Laank, laank leden…… Dou speulden we t verhoal van t “Vrouwtje van Stavoren“, olste klazzen van d Openboare Legere Schoule aan Hoofdweg van Midwolle, t waark van hoofdmeester Zonderman. k Heb doar al voaker van verteld, krieg der gain genog van. De grote “Vrouwe van Stavoren”…. Of: “Hoogmoud komt veur de vaal…” Dat was mie wat! Veur elk kind in combinoatieklazze 5-6 was der wat te doun, ale kinder kwammen op teneel. Wanneer dat d’oetvoeren was? Schouljoar ‘56-’57, t zel wel veujoar west hebben…
Doar stoan we, en Beno Doedens sprekt profetische woorden tegen de Vrouwe van Stavoren, Tineke Kampstra
Dit is ain van de schierste foto’s dij bewoard bleven binnen van dij olderoavend in hotel ‘t Gemeentehuis (Van Eerden) aan de Hoofdweg. Wat n waark zat derin, in zo’n veurstellen! Meester Zonderman het t schreven en aanvuld mit aner stokjes, dat Vrouwtje vulde d’oavend nait genog. En dìn mozzen der klaaier kommen, en proeken, en dij decorstukken hebben we ook aalmoal zulf vaarfd en schilderd. (Ik vaarfde, Beno schilderde, verschil was der dou ook aal…) k Wait nog wel dat k ook n rol haar as boer mit dörsvlegel, en k mos ook zingen. (Wat veur verske was dat ook al weer? k Leuf dat t om “Doar kwam n boer oet Zwitserland” ging). k Von t vrezelk, kon wel janken in stee dat k der van genoot. Stom! Mor ja…. Hier op dit ploatje stoa k as Aroabische boodschapper defteg te wezen. Dit lag mie wel, k hufde niks te zeggen (ze verstonnen mie ja doch nait…). Dij klaaier hebben we hailemoal oet Stad hoald, huurd! Was dat ook bie Mulder aan t Zuderdaip? Beno dee t woord in dizze ’scène’, hai was dat old kirreltje met zien swaarde pedde en zien board. Beno Doedens, hai wait ducht mie nog wel wat e dou zeggen mos: “Wee U Vrouwe, Wee U…” Zo wat was t, nee, gain Vrais…. Wel der nog meer op stoan? Jopie Noor as kroegboas, Ankie Botjes, Geert Koning ook al dik in de board, Hinnerk Joager? Emmie Fokkens, Margo Joling, Bert Uffen as matroos (nou, aal woar Bert geschikt veur was, nait veur matroos…) Sina Kok doarboven, Freja van Diek, mor wel dat doarnoast binnen? Zat Trijnie Zuur dou ook al bie ons in klazze? En Edie Leupen? Ik zel dat ploatje mit dij dörsvlegels ook nog es weer opzuiken, mit Lideke Zijlker, n eerliekse boerendochter. Ik as boer, dou? Nee, dat mout nait slim overtugend west hebben…