Jeebeetjes.nl

Jantje Blaauw-Baas, mien opoe! n Gehaimzinnege vraauw veur mie, k heb heur nait kìnd, nait direct, wel deur d’verhoalen van mien pa en moeke, van olste bruier en zuster. Opoe kwam al in 1943 oet tied, opa Blaauw was al veul eerder dood, dou was mien pa nog mor tiene, of nog gain tiene…

Jantje Blaauw-Baas oet Midwolle, oet tied kommen in 1943

Zo’n pertret, kin der wel aal noar kieken. Noar dat hoar op kop, woar gain ’schoonheidsspecialiste” aan zeten het… Dat prachtege briltje, dij ogen, aine wied open, aner veur n kwart dichte. Ogen dij zeggen: “Mie moak je niks wies, ik wait van houd en raand, woar Oabram mosterd hoalt…” n Mond mit karakter, zwiegsoam, gain proater, mor wel aine dij wait wat ze zeggen mout ast neudeg is. Schiere haalsketten, golden slöt, schaif staait laif. En n donker klaid mit roezeltjes, zundags, of veur de foto. Zai zel wel sputterd hebben dou ze tegen heur zeden dat der n fotogroaf kwam. Was dat veur flaauwekul?
Liek ik op heur? Zai is mien noamgeefster, k bin noar heur nuimd. ‘Jantje’ wer ‘Jan’, baaide opa’s wazzen al benuimd. Woar ze woond het? Aan d’oostkaande van Midwolle, aan d’Hoofdweg, woar nou ‘Blaauwestad” aan weg timmert… Mien oom Ties het doar nog joaren woond, op t’olderliek stee, het e n gruintezoak had. Ging e mit peerd en woagen deur Midwolle, en deur Oostwold. Mainsttied net zo’n mond as zien moeke. Kwam gain laagje of, loater wel, dou t waarken doan was.Hou is opoe omgoan mit dij hikhakkerij van heur kinder over ‘God en gebod’? Baaide olsten oet kerke, aner drije kerks tot t ènne, mor ook weer hail verschillend. d’Aine mit n verbeten kop, d’aner mit n glimlaag….. Zol ze nou op t CDA stemd hebben, of op Christen Unie? Of haar ze t zitten zain in d’PvdA? Agnes Kant, dij haar wel wat van heur, ook zo’n karakterkop. Schane dat dij der mit opholdt… Kin mie der wel wat bie veurstellen, Zo kommen kaizers op d’SP of as iemen op hunneg, vaaier joar loater lopen ze net zo makkelk  over noar bevöbbeld dij kurendriever van d’PVV…. Verwend Nederland, verwenst Nederland…. Dat was in opoe heur tied aans, mor ja, “historisch besef” is gain artikel wat j’in schappen vinden bie d’Ikea of bie de Super.

This entry was posted on 20:52 at 20:52 and is filed under Teksten (Grunnegers). You can follow any responses to this entry through the RSS 2.0 feed. You can leave a response, or trackback from your own site.