n Zet leden heb k me bezeg holden mit n foto dij k vonden heb in de spullen van mien moeke, Wiene Blaauw-de Groot. Moeke is in juli 2002 oet tied kommen, 96 joar old, letterlek doodmui, ze haar t wel had. Heur spullen overleefden heur, zo gaait dat. Zo’n foto mit n bult mìnsen derop zet je inains weer aan t denken, aan t herinnern.
Groepsfoto uitstapje woningbouwbuurt Midwolda, tweede helft veertiger jaren
Ik kreeg onverwachts n stroombraif van Henk Bos, oet Midwolle. Henk is n poar joar older as ik bìn, hai is van juni ‘43, ik van juli ‘45. Ik docht hom te kìnnen as knappe voetballer van MOVV dou de rood-swaarten heur topjoaren haren. ‘Hintje Bos’, laange bainen, grode stappen, beste trap, kop derbie. Mor dij Hintje Bos is n aander, n zeun van Jan Bos. Leeft nait meer. Dizze Henk Bos, zeun van Mattheus, is nou AOW’er en het ook meer tied om nog es weerom te kieken, noar zo’n ploatje mit aal dij lu oet Midwolle. Henk het woond op Schortinghoesloane nr.8 (woar Jurjen en Tetje Adam woond hebben), schuun tegenover t hoes woar wie wonen deden (nr.11), mor dou wazzen wie al noar de Niesoordloane vertrokken.
Henk vertelt dat e aal dij lu op de foto goud kìnd het, sikkom aalmoal. En hai wait n aantal noamen wat wizzer asdat ik ze wait. Dij man aan linkerkaande, dat is Haarm Boer, traauwd mit Imke Kuipers (zuster van o.a. Elzo, Ko en Joapie). IK docht dat ze aaltied “Haarm Krudoorn” tegen hom zeden, mor Henk vertelt dat der mainsttied “Haarm Snoater” tegen hom zegd wer. (Nou ja, “tegen hom”, as e der nait bie was vanzulf…). De noam van Poppo Udema is ook goud, dij was joarenlaank köster van de Hervormde Kerk in Midwolle. En d’olle Tuize (Tuzé) was vrouger veurloper bie begroavenissen mit peerden en koets, ik heur t getrappel op stroatstainen nog aaltied. Tuzé luip in zien prachteg pak mit dij steek op kop veurop, haar ook n gezichte kregen dij hailemoal stoan goan was noar begroavenissen…
Dan nog even over Werkman. Volgens Henk gaait t om Abraham Werkman, nait om Pieter, ook nait om Hendrik. Abraham Werkman het nait zo hail laank woond in Midwolle, hai het waarkt bie garage Blaauw, veuraan bie d’Hoofdweg. Hai was chauffeur op n toakelwoagen. Henk het ‘om goud kìnd deur de visclub. Loater woonde Bram Werkman in Oostwold aan de Willeminaloane.
As k nog ais roem(er) in tied zit, zet k de haile boudel nog ais op n riegje mit ale noamen derbie. t Is doch n eerlieks stokje Midwolmer geschiedenis! (Henk, bedaankt!)