Oudejaarsavond vijftiger jaren – de bowl en de bollen op tafel…

Dit was mien wereld, doú! Hoeskoamer in de joaren viefteg, Niesoordloane 59.

Oudejaarsavond in het ouderlijk huis, jaren vijftig

Oudejaarsavond in het ouderlijk huis, jaren vijftig

t Olderliek hoes, Pa in zien aarmstoule, stee was sikkom aaltied reserveerd. Bie oetzundern mog ik der wel ais in zitten, jongste thoes… Kon k rusteg “zoien”, mit kop inneweer, mien menaaier van filosoferen..
Hiér is wat aans aan loop: Ol en Nij ducht mie. Oettrektoavel staait pontifikoal veuraan, klaid derover, zaachte. Mos der wel oaf as we mit ‘Mikado’ speulen deden. Moeke zit mooi in beeld, schier klaid aan. Ze schept ‘bowl’ op, ik wait nait of doar n Grunneger woord veur is. Vruchten as krudoorns, eerbeien, stokjes appelsiene, bult nat… Elkenain von t lekker, pa nait. Hai kreeg n klaain glaske mit brandewien of  vruchtenjenever. n Borreltje… Mien schoonzuster Wiea nemt n slokje van n glas wien, bruier Hemmo glimt op d’achtergrond.
Schier veur dij tied? De gloazen kommetjes veur de bowl, je zain ze nog wel ais op n rommelmaarkt. En de komme mit euliekouken, zulf bakt, specialité de la maison… Tegen mure aan de klokke dij nou bie mien oldste bruier hangt, blift in femilie. Theekastje mit foto’s, Kerststokje hangt der ook, gerdienen tou. Achter Gemmo n stokje van n stoande schemerlaampe, mit zo’n tiedschriftenbak deronderaan. Wonnen pa en moeke ook nog n moal in n Winkelweek, ston e in oetstalkaaste van Jonker aan Hoofdweg, nummer derbie. Dat nummer haren wié…. Laampe verkocht aan Haarm Pomp, verzekeringsman van “De Centrale”, beetje sjachern, 25 gulden…..
t Zel zo in ’58 west weden, leste dag. In n flits bin je zo weer viefteg joar weerom, pruif je de poedersuker, de bowl…. Tied bedrogt je, aaltied weer, staarvenswoar.

1 reactie op “Oudejaarsavond vijftiger jaren – de bowl en de bollen op tafel…

  1. Mooi Jan,
    mementen van vrougerdoagen dij nait
    slieten, mor aal staarker worren.

Geef een reactie

Het e-mailadres wordt niet gepubliceerd. Verplichte velden zijn gemarkeerd met *