Archive for 11:30

« Older Entries

KREUZE 24, rondzendbraif of www.kreuzekeuze.nl

11:30

Nije KREUZE is oet, nummer 24. Schier op tied, Kreuze-opmoaker Henk de Weerd is n weke op vekaansie en wol t spul geern veur zien votgoan deure oet hebben… (As w’in de gaauweghaid wat vergeten binnen…. neem t ons nait kwoalek…)
Dizze raais benoam verhoalen, körten en laangen, binnen wat minder gedichten instuurd. (Nou, volgend moal dìn mor, in de zulvern Kreuze). Henk de Weerd het t eerste dail bewaarkt van indrokken oet Amerikoa over d’oorlogstied, Jan Sleumer en Co schreven n steveg stok: “Zunder Moudertoal”, goa der mor even veur zitten! Verhoalen ook van Jan de Jong, Jan Hoiting, Nane van der Molen, Klaas van Zonneveld, Roel Sanders….. t Twaide dail van “De dood van Vera R.”, van Jan Huttinga!!! Staait doch hail wat in, in zo’n KREUZE! Kiek ook mor even noar Bé zien verhoal over Geert Moatjes en Harmke, ien t Westerkwartier!
Doch nog hail wat gedichten ook, van lu as Jan de Jong, Jan Sleumer, Fennie Croeze, Cor Uildriks, Trijnko Pelgrim….. En van miezulf:

Oorlogstied

In dizze tied van vree en vrede
is d’oorlog vannijs op batterij.
Zingt zanger mit brok in keel
dat gain hond levend votkwam.

k Heur n stentorstem de stried
aangoan mit t onbegriepelke
van vief swaarde joaren, inpakt
in vroagtaikens en nije oetgoaven.

In tied valen vlaigtugen tou locht
oet, goan zulfmoordenoars aigen
en anermans dood tegemuide,
binnen verkaizens verneukerij.

En wie mit eernse gezichten, wie
mainen t ja, mekoar stilzwiegend
aankieken, op achtergrond vlage
en volkslaid: ‘Dát nooit weer!’
Jan Blaauw

KREUZE 24, kin j'ook vinden op: www.kreuzekeuze.nl

KREUZE 24, kin j'ook vinden op: www.kreuzekeuze.nl

Wil je nije Kreuzes in joen mailbox? Dìn even n stroombraifke noar jan@kreuzekeuze.nl. Je kinnen vanzulf ook noar: www.kreuzekeuze.nl. Veur nummer 25 van Kreuze geern joen biedroagen veur 25 juni noar jan@kreuzekeuze.nl of noar henk@kreuzekeuze.nl. Kom mor op mit joen verhoalen, gedichten, verskes, taimkes, braiven, opstellen, beschaauwens en wat aal meer! En vanzulf nait wachten tot leste dag….. (En woar binnen aal dij inzendens veur de Schriefwedstrieden aigelks bleven?????????????)

Posted in Nijs en nijtjes | No Comments »

TOAL EN TAIKEN - Tiedschrift veur Grunneger Kultuur - 28ste joargang - nummer 2

15:57

Joa, nije ‘Toal en Taiken’ is der, nummer 2 van 28ste joargang (meert/april 2010). Mit dij klaprozen (én korenbloumen) van Maya Wildevuur op veurkaande. Prachtnummer mit veul ploatjes, kin k even mit veuroet! En joe ook! Begunsteger worden? Tel.: 0597 591135, stroombraifke noar toalentaiken@planet.nl waarkt meschain nog beter!

