Jeebeetjes.nl

Of e t red het? Ik wiet t niet, ik hoop t wel! De swoan die k eergusternommedag ploetern zag ien t Van Starkenborghkenoal, ien t stuk tussen de spoorbrug en Noordhörner Tolhek. Ongelieke stried…

De wilde swoan, hielemoal ien zien uppie, maank de iesschollen van t kenoal...

Ik denk dat t n wilde swoan is, gien knobbelswoan, mor zeker wieten doe k t niet… (Ik hol van vogels van verschilnde ‘pluimage’, wiet der ok wel iets van, mor niet zo hiel veul…) t Beroerde was dat t dier middenien t kenoal bezeg was wieder noar t westen te klautern. Helpen is der dan al hielemoal niet bij, wat kun je trouwens doen? Op zo’n moment vuul k mij machteloos. Joa, ik kon der n ploatje van moaken, mor… t Beest heurt ok niet hartje winter ien zien uppie maank t ies te ploetern, das gien doen. En woar waren d’aandern? Ien gien velden of wegen of wotter te bekennen… Even loater zat e wel ien n open stukje kenoalwotter, hè, hè…. Zunder dier in nood is zo’n stuk kenoal n machteg mooi gezicht! t Geweld van aal die iesschotsen, ’schollen’ zeiden wij dertegen ien Oost-Grunnen. Kleine stukken, grode lappen, verschillende vörmen En dan af en toe n boot derdeur, die bennen ok wat mans tegenswoordeg: 2700 tun, 3000 tun…. Ast niet zo kold was, haar k wat langer keken. Winteroren, wintertonen, pardon, wintertenen… Gauw noar huus!

Een beetje open wotter veur de swoan, hè, hè...

©foto’s: jan blaauw, 26 01 2010

En dan kom je bij zo’n bushokje, zo’n moderne die je niet zo mor ien diggels timmern kunnen (allewel…), en dan zie je doar n allerschierste jonge vrouw, ien bikini (nou -ién-, meer deraan…), en volgens de tekst moet dat dan Inge de Bruijn wezen die aan mij n vroag stelt: Of ik kloar ben veur de zummer…..

Inge de Bruijn wil wieten of jim al kloar is veur de kommende zummer, ze stelt veur om nat te goan....

Nou, ik heb wel iets laanger keken as ik aans doe, bij bushokjesrekloame…. Zit je doar middenien n winter van je hela hola met superdiepvriestemperaturen, liggen de snijresten nog op hiel wat steeën, dudelk te zien, goan ze doar Inge de Bruijn bienoa ien heur blootje t risiko lopen loaten van n fikse longontsteking… Ik von t wel n levenslustege jonge meid, mor k haar eerst niet zien dat t Inge was, ónze Inge, nou ja, onze ex-Inge, die Olympische Speulen bennen ja al weer hiel wat joaren achter ons. Wanneer was dat? Ien 2004? Toen zwom ze me doar doch n poar spectaculaire wedstrieden, met gold bekroond! Geweldeg! Mor nou ik dit portret zie, denk ik: dat kon doch nooit met dizze dunne aarmkes en kiek ies noar die benen, nee, even zunder gekheid: dat bennen doch niet bepoald golden zwemmersbenen. Ben je kloar veur de zummer, stijt der, ien t Engels, aans verstoan we mekoar niet meer tegenswoordeg…  En dan ok nog: LET’S GET WET! (Dat uutroepteken is van mij…) Zunder bijbedoelingen: loaten we es n nat pak hoalen, en dat het met die SAPPH te moaken. Wat dat is? Nee, gien frisdrank, gien ‘energydrink’… Het zal wel met die bikini te moaken hebben. Textiel is vannijs op de bon en hoe kun je dan met weineg stof doch nog wat toonboars ontwerpen? En dat stijt Inge doar te ’showen’, sikkom ien heur noakie bij n gevoelstemperatuur van -10 tot -20 groaden…. Nou, veuruut dan, toen ik verder ging, was mién gevoelstemperatuur boven nul! Die Inge….©foto: jan blaauw, 26 01 2010

Wat is dat doch aigelks? Heb ik mie moandenlaank veurholden: Begunst nait weer aan dij voetbalploatjes! Loatst die gain ekstroa euro’s oet de buutse kloppen deur dij grootgrutter oet de Zaanstreek! Wat kin die dij eredivisie schelen? Mor ja…. Is d’eerste dag der van dij glinsternde zakjes mit ploatjes, bin k al verloren….

Voetbalploatjesalbum van AH, 2010..... Versloaving is der in veul soorten...

Veurege weke las k t aargens: de nije voetbalploatjesaksie komt der weer aan, start op 25 jannewoarie! Dou begon t al te kriebeln… Zotterdag heb k nait veul bosschoppen mitnomen, k haar ja twij puten mit WCpepier en dìn binnen fietstazzen al sikkom vol… (Mor in mien achterheufd docht k al laank: allain wat eerlieks neudeg is, aner spul kin volgende weke wel…)  Ik denk dat t n soort van hamstern wordt, de kommende weken. Onze veurroad wordt pico bello aanvuld. Kovvie? Veur moanden genog! Tandpasta, thee, sokkeloa, flezzen wien…. En dat aalmoal veur dij 271 ploatjes dij in t nije album plakt worden mouten en nog sekuur ook…. Dubbeln heb k ook al, bin je nog nait ains goud op glee: embleem van Ajax (mor wel wil dij nog hebben tegenswoordeg…), André Oijer (n PSV-Amsterdammer, het ook niks over…) , Ruiz van Twente mit zien laank hoar, Sander van Gessel in n Spartahemd, liekt ook naargens op, en El-Akchaoui van NEC, schiere speuler, kon zo bie de FC mitdoun… k Heb ze mooi in n deuske doan, kon je derbie kopen, dat deuske, veur €1,49 (zeg mor anderhaalve euro…).  Dat album zugt der rommelg oet, overal ligt wat in dij klaidkoamers, op de grond, op de stoulen… Ze haren de boudel doch wel wat oproemen kìnd veurdat ze der n foto van muiken? En dìn heb je bie d’aine verainen wel noamen derbie en bie d’aander nait. Bie Ajax wel noamen, mor dij kìn k oardeg schier; bie RKC gain noamen, bie Roda n poar veurbeeldploatjes… O, mout je ook nog noar www.ah.nl/voetbalplaatjes? Veur de biezundere verhoalen van de voetballers? En ruilen via Hyves? Doar begun k nait aan… Aha, je kinnen nog wel even stemmen, stemmen is IN vandoag de dag (denk mor aan de gemainteroad, de ANWB, de Telegroaf, Mary Poppins….) Je kinnen stemmen op voetballers van wel nog n ploatje moakt worden mout: van Blind vanzulf, dij voetbalt nou ja bie de FC!

d'Eerste vief ploatjes dij k inplakt heb!