Heb je m ok al? ‘MOI elkenain’! (Tiedschrift Dag van de Grunneger Toal). Der stijt zo’n nijmoods jong op, de hoaren recht omhoog, n vuust ien e lucht, n bril op die ze nog niet ies bij ‘Mamamini’ verkopen, n splinternije megafoon ien e haand, en mor brullen……. Tegen welke doven het t eigelks? Die doarachter op e roamen, joa, dat kan, die bennen niet de jongsten meer….. Mor dan kan e doch beter d’aner kaant op bölken…. Die bruloap vragt vanzulf d’aandacht van de lu op e stroat veur t gebouw van d’Archieven, doar ien Stad, aan t Cascadeplein. Nou, zoveul lu lopen doar nou ok weer niet doagelks. Kan e beter op e Grode Maarkt stoan goan: DAG VAN DE GRUNNEGER TOAL, 20 meert, van elf tot vief uur, kom Grunnegers, op noar t Cascadeplein!!!!!!
Nou even weer de kop derbij, t is n schier blad worden, ‘MOI elkenain’. Der zit zölfs n luchtje aan, mooi pepier, prachtege ploatjes, knap doan! Deputeerde Hans Gerritsen is as eerste ien beeld en aan t woord, volgd deur Coby Vermeeren, ‘docente Grunnegs’, ja ja…. En dan t mooiste van t hiele blad: Engel Jan Struif as apostel van t Grunnegs! Struif preekt t liefst ien t Grunnegs, doar kan e meer humor ien kwiet as ien t ABN! Op bladziede 6 en 7 n kennismoaken met GRUNNEGER SCHRIEVERS: Annie van Dijken, Klaas Duursma, Fieke Gosselaar, Hanne Wilzing, Vera Sutman, Harry Niehof. Mooie ploatjes derbij! Vanzulf haren ze der ok bij zetten können dat ien as Hanne Wilzing ok ‘publiceert’ ien onze Kreuze, mor dat hebben ze woarschienlek vergeten. En dat Klaas Duursma doar eerst ok ien schreef, al is e dat zölf messchien ok al weer vergeten….. Woarom Vera Sutman ien e “SCHRIEVERSGALERIE” stijt? Dat wiet ik niet, mor ik vin t wél mooi! En dan nog n verhoal van Martin Hillenga over de Veurleescup, “VEURLEZEN MAANK ZEEHONDEN”! Schier zo wat, Lenie ‘t Hart het ze al laank les geven ien t Grunnegers, dat verstoan die dieren as de besten! JOa, en dan ok nog n gesprek met Gré Rijskamp: kapster/schilderes/dichteres. En ze het vroeger ok nog zongen! As Wotterman, ‘all over the world!’
Ien MOI ok n verhoal van Joop van de Bremen over Ede Stoal en zien waarme douche. JvB het n webstee: www.streektaalzang.nl. Kieken en luustern!
Achterop MOI stijt t program van 20 meert, van de Dag van de Grunneger Toal! n Drukte van belaang!
Hoe je aan zo’n MOI kommen kunnen? Nou, ik heb der eerlieks woar niet veul veur doan…. En ik heb der nou al minstens 5 ien e bus kregen…. Dus as je niet meer bij n biebeltheek kommen, vroag mij mor even, ik heb der genoeg! (t Is niet aaltied eerlieks verdeeld op e wereld; bij onze KREUZE doen we alles met t leegste ‘budget’ wat der mor te bedenken is, de websteekosten hoalen w’uut onze eigen knipkes, en dan wor je wel ies wat vergreld as je zo mor ‘minstens 5 MOI’s ien e bus vienden, dan is der geld zat ien e Grunneger cultuur…)
MOI dus, tot 20 meert!
MOI elkenain, blad veur/van de DAG VAN DE GRUNNEGER TOAL
Joa, is haitied wel n boas boven boas.
Ik kreeg mor drij gelukkeg.
Mor zol dommee gaauw nog even
kieken ien braivenbus.
Moi lu,
k Wil jou geern even vertellen dat dij haardrouper op t veurblad Mien zeun Albert is. Hai ropt hailendaal gain MOI !! Nee, hai schraaiwd Haile wereld tou dat e dommit gait trouwen mit zien Marieke, en dat je ais even op Mien webstee mouten kieken, stait o.a n bult over Ede Staal, schiere gedichten en hail veul fulmkes op.
Nou … e MOI hor, k goa wieder sloapen.
Gr Free Westerhoff