Nije TOAL EN TAIKEN, nummer 2 28ste joargang, meert/april 2010

Nije TOAL EN TAIKEN, nummer 2 28ste joargang, meert/april 2010

Wat derin staait? Sikkom te veul om op te nuimen! Eerst n bult historisch nijs, mit n schier ploatje van de ‘Kiepenkerl’ in Münster bie verhoal van Harm van der Veen (gaait over ‘Schmidt zien braaierij’ in Wildervank, het mien schoonmoeke ook waarkt as jong wicht), en nog veul meer tekst van dijzulfde Van der Veen, over t Knoal, Stad Grunnen en Vraislaand, Jan Siebo Uffen as ‘Marnix van Sunt Aldegonde van t Oldambt’……
Aner historisch nijs van Piet Huizenga (over ienpoldern en n kerkepad bie Zoltkamp), vanzulf ook “Tonko’s Hörntje” (van Tonko Ufkes), dat al laank n eerliekse hörn worden is (o.a. over Grunneger groaven en biebelwoorden) en Harry Wubs over t toukennen van K. ter Laanpries 2009 aan Alex Vissering. Hé, nog veul meer priezen in dizze Toal en Taiken: de Streektoalpries 2009 (veur de Drent Lohues, twijde moal achter mekoar, en veur de Stellingwaarver Veenstra veur zien roman ‘Et geheim van de wiend’, de vrijwillegerspries 2009 in Vlagtwedde, de priezen veur de winnoars van de Schriefwedstried 2009 (mit Henk Bleker maank drij jonge Vlagtwedder wichter, talent zat doar!), de Veurleescup 2010, d’eerste Grunny veur Erwin de Vries….  Fotoimpressies van de Dag van de Grunneger Toal, nije puzzel, en schrieverij van lu as Fennie Croeze, Jan Hoiting, Henri Wierth, Emo Edens….
Och, bekiek t mor zulf, muite weerd!

Posted in Nijs en nijtjes | No Comments »

April-mei, herdenkingstijd, 65 jaar na de bevrijding

19:40

Vievenzesteg joar noa Maai ‘45, herdenken en vannijs vaststellen: “Dát nooit weer!”
Hier ien e vroegere gemeente Zuudhörn ‘doen ze’ der niet zo veul aan, mor der is wel n nij boek uutkommen, en dat is al hiel wat! Ien 1986 kwam t grode boek uut: “GESCHIEDENIS VAN ZUIDHORN”, mor toen was t doch nog te vroeg om openheid te geven over wat der hier gebeurde ien e Twijde Wereldoorlog. t Lag allemoal nog veuls te gevuleg! Nou bennen we zo’n 25 joar verder en hebben n poar mènsen t aandurfd om wèl uut te pakken met verhoalen over Zuudhörn ien oorlogstied. Mooi boek, mor k heb t nog niet uut. (Kiek aans ok mor even op www.noordhorntoenennu.wordpress.com of op www.bloeiendonkruid.web-log.nl).
In mien kindertied in Midwolle wer der nait biezunder veul proat over d’oorlogsjoaren, al was ik wèl nijsgiereg. k Heb der dou al n bult bouken over lezen (vanzulf ook “Engelandvaarders” van Norel en “Reis door de Nacht” van Anne de Vries….), mor pa en moeke haren nait zo veul sproakwotter as t over ‘40-’45 ging. ‘Is wèst. proaten we nait meer over”. Of en tou heurden we doch wel wat. Over stokken iesder dij zo mor oet de locht valen deden, pa lait ze zain. Dou wonen ze nog aan d’Hoofdweg, aan kaant van Van Anken zien boerderij. Over t vothoalen van femilie Bamberg, dij schuun tegenover heur woonde. Lu stonnen der schienboarliek op neuze bie, mor konnen der ook niks aan veraandern. Moeke kreeg nog n Biebeltje in hannen drokt van vraauw Bamberg. Loater hebben de noabers t hoes al vast wat leeghoald, Bambergs haren der ja doch niks meer aan…. Over de Bevrijdingsdag in april, dou d’NSB’ers oppakt wörren en der frustroatsies vrij kwammen. Over goien en slechten, wos je dou veul…. In elks geval nait wat je nou waiten… Meester Zonderman vertelde der op schoule ook wel ais wat over, mor doar kin k mie nait veul van herinnern. Ain ding nog wel: ‘De Silbertannemoorden’…. De vergeldingsaansloagen van de Duutsers en heur Nederlandse moaten. Bie aine ging t mis, dij dee net of e roakt was en kon t loater noavertellen.  
Moeke wol nog wel ais vertellen over Drijbörg en Nij Beerte, over domie Ader, dij zoveul onderdoekers holpen het en loater pakt wör, vast zat en dou doodschoten wör, laiten z’hom uren laank aan kaande van weg liggen, aargens in t midden van t laand. Vraauw van domie Ader, zai was zulf ook domie, het der n bouk over schreven: “EEN GRONINGER PASTORIE IN DE STORM”. k Heb t lezen, loáter, of en tou sluig k wat over, stoan slim veul Biebelse spreuken en verwiezens in, God zulf kon der wel deur in toeze kommen… Veur mien moeke was domie Ader n haailege, al was e nait rooms. Ader kon goud opschaiten mit opa en opoe dij op Ol Diek wonen deden. Opa Drijbörg was n eerliekse SDAP’er, mor doar kon domie Ader wel mit overweg. Opa het joarenlaank boerenaarbaaider west, ook bie dikke boer Ebels dij zok aansloten haar bie d’NSB en zulfs dou de Polen aal sikkom in t dörp wazzen nog berichten deurgaf aan de Duutsers. Ebels is dou z’hom pakken deden  deur de bevrijders standrechtelk doodschoten. Kon mien opa nog begrip veur hebben, nait veur t doodschaiten van Ebels zien vraauw en kinder. Wol e nooit meer over proaten…
Wat n tied, wat n ellèn… Goud dat we herdenken, mit t schoamrood om de mond. Goud dat we ‘bezinnen’:”Dát nooit weer!”

