Gepke is 80! Prachtig!

t Is al weer even leden, doagen vlaigen … Dinsdag was mien zuster Gepke joareg! Tachteg joar worden, dat kinnen schane genog bult mìnsen heur nait noazeggen… Och, zai is der ook nait zunder schramen en bulten vanof kommen. Piene hier, zeerte doar, mor ze wait van deurzetten, der zit pit in dij zuster van mie.
Gepke woont in Assen, joa, “Hazzen” zeggen we wel ais, flaauw grapke. Al joaren! Heur Fré is veureg joar oet tied kommen, op t ènne van augustus. Nou staait ze der allenneg veur en dat dut ze slim knap. (Net as heur oldere bruier Henk, dij is 82 en vörkt en fietst ook nog Muzzelknoal deur…)
Gepke is in ’31 geboren, in Midwolle aan Hoofdweg, stoefbie café Brouwer, veuraan biet t loantje. Wiegman het loater ook in dat hoes woond. Loater gingen ollu mit baaide kinder verhoezen noar t oostènne, noar n hoeske bie boerderij van Van Anken, ook aan Hoofdweg. Doarvandoan binnen ze in ain noa leste oorlogsjoar verkast noar woningbaauw, op Blaauw zien loane: E 53 (loater wer dat Schortinghuislaan 11). In ’45 kwam ik kieken, stok jonger vanzulf. Gepke haar dou legere schoule al had, en ook 7e en 8ste leerjoar, mit Duuts (dat wollen Duutsers ja, dat Duuts). Deurleren was der nait bie, aan t waark! Eeerst bie Zwiers in hoesholden, tegenover Kerkloane. Dou ze doar de haile boudel oppoetst haar, gong ze noar bakker Ufkes. Was ook ja genog op te schieren, in hoesholden, in winkel, in bakkerij…. Het ze twij joar touholden, vort mor weer, noar Scheemde! Boer Jansen aan Oosterd, nait wied van Scheemter toren. Dat was de Hoge Akkedemie van de schoonmoakkunst, mos ze mit n tandenbozzel plinten ofnemen, en melkbuzzen schuren…. Dou ze heur Schoonmoakdiploma A, B en C haar (bie pa en moe in hoes mos ze ook nog aalweg oefen’, ging ze wat aans doun, noar t Sanatorium “Beatrixoord” in Appelscha, oplaaiden veur verpleegster.

Schier ploatje van Gepke mit verpleegsterskap op, staait heur wel

Schier ploatje van Gepke mit verpleegsterskap op, staait heur wel

Hou t sekuur wieder goan is? Laifde kwam n spoak in t rad steken… Gepke kon t oardeg schier vinden mit Fré de Vries oet Scheemtermeer, dij waarkte bie Looijengoa, smid en fietsenmoaker in Midwolle. Verdold, kreeg Fré TBC, mos e eerst kuren in hoes aan Willeminoaloane, loater in “Beatrixoord”. Gepke zat dou net mit nij speldje in Assen in t zaikenhoes. Zai dou ook mor weer noar Appelscha, noar “Beatrixoord”, t domain van prof.Kraan. Duurde even, mor t kwam goud. Fré kon nait meer in smederij, wer omschoold tot instrumentmoaker, kreeg n boan as amanuensis op Nassau in Assen. Gepke doar ook weer hìn. Het doar ook nog weer in t zaikenhoes waarkt, en in de nije ‘Boshof’. Noa traauwerij hoesvraauw, op kinder wachten, mor dij wazzen votdoadelk nait van plan te kommen. (Goie dingen kommen ook wel ais langzoam…) Twij kinder binnen der op batterij kommen, Arjen en Wieneke, ook al weer traauwd+. En ja, din wor je older en old, beetje krakkemikkeg, mor kroakende woagens dij lopen t laankst. Nou woont Gepke prachteg in de ‘Peelerhof’, superschier appartement. Ze mag doar geern weden, is n bult te doun en aans is ze wel aan t koartjes moaken of op de computer aan t rammeln. k Hoop dat ze t nog laank volholdt, as t mor n beetje plezaaierg kìn. Kin we der nog weer n moal noar tou, even bieproaten over Midwolle, over jonges mit klompen wat op de kop geven en zokswat. Nou, wie zain wel hou t lopt. Gepke, felisitaaierd, hol bainen onner t gat!

Kiek, doar zitten we aan grode toavel in Midwolle, aan Nijssiesoordloane (59). Grode zus geft even meccanoaanwiezens. Links miezulf, rechts Hemmo. Of wie ons der wat van aantrokken hebben?

Kiek, doar zitten we aan grode toavel in Midwolle, aan Nijssiesoordloane (59). Grode zus geft even meccanoaanwiezens. Links miezulf, rechts Hemmo. Of wie ons der wat van aantrokken hebben?

1 reactie op “Gepke is 80! Prachtig!

Geef een reactie

Het e-mailadres wordt niet gepubliceerd. Verplichte velden zijn gemarkeerd met *