Joa, wie binnen dunderdagoavend noar Scheemde (= Scheemda, je mouten tegenswoordeg ook ja alles omtoalen…) west, mit Riekus. Welke Riekus? Riekus Niewold! Woont nou in Hoogkerk, mor hai is groot worden aan Oosthofloantje bie strokertonfebriek “De Toekomst“. (Joa, dat wait ik, olle febriek is ofbroken, nije wordt opklanderd). In Scheemtermeer, Midwolmer dail. Zien pa en mien pa hebben zok doar joarenlaank in t swait waarkt…
Riekus het ons oppikt bie t stoatsion in Stad, reden we zo noar Scheemde. Dochten we. Wazzen zo aan t proaten… zaten we sikkom in Kloosterholt……..
As we der binnen, bie d’Esbörg in Scheemde, gaait der aaltied éven n biezunder gevuil deur mie hìn, wáárm. t Is dubbel. Stappen je doar dat dörpshoes in, stap j’ook zo joen verleden in, nou en dou, soámen. Grode zoal lopt schier vol, maist oldere lu, mor doch ook best wat jongern, vaalt nait tegen. En aaltied wel bekenden: Gé heur neef Eildert, heur vrougere buurjong Bert; Heijo en Dina dij al joaren bie mekoar heuren, deden z’aaltied ook bie t korfballen, bie Korulos. (Dina zat bie mie in klazze, op d’ULO, wat hebben we doar n bult lol had, zai was mit veursprong de giebelkampioen!) Veurzitter Jan Groenbroek is vanzulf ook n bekende. Nait allenneg van ‘Toal en Taiken’, mor ook van voetbaljoaren bie vv Scheemde, geel-zwaart. Mainsttied speulde Jan G. linksboeten en Jan B. linksbinnen, n enkeld moal ook aansom. Konnen t wel mit mekoar vinden. Bie onze disco-oavends in jeugdherberg lainden wie ook aaltied singels van Jan, ploatjes van Cliff Richard. Bevöbbeld “Do you wanna’ dance”, nou dat wollen ze wel, doar in dij tied! Benoam as der meziek was van Adolf Robertus en zien orkestje, kom, hai haide dat nou… Kin der even nait op kommen…
Kiek, doar is good-old Daan Gloazenbörg ook, even n haand geven, proatje moaken. Hai gaait dizze oavend weer wieder mit zien dia’s. Veurege moal binnen we steken bleven in Stoationsstroate, kinnen we zo weer droad oppakken. Eerst n kop kovvie en hoesholdelke mitdailens, van veurzitter Jan, mor ook van puutholder Meedendörp. Was al drok aan t oetdailen, haar aal zien sievers op pepier zet, zag der schier oet dat zag k zo wel, gain spèlle tuzzen te kriegen. Kaskemizzie lukte dat ook nait, zee Gerard Grimmius. Dij zit doarin, in dij kemizzie. Lu in zoal wazzen der wat bliede mit, begonnen al te klappen dou veurzitter nog niks zegd haar. Riekus zit in volgende kaskemizzie, hai het wel wat mit Scheemde en mit sievers, en mit zien eer en gewaiten zit t ook wel goud…
O joa, dat zol k verd…. hoast vergeten: der is aine in t zunnetje zet (joa, t was flitslicht, dat wait k ook wel…) Jan Nieland, kreeg mie doar n bos bloumen, prachteg! En woarom? Hai is t 400ste lid van de Historische Verainen Gemainte Scheemde. (O, kiek, heb ik doch wat vergeten te vroagen…. Hou wordt dat as der vanof 1 jannewoarie nije gemainte is: “Oldambt”?)
Rondvroag was der vanzulf ook, mor hail slim rond ging dat nait. Hailemoal veuraam wol aine nog wat waiten over n daarde lezing (mor t bestuur wil laiver n oetstapke) en over n project over olle boerenschuren dij stoan te verkommern. Of doar gain ‘gewone, kundege leden’ bie zitten mochten? Nou, dat zel wel kìnnen, mor hail bliede kwam dat der nait oet. Je mouten wel wat van ‘gebinten’ wait hebben. Kinnen ze mie oversloagen….
Kovvie! En n schiere bak vol, lekker! En dou kwam Glazenborg in t ìnne mit zien dia’s. Stoatsionsstroate, nij kenoal, nij brogge, Kenoalweg, Paarkloane, Wiekstroate, Kwekersloane, Boedeltje zien hoes, Spoorgat, Zwoan en Wiljes, Ten Hoave, Hoza, Acheson….. Laangeweg ook , doar is Gé groot worden, zwembad derachter, mooi dichtbie. Nait allenneg ploatjes binnen muite weerd, nog veul meer de proatjes van lu dij t waiten en denken te waiten en voak deur mekoar hìn. Levende historie! Schane dat t doan was, wie mozzen ook vot. Hebben nog even proat mit Geert Mellemoa, woonde aan Daipswale, ston in doel bie Scheemde, joaren leden. En Kok was der ook, en Klaas van Zonneveld, dij schrift ook voak wat Grunnegers, in ‘Kreuze’.
Prachtege oavend! En wie goan ook nog gaauw n moal bie licht noar Scheemde, beter kieken wat ze doar aalmoal oetspookt hebben in leste vatteg joar. Goan Heijo en Dina ons ‘gidsen’, dij kìnnen Scheemde (en Eexte) as heur boksembuutse.
Historische Verainen: BEDAANKT! Wie kommen wis en vast nog n moal weer (as t meugelk is…)
Febriek van Zwoan en Wiljes, ston ook op dia van Daan!
Olle zwembad van Scheemde, dierboare herinenrns!
Nij kenoal en brogge, schiere taikening, mor k wait nait wel hom moakt het....
Foto 1: collectie Ben Doedens
Foto 2: collectie Jan Blaauw
Foto 3: collectie Jaap Appeldorn