Voorkant van 'Een Groninger Pastorie in de Storm', in 1974 voor het eerst verschenen bij Wever, Franeker

Voorkant van 'Een Groninger Pastorie in de Storm', in 1974 voor het eerst verschenen bij Wever, Franeker

Posted in Teksten (Grunnegers) | No Comments »

DUVEKOATER 45, tijdschrift voor regionale historie

20:57

Nije DUVEKOATER is der, nummer 45, van april 2010. Joa, t hait nog aaltied n oetgoave van de “Historische Vereniging Gemeente Scheemda”, ook al bestaait dij gemainte nait meer, opgoan in gemainte ‘t Oldambt’, mit Winschoot, Finderwold, Beerte en Schanze. Of der n nije noam kommen mout? Ik lig der nait wakker van, loaten ze t mor “Historische Vereniging Scheemda” nuimen. Of zollen ze dat in Midwolle en Nijwolle nait proemen? t Is ook aal wat….

Voorplat nieuwe DUVEKOATER, nummer 45, april 2010

Voorplat nieuwe DUVEKOATER, nummer 45, april 2010

Wat der in dij nije DUVEKOATER staait? Nou, op t omslag eerst al n geweldeg schiere ploat van d’Oosterstroade. Mit t olle veurhoes van TerHoazebörg zien stee. Foto is meer as 100 joar old, prachteg!
Op bladziede 3 nuigen veur de veujoarsbieainkomst op dunderdag 29 april om 20.00 uur in d’Esbörg (Scheemde vanzulf). t Gaait over archeologie in t Oldambt en doar hebben ze nait d’eerste mor wel de beste veur inhuurd: prof.dr.Henny Groenendijk!
Op bladziede 4 twij groepsfoto’s, aine van de Scheemterschoule, aner van Eexterschoule. Benoam de twijde komt mie hail bekend veur! Kinder op dij foto kin k ook apmoal, van Jakob Stiekel tot en mit Henkie van Diek.
En ook dij meesters: Van Zanten, Eleveld…. k Wos nait dat je ‘Friese’ schrieven deden, ik docht aaltied ‘Vrieze’, dij meester mit n vioul.
Verhoalen mit ploatjes? Joa, van J.P.Koers: “Drukkers van de Scheemder Courant”, grandioos! En Jan Pieter zörgde ook ook veur t artikel “Rondje Havenstraat, jaren vijftig”, optaikend oet de mond van Corrie Delger-Schreuder! (Corrie kin k ook ja, het nog n moal bie mie onner slobbertrui zeten, op fietse deur Scheemde….) Mooie foto ook van Jojo veur de Muziekhandel! Jan Groenbroek het t verhoal schreven over de rederiekers van ‘Eloquentia’. Mooi, mor mie zegt t nait zo veul, ‘onbekend terraain’, in dij tied…. Mor dìn veur mie de klapper van dizze DUVEKOATER: “”De Pioniers van Niesoord”!. Der is wat nijs vonnen in t archief van de vrougere gemainte Midwolle en doarmit het Jan Pieter Koers aanvullen moakt op n verhoal in n eerdere Duvekoater. Geweldeg, al kommen de ploatjes aargens aans vot. “De Bikkershorn in de jaren dertig (2)”, nee dat zegt mie ook nait zo veul, Westerlij lag dou wied vot, rekend vanof Midwolle.
Staait zölfs wat in over n soabel van Fré Zijlker dij broekt wer bie t schoon kraben van baiten, mor dij aigelks oet Stad kwam, van de Stadswachten…..
Meer waiten? Kiek mor op www.historiescheemda.nl. Lid worden? Kin al veur €11,50 in t joar! As je Duvekoater mit post kriegen, betoal je €15,00, muite meer as weerd! (Ledenadministroatsie: dirk.vanderlaan@home.nl)

