Lu dij dit rommelge levensverhoal n beetje volgen kìnnen, waiten al dat w’in 1953 verhoesd binnen van woningbaauw noar Nijssiesoord, noar Nannengoa’s Loane, dij dou al offisjeel “Niesoordlaan” haiten dee. Wie kwammen op nummer 59, twij hoezen in ain blok, wie aan zuudkaande, Fokko en Lies Bamberg aan noordkaande. In t volgende blok kwammen Lammert en Annie Diekhoes, noabers woar je wat aan haren, al gingen zai noar kerke en wazzen wie haaidens. Lammert was d’olste zeun van Appie Diekhoes. n Zuster van Lammert kwam veuls te jong oet tied, zien moeke ook ducht mie. Annie was n Smit, van Meerland, femilie van Joke Smit dij bekend worden is deur de vrachtwoagens. Annie en mien moeke zongen tegen de klippen op. d’Aine psaalms, d’aner rooie “strijdliederen”. Lammert en Annie kregen drij kinder, aigelks meer, mor nait elke geboorte laip goud oaf, verdraitelk. Olste was n wicht, Afina, hier op ploatje aan Nijssiesoordloane, begun joaren zesteg ducht mie.
Afina Dijkhuis, dochter van Lammert en Annie, plm. 1960
Zeuven, acht joar. Zai “poseerde” veur mien Agfa Click, k haar woarschienlek zegd dat ze wat inmekoar kroepen mos, aans kwam ze der nait hailemoal op… Afina haar dou ook, net as ik, wat we nuimen deden rood hoar, al was t meer oranjebroen von k zulf. As ze mie oetmouken veur “rooie” haar k wel in gedachten om weerom te roupen “Bist ja kleurenblind, schele…”, mor doar kwam nooit wat van…. t Schiere van dit ploatje is dat j’ook nog n beetje zain kìnnen hou Nijssiesoordloane der dou oetzag. Aan westkaande ofwizzelnd n hoes en stok laand, n hoes en n stok laand… Loater is alles volbaauwd, herkenst t nait meer… Dou stonnen der aalmoal populieren aan ons kaant van weg, aan aner kaant essen, as k t goud ontholden heb. Nait aal te dikke bomen woar je nait best achter votkroepen konnen bie verstoppertje speulen. Bie t voetballen wol der nog wel ains n bale tegen boom aan kommen en dìn vloog e zomor verkeerde kaant op, in toene of op t laand van Hemmo Tiggeloar. Ging t derom wel t eerste bie bale was… (As Tiggeloar hom in poten kreeg, zaggen we hom votdoadelk nait weer, mes derin…) Bie “stabal” wazzen bomen wel makkelk, konnen ze je nait zo gaauw ofgooien.
Afina kreeg haalfschaid joaren viefteg n bruiertje “Albert“, nuimd noar Opa Diekhoes. Van hom heb k schane genog gain ploatjes oet dij tied. (Kreeg vandoage n stroombraifke van Albert, hai woont in Midwolle). Der is nog n potje west noa Albert, mor dij haar n open rogje, slim troagisch, doar binnen hail wat troanen valen en nait allenneg bie Lammert en Annie. Dat potje leefde nait laank, zongen wer der in dij doagen even nait zo veul. Loater kwam der doch nog n jonkje, Jurrie. (Annie heur pa was Jurjen Smit). Jurrie woont net as zien bruier Aalbert, in Midwolle, het van doun had mit dij musical “Jozef”, woar kraanten vol van stoan hebben. Van Jurrie heb k nog wel n poar foto’s. Komt tied, kommen ploatjes…