Ainrom? Doar kommen we nait zo voak, schane genog. Schiere stee om te weden, liekt mie. Ainmoal in t joar goan we doarhìn, mit ‘taxi’! Joa, dat komt zo, ik zel t even oetleggen, aans kommen der ja weer aal van dij niedske verhoalen in de wereld… Vrunden van ons, Hinnerk en Tiny Zielstra oet Zuudhörn, dij goan elk joar noar toneel in Ainrom omreden heur olste zeun mitspeult (en dat dut e geweldeg leuf dat mor van mie!). Zai binnen baaident nait de jongsten en benoam Tiny het heur snelste tied op de 100 meter wel lopen. Doarom hebben zai recht op n taxivergouden en wie goan dìn mit as begelaaiders, om deure van zo’n grode auto even open te holden. En dìn binnen we mit ons vaaier mooi op stee, luxer kin t ja nait. Wie stappen bie Sander en Sieneke aan de Kerkbuurt oet, kinnen we zo t hoes inlopen. (”Oetkieken, stöt dien kop nait…”) En dìn proaten w’even bie, n joar is ja niks, en wichter van v.v. Hunsingo binnen sikkom kampioen en hebben ook ja nije sponsorhemden. Rooien, dat heurt bie Hunsingo. Wordt t tied om noar t Dörpshoes te lopen, dat doun w’op ons dooie akkertje, Tiny geft t tempo aan. Lopen al meer, Ainrommers kinnen goud klok kieken en holden dervan op tied te kommen, teminnent de 55plussers, doar heuren wie dij oavend royoal bie… Veur daarde opainvolgend moal kinnen we eersterangs zitten en dat doun we ook. t Zoaltje van d’olle schoule lopt schier vol, das ook ja goud veur de KOMEDIANTEN, zo haiten dij speulers van de toneelclub. Vanoavend speulen ze “HEBB’N IS HEBB’N EN KRIEGN DE KUNST!” (Ik hol nait zo van aal dij komma’s, Siemon Reker ook nait, t mout aigelks weden: “HEBBEN IS HEBBEN EN KRIEGEN DE KUNST!” mor doar goan we gain toustanden over moaken….)
Gedailte van veurkaant van t programmablad, 25 meert in Ainrom
Wel ‘regisseur’ is van t stok? Dat is Jans Huzengoa! Dij het der slag van, het vrouger joarenlaank mitspeuld. t Veurzeggen dut Grada Rozema, zai staait aan ziekaant bie t podium. Zugst der niks van en heuren? Nait as je wat doof binnen….
Woar t dizze raais over ging? Hou kin k dat nou n beetje ‘compact’ holden? Sander is in elks geval boer Berend Kamps dij nait geern van t geld ofwil en 10.000 euro in t kontbuuts het woar zien vraauw al doagenlaank noar op zuik is… Trui, Kamps zien vraauw, wordt speuld deur Gretha Werkman, loat dij mor scheuveln. En dìn lopt heur dochter Lies der ook nog rond (Ria Zeef), al is ze laiver bie heur vrund Hans (Ricky Rozema), dij n tankstation overnemen kìn mit n hoes derbie. Hai komt sekuur 10.000 euro tekört, mor Kamps en zien vraauw willen dat vanzulf nait geven, in t begun. (Kirrels heuren geld in te brengen, nait deroet te hoalen…) O joa, en dìn hebben we ook nog Opoe, moeke van Trui (Magda Lamferink), dij oet Twente verhoesd is noar t Noorden, kin je nog wel n beetje heuren. (t kin ook Sallands wezen…) Opoe het t mainste inbrocht, doarveur mag ze d’haile dag op bère liggen…. Der mouten ook gounent wezen dij t waark doun vanzulf: Hinnek (Niek Grommers), de knecht, dat’s n loze. Begunt elke waarkdag mit n zeupke, as dat gain ollerwetse ‘doping’ is…. Hai krigt dij van Riekie, de hoesmaaid (Margriet Bos), op wel e vaalt en dat vaalt al gaauw op.. En dìn scharrelt der ook nog n dokter (Greetje Baars)in t stok rond mit dikke spoiten en toenslaangen om moag van Kamps leeg te pompen en holdt Jansen as veldwachter (Thomas Benes, veurzitter van de toneelclub) de haile boudel in de goaten, benoam de vlezze mit jonge kloare… O joa, k zol de laandloper Jochum Mulder hoast vergeten: Tjip Werkman. t Veurnoamste is dat de 10.000 euro van Kamps via n blik spinoazie bie vrund Hans belanden, dij z’ook nog weerom brengt… Nou, betere schoonzeun kin je nait hebben! Der binnen vanzulf veul meer verhoallienen (landloper komt in t lege swienehok, woar e oetjagt wordt deur opoe dij loater n boske bloumen krigt, mit brannekkels derin, braandt ze heur neuze…; en Kamps trapt in zien aigen vale, as hai zulf en de veldwachter t bier opdrinken woar sloappillen inzitten…Dokter spoit Kamps weer tot leven…)
Och, ik kin der nog wel meer van zeggen vanzulf: Sander is n geweldege boer Kamps mit slim veul tekst en meneuvels, Niek Grommers is n grandioze knecht, speult zok zo in de kieker! Dat Joop van der E. nog nooit in Ainrom west is…. En dij Riekie ook. tjongejonge, zegt de boudel net even verkeerd en din komt weer goud. Ach, ze binnen apmoal klassespeulers, opoe ook, poeh! Wie hebben ons fantastisch amuseerd, t was gezelleg en wie hopen der volgend joar weer bie te wezen! (En t mooie is, doar wordt ook aaltied t Grunnens Laid zongen, as opmoat noar t toneelstok!). KOMEDIANTEN (Ainrom), bedankt!
