Sums bennen der van die momenten die t woord uniek verdienen. Guster was der zo’n moment, ien Noordhörn, ien t dörpshuus aan e Noorderweg. Doar ston Marten Japenga ien t middelpunt, dikverdiend! Marten is joarenlaank de teneelregisseur west van e Noordhörner teneelgroep. Ien 1975 is e start met t stuk “Hartjes aan ‘t spit”, ien 2009 dee e zien leste regie met “Knakworst”. Vievendatteg joar bezeg met t dörpsteneel, das niet niks!
t Aanbieden van t VRIENDENBOEK aan teneelman ien haart en nieren: Marten Japenga
Eigelks was t de bedoelen dat Marten Japenga op 9 jannewoarie ien t zunnetje zet wer, mor toen gooide de winter met aal die snij de boel ien e tuus. Uutstel tot 6 meert, kon t wel deurgoan ien e grode zoal van de Dörpsstee aan e Noorderweg ien Noordhörn. Mooie lokoatsie, ok veur aal die ex-Noordhörners die van ver kwamen veur dizze gelegenheid: uut Assen, Peize, Nijmegen, Boerakker, Leek, Olhoof…. Zo’n viefteg lu die ien e loop van 35 joar zuk verdienstelk moakt hebben veur t teneel ien Noordhörn, as speulers, mor ok as veurzeggers en teneelmeesters. Old-speulers die actief waren ien e tied van de veurganger van Japenga: Jan Buining. En speulers van nou die ien november n nij stuk opvoeren onner de leiding van Annie van der Heide, d’opvolgster van Japenga en zölf joarenlaank speulster ien e teneelgroep. Och, t gijt me niet om de ’speeches’, om de welverdiende kedo’s veur Marten, t gijt me om die hartelke stemming, om dat hiel biezundere licht dat even richt wer op die iene unieke man: Marten Japenga! En op zien vrouw Annie, al joarenlaank zien kameroadske die ok aaltied de hannen uut e mouwen stak! t Bennen juust dizze mensen die t ‘fundament’ vörmen van onze beveurrechte maatschappij. Met n laag op t gezicht, met kilo’s geduld, met herhoalde aanwiezens en aanmoaningen: “Jonges, leer die tekst nou eens n keer…!” Lu die joar ien joar uut áner mensen n bult plezier bezörgd hebben, de kiekers én de speulers. Nee, t speulen op d’accordeon zat der niet meer ien, gien begeleiden meer van t Noordhörner Lied… Mor ien gedachten wer t ‘neuried’, nunernd…. Marten Japenga, ‘juweel van t Noorden’, bescheiden man, éven ien e dikverdiende zun!