Mooiste vekaansies wazzen nait wied vot, op Schier. d’Allermooiste messchain wel op Terschelling, joaren zesteg. Gé en ik veur t eerst mit ons baaident derop oet, vattien doagen noar Terschelling. Van d’eerste tot en mit leste menuut prachteg zunneg weer, twij weke laank… Aaltied mooi as je doaraan denken kìnnen, in zo’n winter as dizze. Wel haar dat docht: zolt oetverkocht….
Vekaansie op Schier, zunne derbie, ijs mit sokkeloa, braide laag, buusdouk op kop....
Ploatje is moakt op Schier, op terras van dij bekende tent bie t straand, veurbie de bunker woar Willem Alexander n moal ofvalen is. Dou kinder klaain wazzen, binnen we joaren achter mekoar noar Texel west, prachteg. Mor dou kinder groder werden, wollen ze onner t juk van ollu vot, onafhankelk wezen, derop oet, zulf, nait aaltied mit pa en moe… Hebben we kozen veur Schiermonnikoog en das ons aaltied goud bekommen. Nou ja, aaltied. Aainmoal wazzen der vrunden op bezuik mit heur kinder. Heur jonges en ons jonges, wie zaggen ze nait weer….. Dee eerst niks, mor dou t tied wer veur de boot, dou zaggen we ze nog nait…. Wie der op oet, strategisch plan bedocht, je waiten wel hou dat gaait….. Joa, wie vonnen ze, mor dou was boot al lös van wale. Wat nou? Vrunden haren n adres van bekenden oet Zuudhörn, dij haren n hoeske op Schier. Ston verd…. leeg, mochten ze zo n nacht doar overblieven, sleutel konnen ze doar en doar vothoalen… Haar je dij tronies van de kinder zain mouten: Hebben we doch mor mooi even flikt…. Doar ston je dìn as “opvoeders”….
As ik zo noar mien ‘tronie’ kiek op dit ploatje, wazzen der op dat moment nait zokse knelpunten…. n Laag, n ailaand braid. En n buusdouk op kop, k haar pedde thoes liggen loaten en mien hoar wer dou al slim dun…. Dee k wel voaker, vaaier knuppen derin en hup, op kop. Jongens binnen wel ais aargens wiederop fietsen goan…. Zo’n vekaansie op Schier, doar haar k nou ook wel zin in…. Zunne, körde maauwen, ijs mit sokkeloa of kovvie mit slagroom, terrasje nait wied van t straand, mmmmmmm….. (En wat zol je din dij snijprut gaauw vergeten weden…)