Jaren vijftig: broérs, nog steeds/bruiers, dou én nou!

Nait zo’n geweldege foto, k wait nait wat der mit loos is:

Meccano...superspeelgoed, jaren vijftig, bij de grote tafel

Meccano...superspeelgoed, jaren vijftig, bij de grote tafel

Toavel ston in t oostènne… Ik main, in hoeskoamer aan achterkaande. Grode koamer van west noar oost, aan zuudkaande van t blok. Nummer 57 (Bamberg) en 59 (wié). Ons keuken tegen heur koamer aan, nooit last van had, wie haren ook ja lewaai genog van ons zulf… Wie? Pa en moeke, mien bruier Hemmo, van ’43 en ik, van ’45. t Was dou schienboarliek mode om zulfde klaaier te droagen, ook al wazzen we gain twailing. Schiere trui, mog k geern aan hebben. Wanneer dit ploatje nomen is? In de buurt van ’57? k Wait nait of ‘opa Drijbörg’ nog leefde, dij was dou vaaier joar bie ons in, kwam in juni ’57 oet tied. Bruier Hemmo is noar hom nuimd, ik was daarde zeun, was gain opa meer over. Bin noar mien opoe nuimd, van pa’s kaande: Jantje, Jantje Blaauw-Baas. Heb k zulf allain mor kìnd van n portret. Duustere foto, nait al te vrundelke oetkiek. Zol dat invloed hebben?
Hemmo en ik binnen veul mit mekoar optrokken, hai zat aalweg ain klazze hoger, het n joar overlopen op legere schoule. Loater baaident noar d’ULO in Scheemde, baaident noar Kweekschoule in Winschoot. Baaident t onnerwies in. Hai het t (nog) laanger volholden as ik… Wie konnen wel goud mit mekoar, as der aandern bie wazzen. Onner mekoar was t voak n  moal trammelant. (Mor der binnen spiegologen dij zeggen dat dát normoal is..) Hai was levendeger as ik, meer “extravert”, ik meer n binnenvetter. Beetje ettern kon e ook wel: bliede moaken mit n stokje sokkeloa, was t zaipe….. Of aan je vroagen om n Maggifleske aan mond te zetten en dìn even n tikje onner tegen t fleske aangeven… Wie hebben soamen ook n bult lol had. Kin je hier aan toavel ook nog zain, mit Meccano. Mooi speulgoud, duur, mor dìn haar je ook wat. Mozzen we dailen, gaf ook nog wel ais problemen. Mor zunder problemen wor je nait groot…
PS. Moandagnommedag hebben ze mien bruier zien tazze ofroofd bie biebeltaik in Boteringestroat. Hai wol net noar hoes, haar zien fietse pakt, tazze in fietstazze… Ging dij GSM… oflaaid. Bin je mooi kloar mit: knipke mit spullen vort, agenda, aantaikenboukje, foto-apperoat (Nikon Coolpix 4300, n compactcamera; as j’hom op Maarktploats zain, mout je mie even woarschouwen…), Pa zien “Herder”, eerliekse buutsmèsk. Pasjes blokkeren loaten, mor bie ain baank hebben ze doch nog wat euro’s van reken hoald. (Joa, stom, pincodes zatten ook aargens in dij scholdertazze…) Wat hom benoam rakt, is dat aantaikenboukje. En de foto’s dij op ‘geheugenkoartje’ stonnen. (Zellen der nou wel ofwezen…) Mizzelke wereld of en tou… (Mor ja, mit ain woord kin je n bult relativeren: ‘Haïti…’)
Bruiers, twai joar leeftiedsverschil. Wie hebben nog aaltied n bult mit mekoar, en aan mekoar.

1 reactie op “Jaren vijftig: broérs, nog steeds/bruiers, dou én nou!

  1. Jan

    Mien dag begunt weer goud noa t lezen
    van dit verslag.

Geef een reactie

Het e-mailadres wordt niet gepubliceerd. Verplichte velden zijn gemarkeerd met *