Twee generaties: opa en opoe De Groot, pa en moeke Blaauw

k Bin nog even deurgoan mit t verkleurde femilie-album, stoan nog meer schiere ploatjes in. Dizze bevöbbeld:

Vier op een rij: opa en opoe 'Drijbörg', geflankeerd door pa en moe Blaauw

Vier op een rij: opa en opoe 'Drijbörg', geflankeerd door pa en moe Blaauw

Ook zo’n foto woar je wat mit hebben, huif je al gain verhoal over op te schrieven. Gepke Hector is in ’53 oet tied kommen, oaderverkalken. Mien zuster in Azzen is noar heur nuimd. Gepke, schiere noam, mor nait in de Top Tiene van 2009…. Ik wait nait veul meer van opoe, al pruif k heur soep nog aaltied. Ze lait t aaltied deurkoken, slierten vermicelli vonst nait weerom. Voak wast ook n beetje aanbrand. Ik von dat lekker, mien pa zedde dìn n swaart gezicht op… Opoe bleef der lakoniek onder, volgende keer was t net zo… Der was ook hail wat te beproaten en dìn kon je ja nait aal op soeppane letten… Dou opoe oet tied kwam, kon opa nait laanger allain in zien hoeske op Ol Diek in Drijbörg blieven, kwam e bie ons inwonen, in Midwolle. Ik van mien koamertje of, bie pa en moeke op sloapkoamer, was nait aans. Opa haar n kromme rogge, kwam van Bechterev, kwam ducht mie ook van t haarde waarken bie boer en op t laand. Knooien… Kop was prima. Hai haar ook in poletiek zeten, bie SDAP.  Gemainteroadslid het e ook west, in Beerte. Dou e bie ons was, ging e aal doagen aan loop mit zien swaarde pedde op en zien wandelstok in haand. Hai keek noar de grond, of en tou bleef e stoan, mos e even veuroet kieken. Elke dag las e Winschoter kraande, wie mochten mitlezen, opa betoalde t abonnemìnt. En eerappels schillen, dat kon e perfekt! Zo dun en regelmoateg heb ik nog nooit aine eerappels schillen zain, zien schille bungelde asmits in ain stok tot aan de grond. In ’57 was t doan. Even zaik, benaauwd en dou op n nacht, oflopen… Tachteg joar! Hai is in Nij Beerte begroaven, bie zien Gepke. Moeke over heur toeren, t was heúr pa. Ze kon meroakels mit hom opschaiten, doarom was e zeker ook bie ons inkwartaaierd. Of en tou ging e noar Scheemde of Winschoot, noar zien anere dochters. Mainsttied was e op tied weerom, Midwolle bevol hom t beste.
Woar en wanneer foto moakt is? Ik wait t nait, hoes komt mie vrumd veur, gerdienen lieken wel Duuts, mor lu haren ze in dij joaren wel voaker zo hangen. Zel wel ain van leste moalen west weden dat opoe op foto kwam, begun joaren viefteg, opa holdt heur laif bie d’haand. Was ze dou ook al zaik? In toeze? Moeke staait der knap op mit heur zummerklaid en poetste schounen. Pa liekt mie wat moager, smale kop, nog n wild bos hoar, haar nog gain tied had om noar Bernard Mulder te goan, kapper in Oostwold. Maauwen opstreupt, vestje aan. Doar zat ook n lutje buutse in veur t zakhallozie. Hail e zo aan glimmende kette teveurschien: ‘O, poar menuten veur haalf aine, ‘Mededelingen voor Land- en Tuinbouw’. Wie wozzen sekuur wat dat betaikende…

2 reacties op “Twee generaties: opa en opoe De Groot, pa en moeke Blaauw

  1. Een mooi stukkie Grunnigs. Ik ben bezig met een verhaal over de ols Schuinesloot (bij Slagharen) waar een meester Blaauw het laatste h.d.s. was. Hij overleed in Winschoten op 8-02-1993, geb. 18-07-1892 in Heiligerlee. Ik wil graag weten wat hij deed na 1932 (opheffing school) gem. Ambt Hardenberg. Misschien is hij familie van de pa en moeke Blaauw ?

Geef een reactie

Het e-mailadres wordt niet gepubliceerd. Verplichte velden zijn gemarkeerd met *