Haardfietsen, das pas n eerliekse sport! As kind kreeg ik t nijs over t fietsrieden via d’ogen (”Het Vrije Volk”- versloagen van Jan Liber) en via d’oren (Radio, Jan Cottaar) , en dat gréép mie bie de kladden! De belevenizzen van toppers as Woutje Wagtmans en Wim van Est, de sprint van Gerrit Voorting, de male fratsen van dij Fransman, Hassenforder, de klasse van mooie Louison Bobet, de klimgeiten Gaul en Bahamontes…..
Woarom dat k zulf nait aan fietsrieden doan heb? t Was der sikkom van kommen…. Mien kammeroad van dou, Jakob Stiekel oet Scheemde (loater Winschoot) kwam der mit n racefietse aanzetten. Hai wol geern dat k ook mitdee (en zien moe wol dat laiver ook, zai von dat k n goie ‘invloed’ op Jakob haar….), mor mien pa haar der gain centen veur (over) en mien moeke von t veulste gevoarlek. (Mor dat von ze ook van knikkern en houpeln).
Belangstellen heb k wel aaltied holden veur de wielersport, k heb wat kermiskoersen zain en rondes biewoond, mor zo voak was dat der dou nait bie ons in de buurt. Wel n moal de Wielerronde van Grouw (dou was t nog mit n -w-) in zummervekaansie, woar Popke Oosterhof oet Eelde mitdee, en Midwolle het ook n moal n wielerronde organizeerd, n groot vaaierkant, nee, dat was gain zegen veur rieders en kiekers.
Dat zeilt mooi de bochte om, van Laangestroat noar d'Achterweg, Kruijer veuraan, op t ploatje. Nee, doch nait, t is n aander...
Nou is der al veur de viefde moal in Noordhörn n wielerronde west, oflopen zotterdag, 15e maai. Eerste lustrum, dat dut dij dekselse Digna Achterhof (dij wait wat t is om op n racefietse te zitten…) mor mooi even, soamen mit de NWVG, dij verainen oet Stad. Der binnen ook hail wat vrijwillegers dij mithelpen, aanpakkers, “Gain woorden, doaden…” (Dij woorden loaten ze over aan de speaker van dainst, as dij ainmoal begunt te rabbeln, krigst der gain woord meer tussen; as e n interviewtje dut, geft e zulf mainsttied d’antwoorden, gaait gaauwer…) n Bult rieders kwammen noar Noordhörn, manlu en vraauwlu, staarke pelotons! Joa, Daniëlle en Eyelien Bekkering wazzen der ook, haren weer nije pakjes aan, wit mit lichtgruin, mien smoak nait, mor mie haren z’ook nait der noar vroagd…. Doar zel t wel nait aan legen hebben dat ze nait op t podium kwammen noa de 60 km. Ze hebben heur stinkende best doan en dìn holdt t asmits op. Daniëlle haar ja al drij moal wonnen in vaaier Noordhörner Rondes (wonen hier ook ja om d’hörn..) en dat wollen hail wat riedsters nou wel es aans zain. Der stonnen veul riedsters oet Overiessel aan de start, dat is doch wel n staarke wielerpervinzie! En vanof t begun was der aine dij zok aalweg in de kieker ree, aine van 17 joar! Laura van der Kamp oet Hasselt, is ook Nederlands kampioen bie de junioren, talent zat! Ston noa ofloop mit n braide laag op t podium, op hoogste tree! Prachteg! Kon Esra Tromp oet Koevorden net achter zok holden, dij haar wel n beetje de smoor in (mor dat heurt ook zo as je twaide worden). Daarde was n aander jongwicht dij veul plezaaier beleeft aan t fietsrieden, zai zit voak mit n laag op de fietse: Jacobien Kanis. (In dij Kanis-femilie fietsen z’aalmoal zo haard as t mor even kìn…)
Jacobien het heur bloumen al, Esra en Laura mouten der nog even op wachten. Zai luustern noar t verhoaltje van Rabodirecteur Van der Werff. Je zain ze denken: "Moak t nou nait te laank, mien bainen doun zeer..."
En de Bekkering-sisters? Eyelien is zesde worden, zai won de sprint van de grode groep. Daniëlle kwam as 15e over de meet, t vol heur (en ons) nait mit, mor ja, zo zit sport nou ainmoal in mekoar. t Kin vraizen, t kin deuen…. (Nou, zotterdag vroor t sikkom, dat kon Digna wieder nait regeln, t was kold, haalf maai….)
Bie de mannen wazzen der hail veul Amateurs A opdroaven kommen, dik zestig! Von k ook n prachtege wedstried mit n kopgroep van vief man! Leek Ronald Kruijer (oet Kloosterholt) de beste pepieren te hebben, mor dou stuurde en/of schoakelde hai in ain van de leste bochten verkeerd. Kwam Bas Waaijer as nummer 1 over de streep, Rob Busser 2e en Remco van Dijk as 3e, apmoal oet Overiessel!
Prachtege sport, ik zee t al! In t echt is t ook aaltied mooier as op TV of in kraande. In kraande? Haar dat Dagblad van het Noorden hailendal geen woord en gain beeld in zien sportkatern vanvummedag! Liekt naargenswoar noar, mor goud dat z’in de wielrennerij nait mit rooie koarten waarken….
Ploatje, bie de mannen. Wat zollen ze nou tegen mekoar zeggen? Fiets doe nou ook es veuraan? Krigst n pilsje ekstroa as t wat haarder trapst? Doar achteraan is aine die der nog bie komt, machteg mooi!
Mooi hè! Was nog in t begun van de 60 km, zaten ze nog wat meer biemekoar, mor haard ging t dou ook al!
©foto’s: jan blaauw, 15 mei 2010
