Kreeg n foto toustuurd van Harry Perton noar aanlaiden van t veurege ‘blogje’, over de schoulraaizen en t verblief in t Hunehuis, dat schiere Natuurvriendenhoes bie Darp en Havelte. En bie de Johannes Postkazerne en t oefenterraain….. Foto ken ik, hebben we voak as koartje stuurd noar hoes en noar anern, dat heurde derbie, bie zo’n schoulraais…
Het Hunehuis, Natuurvriendenhuis nabij Havelte, schoolreisverblijf
Pracht instellen, zo’n ‘Natuurvriendenhuis’, niks nait achterhoald, wel moderniseerd. Hebben ook muite kop boven wotter te holden. Wie hebben der geern gebroek van moakt, vanof twaide helft joaren zeuventeg. Om de twij joar, asmits om de drij joar. Dat haar te moaken mit de kombinoatsieklazzen, gingen we ook wel noar “De Hondsrug” bie Noordloaren, of noar dij verbaauwde hoesholdschoule bie Bakkeveen. Aaltied op stee en op gaang holpen deur hoeswachten, ervoaren noatuurvrunden, dij ook wel wat van kinder velen konden (al mozzen de kinder t ook weer nait aal te bont moaken….) In ‘t Hunehuis slaipen wie aaltied in t nijere dail achteraan. Duurde wel ains wat laank veur t rusteg was, ging k der mor bie zitten op gaange, dat hólp (op den duur…) Speulen kon je der best, veldje veur t hoes, bos stoefbie, en dij grode stainbulten (’hunebedden’) ook nait wied vot. Speurtocht mit rooie droadjes was nooit n probleem. Der mos wel genog edukatiefs op t programmoa, aans mochten we nait vot, van d’inspectie. Loater gingen ze doar aal makkelker mit om, mor wie hebben doar doch laank haand aan holden. Op fietse noar Frederiksoord (toenbaauwschoule en klokkenmuseum) en bie Vledder laangs weerom. Laange tocht noar de Wieden, doar haar k t guster al over. En de ‘bonte oavend’ vanzulf! Feest! Pantomime en bingo en aan t ènne t traaingebeuren. Onvergedelk, mor voak wel wat wegdrokt… Even teveurschien hoalen, beetje oppoetsen, is t weerd!