Posted in Nijs en nijtjes | No Comments »

‘Laatste poes’ Niesoordlaan Midwolda, jaren zestig

11:24

De leste kat dij wie haren in Midwolle, dou w’op Niesoordlaan 59 wonen deden. Aigelks mout ik ‘poes’ zeggen, n kát hebben anern, n poés heb je zulf. Dizze poes herinner ik mie nog dudelk, al wait ik nait ains hou t daaier nuimd wer: “Pinkie”? (Bie ons haitten ze voak ‘Pinkie’…) Of was t “Maupie” “Maukie”? n Poes mit n dramoatisch verleden, is maal aan zien ènne kommen….

Laatste poes familie Blaauw in Midwolda aan de Niesoordlaan, jaren zestig

Laatste poes familie Blaauw in Midwolda aan de Niesoordlaan, jaren zestig

Zo’n kat heurde der hailemoal bie, al van jongsofaan. Dìn was t baistje nog zo speuls as wat, hingen we n leeg klöske aan toavel, of trokken n taauwtje over t zaail in keuken of koamer. Dat speulse verswond vanzulf, kat wer rusteger, wie ook. Lag e meer op schoot, of in de nek, op scholders. In toen haar t zien aigen stee, voak bie bie de buren, bie Fokko en Lies Bamberg, n hörntje in t gras, stoef bie de hege. Oet de wind, ien e zun. Of e moezen vangen dee, of vogels, kin mie der niks van herinnern. Of en tou lait k t daaier op mien bère sloapen, von e prachteg. As t te laank duurde smörgens, kwam e bie mie, drokde mit zien kop tegen mien kop aan: “Wakker worden!”
n Moal bleef e wel slim laank vot. Kwam wel ains meer veur dat e n groot dail van de nacht zien vertier aargens aans zöchde. Was e der smörgens aaltied op tied weer, dörst en zin in vreten. Dou bleef e vot, ik kreeg der liefzeerte van. Woar kin e weden? Moeke zee “Komt wel weer, n kat komt aaltied op zien poten terecht”, zo wat zee ze aaltied, wuifde de zörgen vot, dìn wazzen ze der nait…. Pa bromde wat, trok mit scholders en ging aan t waark. Ik der op oet, bie hoezen laangs, ook bie t leste hoes aan overkaant, t hoes van Beentje. Ston leeg, femilie Beentje was verhoesd. Heur ik wat? Nee, doch nait. Weer noar hoes….. Nog n poar doagen loater kwam poes doch nog weerom, moáger, kon sikkom nait op zien poten stoan, van drinken kwam hoast niks meer. t Baist lait zok ook nait meer aanhoalen, n dag loater was t dood, stief as n plaanke. Hebben we n daip gat groaven in achtertoene, poes derin, grond derop. Léste Midwolmer poes, n tiedje loater gingen mien pa en moeke noar Hoogeveen, ik haar waark vonden in Zuudhörn. n Poes hebben zai nait meer had, ik ook nait.

Posted in Teksten (Grunnegers) | 1 Comment »

« Older Entries