Afscheid ijsmeester Siebrand, ijsbaan “Eigen Kracht” Midwolda, pa in leren jas….

Sikkom poar weke leden ston in Dagblad n ploatje van hail wat wotter en n manspersoon mit n rooie jaze en n scheuvelmutse op kop. k Wol al wieder goan noar volgende pagina, t gaait ja aaltied al over “Blaauwe Stad” , dou k dochde: “Dij man kìn ik…!” Eerst mor even t verhoal lezen wat derbie ston. Zee e dat e zo ongeveer op d’iesboane geboren was. Nou ja…. Overdrieven is ook n vak… t Mouk mie wel nijsgiereger. Over wat ploatje ik t heb? Dizze:

Kraandefoto, ploatje van Anne Marie Kamp, dij draait ook al laank mit, komt ja van Winschoter....

Wel dij kirrel is op dat ploatje? Siebrand Boven oet Midwolle! Siebrand is 72, dat zugst der nait aan of. Hai is 39 joar iesmeester west van iesboane van iesverainen “Eigen Kracht” aan Hoofdweg, zowat aan overkaant van d’Ennemabörg.  Zien kop kwam mie bekend veur, mor dat e al zo laank iesmeester west het, nee, dat wos ik nait. “Das gain wonder”, zol mien olle schoulkammeroad Beno Doedens wel zeggen, “haarst ook ja niks mit scheuveln…” En ik mor aal prakkedenken woar dat dij Siebrand dìn wel wonen dee, hai was ja sikkom op iesboane geboren, zee e. Zo as voaker ast om Midwolmer vroagtaikens gaait, huilp Beno mie oet de braand. Stuurde votdoadelk n ploatje van t Boven-hoeske, zoasdat der nou oetzugt, bie zummer en in wintertied.

t Boven-hoeske aan Hoofdweg in Midwolle, bie zummer. Romantisch ploatje! (Foto is van Beno Doedens!)

 

Zulfde hoeske, zulfde fotogroaf: Beno Doedens! Even wieder stoan hoezen woar vrouger Duut wonen dee, en slachter Geert Tolk. Doar woont nou zien zeun Japie...

Nee, ik haar nait zo veul mit scheuveln. Ik heb t wel pebaaierd, mit stevels aan, mor dij verrekte holtjes wollen nait zitten blieven. Mien opa Drijbörg (Hemmo de Groot) woonde dou bie ons, haar omdenken mit mie. Ik kreeg van hom n poar nije Vraise deurlopers “Nooitgedacht”, ik leuf bie Thomas Looyengoa vot. Wer nog niks, meer n circusact as n scheuveldoad…. Beetje liekoet dat ging nog, mor baintje-over. Man, as ain bain veur aander ging, was t ja over… Weer n steern in t ies! t Was mie ook ja veul te kold. Hannen pippern mie aalweg. En je konnen ook nait aal bie Strootman in de keet zitten, geld veur kwast of ranja haar k nait zo voak…. Kieken noar scheuvelwedstrieden dat mog k wel geern! Körte boan, 160 meter (bie manlu) en 140 meter (vraauwen) en priezen van 100 gulden, of 80, in lutje advertenties in Winschoter Kraande! Laangeboan het der ook west, von k ook geweldeg, mit Wim van der Voort en loater lu as Gerben Karstens! (Notoareszeun oet Leiden, dat zeden ze der aaltied bie, hai fietste ook, en haard!)
n Enkeld moal kwam mien pa ook wel aans kieken, nait noar mie, noar wedstrieden! Dikke leren jaze aan, oorwaarmers op, onder pette deur. Scheuveln het hai ook nooit goud kìnd, ik haar t nait van n vrumde. (Mien moeke, dij kon wel scheuveln, mor dij het dat deurgeven aan heur aandere kinder. Dou ik aan bod kwam, was t op….)

Kiek, mien pa, Jan Blaauw, joaren viefteg, begun zesteg. Buusdouk in haand, laag op gezicht... Nee, gain leren jaze, wel dikke klaaier. Dij man doarachter, dij het wel n leren jaze, zo aine haar mien pa ook. Ging e mit noar febriek, noar "Toekomst", swinters.

Geef een reactie

Het e-mailadres wordt niet gepubliceerd. Verplichte velden zijn gemarkeerd met *