Tineke Boer, Hilda Schipper, Roel Sanders, Giny Hartman, Geert Zijlstra, Cor Uildriks, Anna de Vries, Nane van der Molen, Fennie Croeze, Eelke Solle….. Joa, en zulf heb k der ook wat in schreven, in t Westerketiers en in t Oost-Grunnegers. Goa mor gaauw even kieken op www.kreuzekeuze.nl! Henk de Weerd het der as opmoaker hail wat schiers van moakt!
Veurblad van Kreuze 21 as rondzendbraif....
n Veurbeeld van wat der in staait? Neem nou mien gedicht:
Aanslag
In mien onthold zitten twij haarde knallen
overnomen oet verhoal van kind van dou
man in Duuts pakje zit op knijen rerend
voeste omhoog grift in kop van mie nou
oorlogstied komt bie vloagen aanwaaid
t liekt dat herinners al veur geboorte
ontstoan binnen inplant in kop van dou
zaikenwoagen ridt langzoam noar nou
aanslag veur t kantongerechtsgebaauw
in ’43 veraltereert schoulgoande kinder
nou nog mit twij haarde knallen achter
heur ogen in rógge zain ellèn van dou
in zaikenhoes komt aanschoten SD’er
oet tied onnerwaarp van stille proaterij
bie groten en lutjen van dou op raaize
deur tied mit open oren van mie nou.
Jan Blaauw
Opm. Schreven over d’aanslag op plietsiechef Derk Klavers in Zuudhörn, september 1943.
