Glorierijk MOVV: 50 jaar geleden…

Dik viefteg joar leden, dou ik n kind was omenbie 10 joar, mit schonnen schounen, kepodde knijen, bult op kop…. Dou haar MOVV n prachtploug, n krachtploug! En n veld van niks op t laand van S.P.Meijer, n rooie boer. Koale boudel, wind haar der veul te zeggen. Veld, aine mor, lag n hail ìnne of van Hoofdweg, bie Oadam Timmer laange ree op, t voetbalvolk mos der wat veur over hebben om te genieten van heur laifhebberij. En kerkvolk mocht der gain hinder van hebben, op zundag, aal dat geroup en gereer…. Domie was doch al nait zo goud bie stem en t zingen was ook nait meer wat t west was….
MOVV speulde in rooie shirts en swaarde körde boksems, wit paasde ook ja nait bie dizze maauwenopstreupers, bie dizze kerels. As Geert de Vries aanglieden kwam, vloog gras je om d’oren en Ole Sporrel haar veul weg van n blok beton. Jan Farries en Ellos Kolk kwam je vief moal tegen, Jopie Boer vernaggelde elkenain, zokzulf ook. Doar ston n ploug, in Midwolle, nog aal worden ogen mie groot as k weerom denk aan dij tied, dou Meerland nog beston en gainaine wat in kop kreeg as “Blaauwe Stad”, wotterparredies veur meerverdainers, muggen en aander meleur. Sportpark Niesoordloane was vanzulf n verbetern. Prestoatsies ook, tot in twaide klas van KNVB. Of was t nog hoger? Asmits bekroept mie doch wat “nostalgie”, wìnsk noar dat grootske vleden….

MOVV 1
Bovenste riege v.l.n.r.: grensrechter Tj.Loer, Piet Loer, Jopie Boer, Geert van Ham, Tjaard Aukes, Baby de Vries.
Middelste riege: Hekman, Hendrik van Dijk, Ole Sportel, Ellos Kolk.
Veurste riege: Geert de Vries, Harm v.d.Laan, Jan “Farries” Geertsema.

Foto van vraauw Van Ham, bedaankt!


 

Geef een reactie

Het e-mailadres wordt niet gepubliceerd. Verplichte velden zijn gemarkeerd met *