Zwemmen en zo: GZVW 50 jaar!

memory opener

memory opener

Dat verhoaltje in kraande, zetje leden, mit dij maaihemd, blaauw ook nog, van GZVW 50 joar goud, zette deure van mien onthold woagenwied open. En der kwamen doch herinnerns lös…. Vrumd aigelks, ik bin ja nooit n eerliekse zwemmer west, heb ook gain diploma A, B of wat der nog meer is. Bie reddend zwemmen bin ik aaltied de lul: slachtovver… Ik heb doar al wel voaker over schreven: de nachtmerrie van t schoulzwemmen, van haalf maai tot haalf september, ast wotter teminnent 15 groaden was. Op fietse van Midwolle noar Scheemde, dij grode widde kerel, badmeester De Vries… Zwemmen heb ik leerd op ULO dou James Kastie mien mien gaang goan lait. k Dee zulf dij kuzzentjes om lief en aarms, en trainde, trainde, trainde…. Kwam badmeester der n moal aan: “Goa mor even mit in t daipe, zwem t bad mor  rond, bie kaande blieven!” Dat dee’k! Ging goud, “van nou of in t daipe”, zee De Vries, hai bromde nog wat, heb k nait verstoan.
Nou wazzen wie voak in t zwembad in Eekste, meer oet as in t wotter. Dou mog je nog om t bad hìnlopen, mit klaaier aan, dee niks, ‘was ja goud veur de soosjoale kontakten….’

Soosjoale kontakten, Tineke op nekke...

Soosjoale kontakten, Tineke op nekke...

Mien bruier Hemmo, twij joar older en twinteg moal meer branie, mog ook geern of en tou opvalen. Mit zien kammeroad Henkie (dou al Henk ducht mie…) voak op steeën woar wat te doun was. (Of was der wat te doun, dou zai der wazzen??)

Bruier Hemmo in rubberboot, net echt...

Bruier Hemmo in rubberboot, net echt...

Dokter Kamps het ons dou wat oppord, aktiveerd… En dat belukte wonderwel. Maisten van ons gingen voaker en haarder zwemmen, en mit bale op doeltje gooien…  Wichter en jonges, mor wél?? Hemmo, Henk van Diek, Trijnie Heeres, Siep van Royen, Marijke Schuringa (?), Trijntje Kupers (?), Henny Lindeman (?), Hemmo Kuper (?) Ik zai t spul nog zo aan kaande liggen: oefenplaanken, kuzzentjes, gewichten, zulf moakt…. En dokter Kamps lopt derbie, mit zien spierbundels en energieke kop. Scheemder dail van GZVW, nije zwemverainen in Winschoot. en nou bestaait dij klup al 50 joar!
Kiek mor even op www.gzvw.nl! Ze zitten verlegen om ploatjes oet de geschiedenis van de verainen! Wel het nog foto’s????!!! En ze willen groag dat old leden zok registreren! Kinnen ze heur nijs sturen, as der nijs is. Over de kommende reünie, de verzoamelkomst van old-leden in Sodom. Of over t bouk dat moakt wordt!
’50 joar goud’, nait niks! GZVW, felisitoatsies, en dou der nog mor 50 bie….

Geef een reactie

Het e-mailadres wordt niet gepubliceerd. Verplichte velden zijn gemarkeerd met *